1 प्रभु राज्य करोआ, तरती मगन ओ;

ओर द्वीप जो बऊत ए, सेयो बी खुशी मनाओ!*

2 प्रभुए रे चऊँ कनारे बादल़ ओर न्हेरा ए;

तार्मिकता ओर न्याय तेसरे सिंहासनो रे मूल़ ए।

3 तेसते आगे-आगे आग चलदी ऊई

तेसरे बरोदिया खे चऊँ कनारे ते पस्म करी देओई।*

4 तेसरी बिजल़िया साथे दुनिया खे प्रयासा ओआ,

ये देखी की तरती थरथराई गी!

5 प्रभुए री मौजुदगिया रे, मतलब सारी तरतिया रे परमेशरो री मौजुदगिया रे

पाह्ड़ मोमो जेड़े गल़ी जाओए।

6 सर्ग प्रभुए री तार्मिकता रा एलान करोआ;

ओर देशो-देशो रे सबी लोके तेसरी महिमा देखी।

7 जितणे माणूं कअड़ी री मूर्तिया री पूजा करोए

ओर तिना पाँदे गर्व करोए, सेयो सब शर्मिंदा ऊणे;

सारे देवता प्रभुए गेई माथा टेको।

8 ओ प्रभु, तेरे न्याय रे बारे जेबे सिय्योनो रे लोके सुणेया

तेबे सेयो खुश ऊए ओर यहूदा प्रदेशो रे शईर मगन ऊए।

9 कऊँकि ओ प्रभु, तूँ सारी तरतिया पाँदे परमपरदान ए;

तूँ सारे देवतेया ते बऊत जादा महान ठईरी रा।*

10 यहोवा तिना ते प्यार करोआ जो बुराईया ते कृणा करोए।

से आपणे पग्ता रे प्राणा री रक्षा करोआ

ओर तिना खे दुष्टा रे आथो ते बचाओआ।

11 परमेशरो री जोति तार्मिक माणूंआ पाँदे चमकोई।

पले ओर इमानदार लोक खुश ऊणे।

12 यहोवा जो करोआ तीजी रिया बजा ते सब तर्मी लोक खुश ऊणे!

ओर तेसरे पवित्र नाओं रा तन्यवाद करो!