1 परमेशरे यहूदा प्रदेशो रे आपू खे प्रकट कित्तेया;

इस्राएलो रे तेसरा नाओं महान ए।

2 ओर तेसरा कअर शालेमो दे ए,

ओर सिय्योन पाह्ड़ो पाँदे रओआ।*

3 तेती तिने तीर, ढाल, तलवार

ओर युद्धो रे अथियार तोड़ी की नाश करीते। सेला

4 ओ परमेशर, तूँ कितणा गौरवशाली ए! तूँ कितणा प्रतापी ए,

जेबे तूँ पाह्ड़ो ते वापस आओआ, जेती तैं आपणे दुश्मण अराई राखे थे।

5 मजबूत सैनिक लूटी गे ओर बड़ी पारी नींजा रे पड़ी रे;

ओर शूरवीरा बीचा ते केसी रा आथ नि चलेया।

6 ओ याकूबो रे परमेशर, तेरे थिड़कणे ते,

कोड़े रथो समेत मरी की खत्म ऊईगे।

7 बस तूँई डरो जोगा ए ओर जेबे तेरा गुस्सा पड़कणे लगोआ,

तेबे तां सामणे कोई खड़ा रई नि सकदा?

8 तैं स्वर्गो ते न्याय रा फैंसला सुणाया;

तरती तेस बखते सुणी की डरी गी, ओर चुप ऊई गी,

9 जेबे यहोवा न्याय करने खे खड़ा ऊआ,

तैं तरतिया दे सेयो सब बचाए जो नम्र थे। सेला

10 माणूंआ रे गुस्से ते तेरी जादा तारीफ ओई;

जो युद्धो ते बची रणे, तिना तेरे त्यार मनाणे।

11 आपणे प्रभु परमेशरो री मान्नता मानो, ओर पूरी बी करो;

यहोवे रे चऊँ कनारे रणे वाल़े लोक तेसखे पेंट चढ़ाओ, प्रभु डरो जोगा ए।

12 परमेशरो परदाना रा कमण्ड मटयाई देणा;

से तरतिया रे राजेया खे डरो जोगा लगोआ।