महिमामय राजा
दाऊदो रा पजन
1 तरती ओर जो कुछ तिदे ए,
दुनिया ओर तिदे रणे वाल़े लोक बी सब यहोवे रे ए।
2 कऊँकि प्रभुए ई तेतेरी निऊँ समुद्रो रिया गईराईया दे मजबूत करी राखी
ओर नदिया पाँदे ठराई राखी।
3 प्रभुए रे पाह्ड़ो पाँदे कुण चढ़ी सकोआ?
ओर तेसरिया पवित्र जगा रे कुण खड़ा ऊई सकोआ?
4 सिर्फ सेई जेसरे काम निर्दोष ओर बचार अच्छे ए,
जो मूर्तिपूजा नि करदे ओर जो चूठ नि बोलदे।
5 यहोवे तिना खे आशीष देणी ओर सेयो बचाणे,
ओर सेयो तर्मी ठराणे।
6 एड़े ई लोक परमेशरो खे टोल़ने वाल़े ए,
तेरे दर्शणो री इच्छा राखणे वाल़े याकूबो रे वंशो रे ए। सेला
7 ओ द्वारो, आपणे सिर ऊच्चे करो!
ओ सनातनो रे द्वारो, ऊच्चे ऊई जाओ,
ताकि प्रतापी राजा पीतरे आई सको!
8 से प्रतापी राजा कुण ए?
प्रभु, जो सामर्थी ओर पराक्रमी ए,
परमेशर, जो युद्धो रे पराक्रमी ए!
9 ओ द्वारो, आपणे सिर ऊच्चे करो!
ओ सनातनो रे द्वारो, ऊच्चे ऊई जाओ,
ताकि प्रतापी राजा पीतरे आई सको!
10 से प्रतापी राजा कुण ए?
सेनाओं रा प्रभु, सेई प्रतापी राजा ए। सेला