पजन 39

बुद्धि ओर माफिया रिया तँईं प्रार्थना

बजाणे वाल़े यदूतून परदानो रिया तँईं दाऊदो रा पजन

1 मैं आपणे आपू ते बोलेया, "मां आपणे चाल-चलणो रे चौकसी करनी,

ताकि मेरी जीबा ते पाप नि ओ; जदुए तक दुष्ट मां सामणे ए,

तदुए तक मां लगाम लगाई की आपणा मूँ बंद राखणा।"*39:1 याकूब 1:26

2 आऊँ मौन धारण करी की गूँगा बणीगा,

ओर पलाईया रिया तरफा ते बी चुप रया

ओर मेरी तकलीफ बढ़ी गी,

3 मेरा दिल पीतरे ई पीतरे फूखणे लगी रा था।

सोचदे-सोचदे आग पड़की गी; तेबे आऊँ बोलणे लगेया,*39:3 77:3, 77:6

4 "ओ यहोवा, मेरा अंत माखे बताई दे ओर ये बी कि मेरी उम्र कितणी ए,

जेते की आऊँ आपणी जिन्दगिया रे बारे दे जाणी लऊँ कि मेरी जिन्दगी कितणी ए!

5 देख, तैं माखे थोड़ी ई जिन्दगी देई राखी ए ओर मेरी जिन्दगी तेरी नजरा रे कुछ पनिए।

सच्ची सब माणूं किंयाँ बी टिके रे कऊँ नि ओ तेबे बी बेकार ठईरी रे। सेला

6 सच्चो खे ई माणूं छांयी जेड़ा चलदा-फिरदा प्राणी ए; सेयो बेकारो खेई कबराओए;

से पैसे तो सांजोआ, पर जाणदा नि कि से केस लणे!"

7 एबे ओ परमेशर, आँऊ केसखे न्याल़ूँ?

मेरी उम्मीद तो तेरिया तरफा खे लगी री।

8 माखे मेरे सारे अपराधा ते छुड़ाई लओ।

ताकि आँऊ मूर्खा रिया तँईं निन्दा जोगा नि बणूँ।

9 आऊँ तो गूँगा बणीगा ओर ना ई मैं आपणा मूँ खोलेया;

कऊँकि ये काम तैंई करी राखेया।

10 तैं जो बिपदा मां पाँदे पाई राखी तिजी खे मांते दूर करी दे,

कऊँकि आऊँ तो तेरे आथो री मारा ते नाश ऊईगा रा।

11 जेबे लोक बुरे काम करोए तो तूँ तिना खे चतौणी देआ ओर तिना खे सजा देआ।

तूँ तिना रिया किमती चीजा खे नाश करी देआ, जिंयाँ एक कीड़ा टाल्लेया खे खाई जाओआ।

सच्ची सब माणूं बेकारो रेई कमण्ड करोए। सेला

12 ओ प्रभु, आऊँ मतादा रिया तँईं प्रार्थना करूँआ ओर मेरी बिनतिया पाँदे त्यान दे,

मेरा रोणा सुणी की शांत नि रओ! कऊँकि आऊँ तां साथे एक पराऊणेया जेड़ा रऊँआ,

ओर आपणे सारे बुजुर्गा जेड़ा परदेशी ए।*39:12 इब्रानी 11:13

13 इजी ते पईले कि आऊँ मरी जाऊँ ओर रऊँ नि,

मां पाँदे गुस्से ऊणा बन्द करी देओ ताकि आऊँ खुशिया री जिन्दगी पाई सकूँ।