1 यहोवा महान ए ओर बऊत तारीफा जोगा ए, म्हारे परमेशरो रे शईरो दे*

तेते शईरो दे जेती से रओआ जो तेते पवित्र पाह्ड़ी सिय्योनो पाँदे बणी रा। सेला

2 से शईर ऊच्चा ओर सुन्दर ए, से पुरिया तरअ ते खुशी लयाओआ।

सिय्योन पाह्ड़ महान राजे रा शईर ए, ये से जगा ए जेती सच्चा परमेशर रओआ।*

3 परमेशर एते शईरो रेया लोका री रक्षा करने खे आजीर रओआ ओर एतेरी रक्षा करने वाल़ा साबित ऊआ ए।

4 कई राजा आपणियां सेना साथे कट्ठे ऊई रे;

तेते शईरो पाँदे अमला करने रिया तँईं,

5 पर सेयो तेस शईरो खे देखी की हैरान ऊईगे,

सेयो डरो रे मारे थुरने लगे फेर तेथा ते नठीगे।

6 तेती तिना खे थुरनी छूटी गी

ओर तिना खे तेती पारती जवाणसा रिया जमणे री जिया पीड़ा ऊणे लगिया।

7 सेयो एड़े थुरीगे जेड़े तर्शीश शईरो खे जाणे वाल़े जाह्ज तेज अवा रिया बजा ते थुरी जाओए। जेड़े ए,

जिना खे पुर्बो री तरफा ते आऊणे वाल़ी पऊण तोड़ी देओई।

8 आसे सुणेया था कि से शईर बऊत ई सुन्दर ए,

ओर एबे आसे सर्वशक्तिमान परमेशरो रे शईरो खे देखी बी लया,

कि परमेशरो सदा तक तेतेरी रक्षा करनी। सेला

9 ओ परमेशर, आसे एती तेरे मन्दरो दे त्यान करूँए कि तूँ आसा खे किंयाँ वफादारिया ते प्यार करेया।

10 तूँ जाणे-मानेया दा ए ओर पुरिया तरतिया रे लोक तेरी तारीफ करोए,

कऊँकि तूँ शक्तिशाली ओर सई न्याय करी की शासन करेया। तेरा दाँणा आथ सदा जीत दलाओआ;

11 तेरे न्याय रे कामो रिया बजा ते सिय्योन पाह्ड़ खुशी मनाओ

ओर यहूदा प्रदेशो रे लोक मगन ओ!

12 परमेशरो रे लोको, सिय्योन पाह्ड़ो रे चऊँ कनारे कुमो,

फेर तिजी रे गुम्मट गिणी लओ कि कितणे ए,

13 तिजी री दवाला पाँदे त्यान करो,

तेथो रे मईल त्यानो साथे देखो,

ताकि तुसे आऊणे वाल़ी पीढ़िया रे लोका गे इजी रे बारे दे बताई सको।

14 कऊँकि ये परमेशर जुगो-जुगो तक म्हारा परमेशर ए,

तेस म्हारे मरने तक म्हारी अगुवाई करनी।