1 आऊँ प्रार्थना करूँआ कि जेबे तूँ मुसीबता दे ए तो प्रभुए तेरी सुणी लओ!

ओर याकूबो रा परमेशर तेरी रक्षा करो!

2 से आपणियां पवित्र जगा ते तेरी मताद करो,

ओर सिय्योन पाह्ड़ो ते ताखे सम्बाल़ो!

3 से तेरी सारी नज्जो री बलिया खे याद राखो

ओर तेरी होमबलिया खे ग्रईण करो। सेला

4 से तेरी मनो री इच्छा खे पूरी करो

ओर तेरी सारी योजना खे सफल करो!

5 तेबे आसा तेरे उद्धारो रिया खुशिया दे चींगणा

ओर म्हारे परमेशरो री तारीफ करी कि तेरिया जीता रा जशन मनाणा।

प्रभु ताखे तेरिया सबी प्रार्थना रा ज्वाब देओ।*

6 एबे माखे पता लगी गा कि यहोवा आपणे चूणे दे राजे रा उद्धार करोआ,

से पवित्र स्वर्गो ते तेसरी प्रार्थना सुणोआ फेर आपणे महान बलो ते तेसखे जीत दिलाओआ।

7 केसी खे रथा रा ओर केसी खे कोड़ेया रा परोसा ए,

पर आसे आपणे प्रभु परमेशरो री सामर्था पाँदे परोसा राखूँए।*

8 एड़े लोक तो नपी गे ओर रूड़ीगे

पर आसे तो उठे ओर सीदे खड़े ए।

9 ओ प्रभु, राजे खे बचाई दे,

जेबे आसे ताखे बुलाऊँ तो तूँ आसा खे ज्वाब दे।