परमेशरो रिया तँईं इच्छा
बजाणे वाल़े परदानो रिया तँईं कोरह वंशिया रा मश्कील
1 ईरणी जिंयाँ नदिया रे पाणिए खे तड़फोई,
तिंयाँ ई ओ परमेशर, आऊँ बी तेरिया तँईं तड़फुआ।
2 आऊँ तेरिया तँईं त्याया ए, ओ जिऊँदे परमेशर।
आऊँ कदी तेरे सामणे जाई की आराधना करी सकूँआ?42:2 पजन 63:1, प्रकाशित 22:4
3 मेरे आसू ई रात-दिन मेरी रोटी बणीगे ओर मेरे दुश्मण लगातार मांते पूछदे रओए कि तेरा परमेशर केई ए?
4 जेबे माखे याद आओई कि पईले मेरी जिन्दगी केड़ी थी, तो आऊँ बऊत दु:खी ऊई जाऊँआ ओर रोऊँआ।
आऊँ लोका री बऊत पारी पीड़ा साथे परमेशरो रे मन्दरो दे तेसरी आराधना करने खे जाया करुँ था।
मैं तेती लोका ते आगे जाई कि खुशिया रे गाणे गाए ओर आसे जोरे-जोरे की परमेशरो री तारीफ करेया करुँ थे।
5 इजी री खातर आऊँ आपणे आपू ते पूछूँआ, "आऊँ इतणा उदास ओर परेशान कऊँ ए?"
माखे परमेशरो से मताद पाणे रिया तँईं थोड़ा इन्तजार करना चाईयो।
तेबे मां एक बार फेर आपणे परमेशरो री स्तुति करनी, कऊँकि सेई माखे बचाणे वाल़ा ए।42:5 मत्ती 26:38, मरक 14:34, यूह. 12:27
6 ओ मेरे परमेशर, आपणे पीतरा ते दु:खी आ जेबे आऊँ तेरे बारे दे सोचूँआ,
तेथा ते जेथा ते यरदन नदी हेर्मोन पाह्ड़ो ते शुरू ओई ओर मीजार पाह्ड़ो ते।
7 तेरे पाणिए रा शब्द सुणी की पाणी, पाणिए खे आका पाओआ,
तेरिया सारिया तरंगा ओर लईरा रे आऊँ डूबी गा रा।
8 तेबे बी प्रभुए दिने आपणी दया ओर करूणा प्रगट करनी;
ओर राती बी मां तेसरा गीत गाणा
ओर माखे जिन्दगी देणे वाल़े प्रभुए ते मां प्रार्थना करनी।
9 मां आपणे प्रभुए ते जो माखे चट्टानी जेड़ा ए पूछणा, "तैं आँऊ कऊँ पुलाईता?
आऊँ दुश्मणा रे अत्याचारो रिया बजा ते कऊँ शोगो साथे चलेया करूँआ?"
10 मेरेया बैरिया रे तानेया ते आऊँ दबणे लगी रा,
ओर सेयो लगातार मांते पूछदे रओए, "तेरा परमेशर केई ए?"
11 आऊँ आपणे आपू ते फेर पूछूँआ, आऊँ इतणा उदास ओर परेशान कऊँ आ?
माखे परमेशरो ते मताद पाणे रिया तँईं थोड़ी देर इन्तजार करना चाईयो।
तेबे मां एक बार आपणे परमेशरो री स्तुति करनी, कऊँकि सेई माखे बचाणे वाल़ा ए।