1 ओ यहोवा, जो माणूं मां साथे मकद्दमा लड़ोए,

तिना साथे तूँ बी मकद्दमा लड़;

जो मां साथे युद्ध करोए, तिना साथे तूँ बी युद्ध कर।

2 ढाल ओर भाल़ा लई की मेरी मताद करने खे खड़ा ओ।

3 आपणी बर्छी तिना रिया तरफा खे फेर जो मां पीछे पड़ी रे, तूँ मांते वादा कर कि तां आऊँ बचाई लणा। जो माणूं मेरा पीछा करोए, तिना रे खलाफ बर्छी ओर भाल़ा चक।

तूँ मेरे प्राणो खे ये बोल, "आऊँ ई तेरा उद्धार करने वाल़ा ए।"

4 जो माणूं माखे काणा चाओए, सेयो शर्मिंदा ओर बेज्जत ओ!

जो मेरे नुकशाणो रे बारे दे सोचोए,

सेयो पीछे टाए जाओ ओर तिना री बेज्जती ओ!

5 सेयो पऊणी साथे उडने वाल़े पूए जेड़े ऊई जाओ

ओर प्रभुए रा दूत तिना खे खदेड़दा जाओ!

6 तिना री बाट न्हेरी ओर खड़ीसणे वाल़ी ओ

ओर प्रभुए रा दूत तिना खे खदेड़दा जाओ!

7 बिना बजा ते तिने मेरिया तँईं आपणा जाल़ गड्डे दे बछाया;

बिना बजा ते ई तिने मेरे प्राण लणे खे गड्डा खणी राखेया।

8 अचाणक तिना पाँदे बिपदा पड़ी जाओ

ओर जो जाल़ तिने बछाई राखेया तिदे सेयो आपू ई फसी जाओ

ओर तिदे सेयो आपू ई पड़ी जाओ।*

9 पर मां प्रभुए दे मगन ऊणा;

कऊँकि तिने आऊँ बचाई राखेया।

10 मां पूरे दिलो ते ये बोलणा, "ओ प्रभु, तां जेड़ा कोई पनि ए,

तूँ दु:खी माणूंआ खे बड़े-बड़े तागतबर लोका ते बचाओआ

ओर लूटेरेया ते गरीब लोका री रक्षा करेया।"

11 मेरे खलाफ चूठे गवाह् खड़े ओए

ओर जो गल्ल आऊँ नि जाणदा सेई मांते पूछोए।

12 सेयो मां साथे पलाईया रे बदले बुराई करोए;

एथो तक कि मेरा प्राण ऊबी जाओआ।

13 जेबे सेयो रोगी थे तेबे मैं पश्चाताप करने रिया तँईं टाट पईनी की राखी

ओर पूखा-त्याया रई की दु:ख सईन करदा रया

ओर माखे मेरी प्रार्थना रा जबाब नि मिलेया।*

14 आऊँ तिना साथे एड़ा सबाओ राखूँ था

कि जेड़ा मानो मेरे संगी-साथी या मेरे पाई ओ;

जेड़ा कोई माया खे शोग करोआ,

तेड़ा ई मैं शोगो रा पईरावा पईनी की सिर चुकाई की शोग कित्तेया।

15 पर जेबे आऊँ लड़खड़ाई की रूड़ेया तेबे मेरे दुश्मण खुश ऊई की कट्ठे ऊईगे,

सेयो मेरे चऊँ कनारे केरा पाई की खड़ी गे ओर मां पाँदे आसणे लगे ओर मजाक करने लगे।

एथो तक कि अणजाण लोके बी मां पाँदे अमला कित्तेया ओर सेयो नि रूके।

16 तिने माखे गाल़ी दित्तिया ओर मेरा मजाक उडाया,

ओर नफरता साथे कूरी की माखे देखणे लगे।*

17 ओ प्रभु, तां कदुओ तक देखदे रणा?

एसा बिपदा ते जिदे तिने आऊँ पाई राखेया,

माखे काणे रिया तँईं जवान शेरा जेड़े अमला करने वाल़े लोका ते माखे बचा।*

18 मां बड़ी सभा रे तेरा तन्यवाद करना;

मां बऊत सारे लोका बीचे तेरी स्तुति करनी।

19 मेरे खलाफ चूठ बोलणे वाल़े मेरे दुश्मण खुशी नि मनाई सको,

जो बिना मतलबो ते मेरे बैरी ए, सेयो मेरी बेजती करदे ऊए आसी नि सको।*

20 कऊँकि सेयो मेल-जोलो रिया गल्ला नि बोलदे,

पर दुनिया रे शान्तिया साथे रणे वाल़े लोका रे खलाफ छलो री इच्छा राखोए।

21 तिने मेरे खलाफ चींगदे ऊए मां पाँदे दोष लगाए ओर बोलोए,

"आसे सेयो गल़त काम देखे जो तैं कित्ते!"

22 ओ प्रभु, तैं तो ये देखी राखेया;

एबे चुप नि रओ! ओ प्रभु, मांते दूर नि रओ!

23 उठ, मेरा न्याय करने खे जाग,

ओ मेरे परमेशर, ओ मेरे प्रभु, मेरा मकद्दमा निपटाणे खे आओ!

24 ओ मेरे प्रभु परमेशर, तूँ तर्मी आ, तूँ आपू बता कि आऊँ निर्दोष आ,

ओर मेरेया दुश्मणा खे मां पाँदे आसणे नि दे!

25 सेयो आपणे आपू ते ये नि बोली सको, "वाह! म्हारी इच्छा तो पूरी ऊई गी!"

सेयो ये नि बोलो, "आसे से निगल़ी ता।"

26 जो लोक मेरे नुकशाणो ते खुश ओए,

तिना खे पुरिया तरअ ते शर्मिंदा ओर बेज्जत कर!

जो मेरे खलाफ बडयाईया करोए तिना खे शर्म

ओर अनादरो साथे टखी दे!

27 जो लोक मेरे तर्मो ते खुश रओए, सेयो जयजयकार करो

ओर खुशी मनाओ ओर हमेशा बोलदे रओ, "प्रभुए री तारीफ ओ,

से आपणे दासो रे कल्याणो ते खुश ओआ!"

28 तेबे मां पूरे दिन चींगदे रणा, प्रभु परमेशरो री स्तुति करो! तिने सेई कित्तेया जो सई था।