पजन 106

परमेशरो रिया तँईं इस्राएलो रा अविश्वास

1 यहोवे री स्तुति करो! प्रभुए रा तन्यवाद करो,

कऊँकि से पला ए ओर तेसरी करूणा सदा री ए!

2 यहोवे रे पराक्रमो रे कामा खे कुण बताई सकोआ

या तेसरा पूरा गुणगाण कुण सुणाई सकोआ?

3 सेयो लोक तन्य ए, जो तेसरी आज्ञा रा पाल़न करोए,

जो हमेशा सई काम करोए

4 ओ प्रभु, जेबे तूँ आपणे निज लोका पाँदे खुशिया ते कृपा करेगा

तेबे माखे बी याद करेया;

मेरा उद्धार करने रिया तँईं मेरी सम्बाल़ लओ,

5 ताकि आऊँ तेरे चुणेया रे लोका रा कल्याण देखी सकूँ

ओर तेरिया प्रजा रे लोका रिया खुशिया रे खुश ऊई सकूँ

ओर तेरे निज पाअगो साथे तारीफ करी सकूँ।

6 आसे तो आपणे बुजुर्गा जेड़ा पाप करी राखेया,

आसे बुरे काम कित्ते, आसे दुष्टता करी राखी!

7 जेबे म्हारे बुजुर्ग मिस्र देशो रे थे तिने तेरे अचम्बे रे काम नि समजे,

ना तिने तेरी अपार करूणा याद राखी;

तिने समुद्रो रे कनारे पाँदे, मतलब लाल समुद्रो रे कनारे पाँदे बगावत कित्ती।

8 तेबे बी प्रभु, तैं आपणे नाओं रिया तैंई सेयो बचाए,

ताकि तिना पाँदे आपणे पराक्रमो खे प्रगट करो।

9 प्रभु, तैं लाल समुद्र डांटेया ओर से सूकीगा

ओर तूँ आपणियां प्रजा खे डूगे समुद्रो बिछिए ईंयाँ निकयाल़ी की लई आया

मानो सुनसाण जगा बीचा ते निकयाल़ी की लईगा।

10 ईंयाँ तैं सेयो तिना रे बैरिया ते बचाए

ओर दुश्मणा रे आथो ते छुड़ाई लये।*106:10 लूक 1:71

11 ओर तिना रे दुश्मण पाणिए रे डूबी गे,

तिना बीचा ते एक पनि बचेया।

12 तेबे म्हारे बुजुर्गे प्रभुए रे वचना पाँदे परोसा कित्तेया

ओर तेसरी स्तुति करने लगे।

13 पर सेयो चट ई प्रभुए रे कामा खे पूली गे

ओर तेसरिया सलाई रिया तँईं नि ठईरे।

14 तिने सुनसाण जगा रे बऊत लाल़च कित्तेया

ओर बिना पाणिए रिया जगा रे परमेशरो री परीक्षा लई।*106:14 1 कुरिन्थ 10:9

15 तिने लोके जो मांगेया, से परमेशरे तिना खे दित्तेया;

पर तिना बीचे महामारी बी पेजी।

16 जेबे तिने डेरेया रे मूसा

ओर यहोवे रे पवित्र जन हारूणो रिया तँईं ईर्ष्या कित्ती,

17 तेबे तरती फटी की दातानो खे निगल़ी गी

ओर तेसे अबीरामो रा चूण्ड बी टकी ता।

18 तेबे तिना रे चूण्डो रे आग लगी गी

ओर दुष्ट लोक आगी रिया लूपिया साथे पस्म ऊईगे।

19 तिने होरेब पाह्ड़ो*106:19 सीनै पाह्ड़ पाँदे सूईने रे बाच्छूए री मूर्ति बणाई

ओर तेसा बणाई रिया मूर्तिया गे माथा तेकेया।

20 तिने परमेशरो री महिमा खे

काआ खाणे वाल़े बल़दो रिया मूर्तिया रे बदली ता।*106:20 रोमी 1:23

21 सेयो आपणे उद्धार करने वाल़े परमेशरो खे पूली गे,

जिने मिस्र देशो रे बड़े-बड़े काम कित्ते थे।

22 तिने हामो रे देशो दे अचम्बे रे काम

ओर लाल समुद्रो रे कनारे पाँदे डराऊणे काम कित्ते थे।

23 इजी खे प्रभुए बोलेया कि मां इना रा सत्यानाश करी देणा था

जे मेरा चुणेया रा दास मूसा मां सामणे तिना रिया खातर खड़ा नि ऊँदा,

ताकि मेरा गुस्सा शान्त ऊई जाओ,

केथी एड़ा नि ओ कि आऊँ तिना खे नाश करी देऊँ।

24 तेबे म्हारे बुजुर्गे तेस सुखी देशो खे छाडीता,

कऊँकि तिने परमेशरो रे वादे पाँदे परोसा नि कित्तेया।

25 सेयो आपणे तम्बूए रे कुड़कुड़ांदे रये

ओर तिने प्रभुए रा कईणा नि मानेया।

26 तेबे प्रभुए तिना रे बारे दे कसम खाई, कि

मां यो सुनसाण जगा रे नाश करी देणे

27 ओर इना रे वंश दूजी जातिया सामणे बखेरी देणे

ओर देशो-देशो रे तित्तर बित्तर करी देणे।*106:27 पजन 44:11

28 तेबे पोरो दे परमेशरो रे लोक बाल देवते री उपासना दे जाणे लगे

ओर मरे दे देवतेया खे चढ़ाई दी बलिया खे खाया।

29 ईंयाँ तिने आपणे कामा ते प्रभुए खे गुस्सा चढ़ाया

ओर तिना बीचे महामारी फैली गी।

30 तेबे पीनहासे खड़े ऊई की न्यायदण्ड दित्तेया,

जेते की महामारी रूकी गी

31 तेसरा ये काम पीढ़िया ते पीढ़िया तक

सदा खे तार्मिकता गिणेया गया।

32 तिने मरीबा री सूबल़ा रे नेड़े बी प्रभुए खे गुस्सा दलाया

ओर तिना रिया बजा ते मूसे रा नुकशाण ऊआ;

33 कऊँकि तिने मूसे खे बऊत जादा गुस्सा दलाया,

जेतेरिया बजा ते तिने मूर्खता रिया गल्ला बोलिया,

34 "इस्राएलिए दूजिया जातिया रे लोक नाश नि कित्ते,

जेड़ी प्रभुए तिना खे आज्ञा दित्ती थी,

35 पर तिने दुष्ट जातिया रे लोका साथे ब्या कित्तेया,

ओर तिने तिना रे जे काम बी सीखी ले;

36 म्हारे बुजुर्ग तिना रिया मूर्तिया री पूजा करने लगे,

जो तिना खेई फन्दा बणीगी।

37 तिने आपणे माठे-बेटिया खे कनानो रे देवतेया रे आगे बलिया रे रूपो दे चढ़ाया।,

पूत-प्रेता खे बलिदान कित्ते;*106:37 1 कुरिन्थ 10:20

38 तिने आपणे निर्दोष माठे-बेटिया रा खून बाह्या,

जो तिने कनान देशो रिया मूर्तिया पाँदे बलिदान कित्ते,

इजी खे तरती खूनो साथे अपवित्र ऊई गी।

39 सेयो आपू ई आपणे कामा रे जरिए अशुद्ध ऊईगे

ओर आपणे कामा रे जरिए व्याभिचारी बी बणीगे।

40 तेबे प्रभुए रा गुस्सा आपणे निज लोका पाँदे पड़केया

ओर तिने आपणे निज पाअगो ते कृणा कित्ती;

41 तेबे प्रभुए सेयो दूजी जातिया रे वशो रे करीते

ओर तिना रे बैरिये तिना पाँदे राज कित्तेया।

42 तिना रे दुश्मणे तिना पाँदे अन्देर कित्तेया

ओर सेयो तिना रे वशो रे ऊईगे।

43 कई बार प्रभुए सेयो छुड़ाए, पर सेयो तेसरे खलाफ बगावत करदे गये

ओर आपणे बुरे कामा रिया बजा ते तिना खे चुकणा पड़ेया।

44 तेबे बी जेबे प्रभुए प्रार्थना दे तिना री पुकार सुणी,

तेबे तिने तिना री मुसीबता पाँदे त्यान कित्तेया!

45 प्रभुए तिना रिया तँईं आपणी वाचा याद करी की

आपणी अपार करूणा रे मुताबिक तरस खाया,

46 ओर जो तिना खे बंदी बणाई की लईगे थे,

तिना सबी ते तिना पाँदे दया करवाई।"

47 ओ म्हारे परमेशर, म्हारा उद्धार कर

ओर आसा खे दूजी जातिया बीचा ते कट्ठा करी दे,

ताकि आसे तेरे पवित्र नाओं रा तन्यवाद करिए

ओर तेरी स्तुति करदे ऊए तेरी तारीफ करिए।

48 इस्राएलो रा यहोवा परमेशर शुरूए ते लई की जुगो-जुगो तक तन्य ए!

ओर सारी प्रजा बोलो आमीन्!

यहोवे री स्तुति करो।*106:48 पजन 41:13