1 ओ प्रभु, गुस्से ते माखे नि डाँट,

ओर ना जल़ी की माखे सजा दे!

2 तेरे तीरे आँऊ बीनी ता

ओर तेरा आथ मां पाँदे उठी रा।

3 तेरे गुस्से रिया बजा ते मेरा शरीर तन्दरूस्त नि ए;

ओर मेरे पापो रिया बजा ते मेरी आड्डिया दे कुछ बी ठीक नि ए।

4 आँऊ आपणे बुरे कामा रिया बजा ते सिरो तक डूबी गा रा,

ओर सेयो पारी बोजो जेड़े मेरे सईणे ते बारे ऊईगे रे।

5 मेरे जख्मा ते सड़यांन आओई,

मेरी मूर्खता रिया बजा ते सेयो सड़ीगे रे।

6 आऊँ बऊत दु:खी ए ओर चूकीगा रा;

पूरा दिन आऊँ शोग करदा चलदा-फिरदा रऊँआ।

7 बुखारो रिया बजा ते मेरा शरीर जल़ने लगी रा

ओर आऊँ बऊत ई जादा बमार ए।

8 आऊँ कमजोर ओर बऊत ई टुटीगा रा;

आऊँ आपणे दिलो री तकलीफा ते कणदा रऊँआ।

9 ओ प्रभु, मेरी सारी इच्छा तेरे सामणे ए,

ओर मेरा कणना तांते छिपी नि रया।

10 मेरा दिल बऊत तेज धड़कोआ ओर मेरी तागत खत्म ऊणे वाल़ी ए;

ओर मेरिया आखी ते ठीक पनि दिखणे लगी रा।

11 मेरे दोस्त ओर मेरे रिश्तेदार मेरी बिपदा रे बखते मांते दूर ऊईगे,

ओर मेरे टब्बरो रे बी दूर जाई की खड़े ऊईगे।*

12 ओर जो लोक माखे काणा चाओए, सेयो माखे पकड़ने खे जाल़ बछाओए,

ओर माखे नुकशाण पऊँचाणे री कोशिश करने वाल़े दुष्टता रिया गल्ला बोलोए

ओर सेयो पूरा दिन छल-कपट करने रिया गल्ला सोचोए।

13 पर आऊँ टऊणे जेड़ा सुणदा ई नि,

ओर गूँगे जेड़ा आपणा मूँ नि खोलदा।

14 बल्कि आऊँ तेस माणूंए जेड़ा ऊईगा रा जो कुछ सुणदा ई नि,

ओर जेसरे मुंए ते आपणे बचाव रिया तँईं कोई गल्ल नि निकल़दी।

15 पर ओ प्रभु, मैं तांई पाँदे आपणी उम्मीद लगाई राखी,

ओ प्रभु, मेरे परमेशर, तांई माखे ज्वाब देणा।

16 मैं बोलेया, "एड़ा नि ओ कि सेयो मां पाँदे आसणे लगो;

जेबे मेरे पैर खरीसड़ो तेबे सेयो मां पाँदे बडिया-बडिया गल्ला करो।"

17 कऊँकि आऊँ एबे रूड़ने ई वाल़ा ए;

ओर मेरा दु:ख हर बखत मां साथे ए।

18 मां तो आपणे बुरे काम मानी लणे,

ओर आँऊ आपणे पापो रिया बजा ते दु:खी आ।

19 पर मेरे दुश्मण फुर्तिले ओर सामर्थी ए,

ओर जो मां साथे बिना मतलबो ते कृणा करोए सेयो बऊत बढ़ीगे रे।

20 जो पलाईया रे बदले बुराई करोए,

सेयो बी मेरी पलाईया पीछे चलणे रिया बजा ते मां साथे बरोद राखोए।

21 ओ प्रभु, माखे छाड नि!

ओ मेरे परमेशर, मांते दूर नि ओ!

22 ओ प्रभु, ओ मेरे उद्धारकर्ता,

मेरी मताद करने खे फुर्ती कर!