मौता ते बचाणे री प्रार्थना
कोरह वंशिया रा पजन। बजाणे वाल़े रे परदानो रिया तँईं : महलतलग्नोत रागो रे एज्रावंशी हेमानो रा मश्कील
1 ओ यहोवा, मेरे उद्धारकर्ता परमेशर,
आऊँ तां सामणे आपणे दु:खो दे रोऊँआ।
2 मेरिया प्रार्थना पाँदे त्यान दे,
मेरी मतादा रिया तँईं बिनती सुण!
3 आऊँ इतणे संकटो दे पड़ी रा,
कि आऊँ एबे मरने वाल़ा ए।
4 आऊँ कब्रा रे जाणे वाल़ेया बीचे गिणी राखेया;
आऊँ कमजोर मर्दो जेड़ा ऊईगा रा।
5 आऊँ मुड़देया बीचे छाडीता रा,
ओर जो घात ऊई की कब्रा रे पड़ी रे,
जिना खे तूँ फेर याद नि करदा ओर सेयो तेरी मतादा ते बिना ए,
तिना जेड़ा आऊँ ऊईगा रा।
6 तैं आऊँ कब्रा री थाल़िया रेई,
न्हेरे ओर डूगिया जगा रे राखी राखेया।
7 तेरे गुस्से री जल़न मां ई पाँदे बणी री;
आपणियां सारिया लईरा साथे तूँ माखे डबोणे लगी रा। सेला
8 तैं आऊँ मेरे जाण-पछयाण वाल़ेया ते दूर करी राखेया;
ओर आऊँ तिना री नजरा दे बुरा बणाईता। आऊँ बंदी ए ओर निकल़ी नि सकदा।88:8 अय्यू. 19:13, पजन 31:11, लूक 23:49
9 दु:खो रिया बजा ते मेरिया आखी ते चाल़ा-माल़ा दिशोआ।
ओ यहोवा, आऊँ लगातार ताखे आका पाऊँआ ओर प्रार्थना दे आपणे आथ तेरिया तरफा खे फैलांदा आई रा।
10 क्या तां मुड़देया रिया खातर नौखे काम करने?
क्या मरे रेया लोका उठी की तेरी स्तुति करनी? सेला
11 क्या कब्रा रे तेरी करूणा रा
ओर नाश-लोको रे तेरी सच्चाईया रा बखाण ऊई सकोआ?
12 क्या न्हेरे तेरे नौखे काम,
या तेरी तार्मिकता विश्वासघातो रिया दशा रे प्रकट कित्ती जाणी?
13 प्रभु, आँऊ तेरिया मतादा रिया तँईं रोऊँआ;
प्यागा मेरी प्रार्थना तां तक पऊँचोई।
14 ओ प्रभु, तूँ माखे कऊँ छाडेया?
तूँ आपणा मूँ मांते कऊँ लकोंदा रएया?
15 आऊँ बचपनो तेई दु:खी बल्कि अदमुआ ए;
आँऊ मौता रे नेड़े पऊँची गा रा;
आऊँ तेरे डरो रे मारे बऊत बेचैन ऊईगा रा।
16 तेरा गुस्सा मां पाँदे उतरी रा;
तेरे डरो ते आँऊ नाश ऊणे लगी रा।
17 तैं जो विपत्ति पेजी राखी ए, सेयो मेरे चऊँ कनारे ए, जिंयाँ डूगे पाणिए दे बाढ़।
सेयो मेरे चऊँ कनारिये बऊत नेड़े आओईया।
18 तैं दोस्त ओर पाई-बन्दुआ दुँईं ते आऊँ दूर करी राखेया;
एबे न्हेरा ई मेरा साथी ए।