पजन 45

राजे रिया तँईं ब्याओ रा गीत

बजाणे वाल़े परदानो रिया तँईं शोशन्नीम रागो रे कोरह वंशिया रा मश्कील। प्यारो रा गीत

1 जिंयाँ मैं राजे रिया तँईं नवां गाणा त्यार करी राखेया, मेरा दिल शब्दा ते परी रा।

एक अच्छे लेखको रिया कलमा रे जेड़े मेरी जीब एक कविता साथे त्यार ए।

2 तूँ माणूंआ री ल्वादा बीचे बऊत ई सुन्दर ए;

तेरे ओठा ते मिठे बोल निकल़ोए;

इजी रिया तँईं परमेशरे ताखे जुगो-जुगो खे आशीष देई राखी।*45:2 लूक 4:22, इब्रानी 1:3,4

3 ओ वीर राजा! तूँ आपणी तलवारी ऊबे चक, तूँ महान ओर प्रतापी ए,

4 सच्चाई, नम्रता ओर तार्मिकता रिया तँईं आपणे एश्वर्य

ओर प्रतापो पाँदे सफलता साथे सवार ओ;

कऊँकि तूँ तागतबर ए, तां खतरनाक ओर नौखे काम करने।

5 तेरे तीर तो पईने ए, तिना बाणा ते राजे रे दुश्मणा रे दिल बीनी जाणे;

तेरे पैरा पाँदे देशो-देशो रे लोक पड़ने।

6 ओ परमेशर, तेरा सिंहासन जुगो-जुगो तक बणेया रा रणा;

तेरा राजदण्ड न्याय रा राजदण्ड ए।

7 तूँ तार्मिकता साथे प्यार ओर बुरे कामा साथे बैर राखेया।

इजी बजा ते परमेशरे, आ तेरे परमेशरे तूँ तेरे साथिया ते लग करी की

खुशिया रे तेलो साथे तेरा अभिषेक करी राखेया।*45:7 इब्रानी 1:8,9

8 तेरे सारे टाल्ले गन्धरस, अगर ओर तेजपते साथे खुशबूदार ए,

तूँ आथिया रे दाँदा वाल़े मईलो दे तारा वाल़े बाजे रिया बजा ते खुश ऊईरा।

9 तेरिया सम्मानित जवाणसा बीचे राजकुमारिया बीए;

तेरे दाँणे कनारे पटराणी, जो ओपीरो रे कुन्दनो साथे सजी री खड़ी री।

10 ओ राजकुमारी सुण, ओर बचार कर ओर त्यान दे;

आपणे लोका खे ओर आपणे पेऊके खे पूली जा;

11 तेबे राजे तेरे रूपो री चाईणा करनी।

कऊँकि से तो तेरा प्रभु ए,

तूँ तेस सामणे आपणा सिर चूका।

12 सोर प्रदेशो री राजकुमारी बी मिलणे खे आऊणी।

प्रजा रे अमीर लोका ताखे खुश करने री कोशिश करनी।

13 राजकुमारी मईलो रे बऊत ई शोभा देओई,

तेसा रे टाल्लेया पाँदे सूईने साथे कढ़ाई करी राखी।

14 से बूटेदार कढ़ाई कित्ते रे टाल्ले पईनी की राजे गे पऊँचाई जाणी।

जो कुआँरिया तेसा रिया सेलिया ए,

सेयो तेसा पीछे-पीछे चलदिया ऊईया तांगे पऊँचाईया जाणिया।

15 सेयो आनंद ओर खुशिया साथे पऊँचाईया जाणिया,

ओर तिना राजे रे मईलो रे प्रवेश करना।

16 मेरे राजा तेरे बऊत बाल-बच्चे ऊणे, सेयो बी तेड़े ई राजा ऊणे जेड़े तेरा बाओ ओर दादे थे।

तां तिना खे तरतिया दे युगो-युगो रा हाकिम ठराणा।

17 ओर जेथो तक मेरी गल्ल ए, मां एड़ा करना कि तेरे नाओं री चर्चा पीढ़िया ते पीढ़िया तक ऊँदी रणी;

ओर लोका तेरी हमेशा खे तारीफ करनी।