1 ओ यहोवा म्हारे प्रभु! सारिया दुनिया रे लोका खे पता ए!

जो लोक तेरी महिमा करोए से स्वर्गो तक पऊँचोई।

2 तैं आपणे बैरिया री बजा ते बच्चे ओर दूद पींदे बच्चेया रे जरिए आपणी महिमा कराई ए,

ताकि तूँ दुश्मण ओर बदला लणे वाल़ेया खे रोकी की राखे।*

3 जेबे आऊँ सर्गो खे, जो तेरे आथो रा काम ए

ओर चाँद ओर तारे, जो तैं ठराई राखे, देखूँआ;

4 तो तेबे माणूं क्या ए कि तूँ तेसखे याद राखे

ओर आदमी क्या ए कि तूँ तेसरा त्यान राखे?

5 परमेशरे आसे माणूं आपू ते थोड़े ई कम बणाई राखे

ओर तैं आसा खे महिमा ओर इज्जती रा मुकट पन्याई राखेया।

6 तैं आसा खे आपणे जरिये बणाई रिया सारिया चीजा पाँदे राज करने खे अनुमति देई राखी। ओर तैं आपणी सारी सृष्टि म्हारे अक्को दे करी ती री।*

7 सब पेडा-बाकरिया, गाय-बल़द

ओर जितणे बणो रे डांगर ए,

8 सर्गो रे पंछी ओर समुद्रो रिया मछलिया

ओर जितणे जीव-जंतु समुद्रो रे चलो-फिरोए।

9 ओ परमेशर! ओ म्हारे प्रभु!

तेरा नाओं सारी तरतिया पाँदे बऊत ई महान् ए।