पजन 4

परमेशरो पाँदे परोसा

बजाणे वाल़े रे परदानो रिया तँईं : तारा वाल़े बाजेया साथे। दाऊदो रा पजन

1 ओ मेरी रक्षा करने वाल़े तर्मी परमेशर! जेबे आऊँ ताखे आका पाऊँ तेबे तूँ माखे उत्तर देया;

जेबे आऊँ परेशानिया रे पड़ेया रा था तेबे तैं मेरी मताद कित्ती।

एबे मां पाँदे दया कर ओर मेरी प्रार्थना सुणी लओ।

2 ओ माणूंओ! कदुओ तक मेरी महिमा रे बदले बेज्जती ऊँदा रणा?

तुसा कदुओ तक चूठे देवतेया साथे प्यार राखणा ओर चूठी योजना री टोल़ा रे रणा? सेला

3 ये जाणी लओ कि प्रभुए तर्मी दास आपणियां खातर लग करी राखे।

जेबे मां प्रभुए खे आक पाणी तेबे तेस सुणी लणी।

4 जेबे तुसा खे गुस्सा आओआ तो तुसा रा गुस्सा तुसा खे आपणे वशो दे नि करो, ओर से तुसा ते पाप नि करवाओ।

जेबे तुसे आपणे बिस्तरे पाँदे लेटोए, तो चुपचाप ऊई की आपू खे परखो कि तुसे क्या सोचोए।

5 यहोवे खे ठीक बलिदान चढ़ाओ

ओर तेस पाँदे ई परोसा करेया करो।

6 कई माणूं एड़ा बोलोए, "काश! आसे पलाईया खे देखी सकदे।

ओ प्रभु, तूँ आसा खे दया रिया नजरा ते देख!"

7 तैं मेरे मनो रे तेसते केथी जादा खुशी परी ती री,

जो तिना खे नज्ज ओर जादा अंगूरा रे रसो री बढ़ोतरिया ते ओई।

8 मां शान्तिया दे लेटी जाणा ओर निश्चे री नींजा दे सुती जाणा;

कऊँकि ओ प्रभु, तूँई माखे निश्चिंत रणे देओआ।