1 तेबे नामात जगा रे रणे वाल़े सोपरे अय्यूबो खे बोलेया,

2 दोस्त, तैं आपणी बेगुनाईया रे पक्षो दे बऊत सारिया गल्ला बोली राखिया, क्या तिना रा ज्वाब नि देणा चाईयो?

क्या बकवास करने वाल़ा माणूं निर्दोष मानणा चाईयो?

3 क्या तेरी बकवास सुणी की लोका खे चुप रणा चाईयो?

ओर जेबे तूँ परमेशरो रे न्याय रा मजाक ऊड़ाएया, तो क्या लोक ताखे शर्मिंदा नि करो?

4 तूँ तो ये बोलेया, "मेरे बचार शुद्ध ए

ओर आऊँ परमेशरो रिया नजरा दे पवित्र ए।"

5 पर खरा ऊँदा जे परमेशर आपू तां साथे गल्ला करदा

ओर ताखे मूँ खोली की ज्वाब देंदा

6 ओर तां पाँदे अक्लमंदिया रिया गुप्त गल्ला प्रकट करो।

बुद्धिया रिया गल्ला माणूंआ रिया समजा ते पोरे ए।

सुण, परमेशरे ताखे इतणी सजा नि दित्ती दी जितणी ताखे मिलणी चाईयो थी

7 क्या तूँ परमेशरो रे गईरे पेतो रे बारे दे जाणी सकेया?

क्या तूँ इजी जोगा अया कि सर्वशक्तिमान परमेशरो री सोच पुरिया तरअ ते जाणी सको?

8 परमेशरो रा दाईरा सर्गो ते ऊच्चा ए, तूँ क्या करी सकेया?

से अधलोको ते गईरा ए, क्या तूँ ये समजी सकेया?

9 परमेशरो री महानता तरतिया ते बी चौड़ी ए;

समुद्रो ते बी बड़ी ए।

10 जे परमेशर तुसा खे कैद करो

ओर आपू मकदमा चलाओ, तो तेसखे कुण रोकी सकोआ?

11 से जाणोआ कि चूठा कुणा

ओर से तिना रे पापा खे आपू देखोआ।

12 जिंयाँ बणो रा गह्दा माणूंआ रे बच्चे खे नि पैदा करी सकदा

तिंयाँ ई मूर्ख माणूं अक्लमंद नि ऊई सकोआ।

13 अय्यूब, तूँ आपणे दिलो खे बदल,

आथ फैलाई कि परमेशरो गे प्रार्थना कर,

14 बुरे काम करना बन्द कर।

आपणे कअरो रे लोका खे बुरे काम नि करने दे

15 जे एड़ा करोगे तो तुसे बदनाम नि ऊणे,

तुसे मजबूत ओर बिना डरे ऊणे।

16 तेबे तूँ आपणा दु:ख पूली जाणा,

जिंयाँ पाणी बह्यी की चलदा जाओआ तिंयाँ ई तां दु:खो री याद बी पूली जाणी।

17 तेरी जिन्दगी त्याड़िया रे प्रयासे ते बी जादा चमकीली ऊणी

ओर चाए न्हेरा बी ओ, तेबे बी से प्यागा रे प्रयासे जेड़ा ऊई जाणा।

18 ओर ताखे उम्मीद ऊणी, इजी बजा ते तूँ बिना डरे रणा

ओर आपणे चऊँ कनारे देखी-देखी की तूँ बिना डरे ऊई की राम करी सकेया।

19 ओर जेबे तूँ लेटणा, तेबे ताखे कोई नि डराई सकदा;

ओर बऊत जणेया ताखे खुश करने री कोशिश करनी।

20 पर जो बुरे लोक ए सेयो अन्दे ऊई जाणे

ओर आपणी बाट पूली जाणे।

तिना रे बचणे री उम्मीद मौत ई ए!