1 अय्यूबो रे तिंऊँ दोस्ते जेबे ये देखेया कि अय्यूब आपणी नजरा रे निर्दोष ए, तेबे तिने तेसते तर्क-वितर्क करना छाडीता ओर सेयो चुप ऊईगे। 2 तिना साथे एलीहू नाओं रा एक नौजवान था। तेसरे बाओ रा नाओं बारकेल था, एलीहू जो रामो रे कुलो रा था, तेसखे गुस्सा आया ओर तेसरा गुस्सा अय्यूबो पाँदे इजी खे पड़केया कऊँकि अय्यूबे आपणे दु:खो रिया तँईं परमेशरो खे दोषी ओर आपू खे निर्दोष ठराया। 3 से अय्यूबो रे तीनो दोस्ता ते बी नराज था। सेयो अय्यूबो खे कोई सई ज्वाब नि देई सके, ओर सेयो तेसखे ई दोषी ठराणे लगी रे थे। 4 एलीहू तिना ते उम्रा रे छोटा था, इजी खे से चुप रया ओर अय्यूबो खे ज्वाब देणे रा इन्तजार करदा रया। 5 पर जेबे एलीहूए देखेया कि अय्यूबो रे यो तीनो दोस्त तेसखे कोई ज्वाब नि देणे लगी रे, तेबे तेसरा गुस्सा पड़की गा। 6 तेबे बूजी वंशो रे बारकेलो रे पाऊ एलीहूए अय्यूबो रे दोस्ता खे ये बोलेया,

"आऊँ तो जवान ए ओर तुसे उम्रा रे मांते बऊत बड़े ए,

इजी बजा ते आऊँ रूकेया रा रया ओर आपणा बचार तुसा खे बताणे ते डरूँ था।"

7 आऊँ सोचूँ था, "जो उम्रा रे बड़े ए पईले तिना खेई बोलणे देऊँ;

ओर जो बऊत स्याणे ए, सेयो ई अक्ला रिया गल्ला सखाओ।"

8 पर ये सर्वशक्तिमान परमेशरो री आत्मा ए

जो आसा गे आओई ओर आसा खे समज देओई।

9 बडिया उम्रा रेई माणूं अक्लमंद नि ऊँदे

ओर न्याय खे समजणे वाल़े स्याणे ई नि ऊँदे।

10 इजी री खातर आऊँ बोलूँआ, "मेरी गल्ल बी सुणो,

इजी रे बारे माखे बी आपणे बचार राखणे देओ।"

11 आऊँ तो तुसा रिया गल्ला सुणने खे रूकेया रा रया,

आऊँ तुसा री अक्लमंदिया रे तर्क सुणदा रया;

जबकि तुसे बोलणे खे शब्द टोल़दे रये।

12 आऊँ तुसा रिया गल्ला त्यानो साथे सुणदा रया,

पर किने बी अय्यूबो रे पक्षो रा खण्डन नि कित्तेया

ओर ना तेसरिया गल्ला रा जबाव दित्तेया।

13 ये मत बोलो कि, "आसे समजदार ए",

ओर ये कि "माणूं नि, परमेशरो अय्यूब समजयाणा कि से गल़त कऊँ ए।"

14 अय्यूब तुसा खे बोलणे लगी रा था, मांते नि।

पर मां तेसरे सवाला रा ज्वाब तिंयाँ नि देणा जिंयाँ तुसे तीऊँ जणेया दित्तेया था।

15 तुसे तीनो दु:खी ए कऊँकि तुसे अय्यूबो खे ये नि समजयाई सके कि से गल़त था,

इजी बजा ते तुसे तेसते ओर नि बोलणे लगी रे

16 पर इजी रिया तँईं कि तुसे लोक नि बोलणे लगी रे, मां पक्का फेर चुप नि रणा;

तुसे बस तेथी खड़े रओए ओर कोई ज्वाब नि देंदे

17 पर एबे मां बी अय्यूबो खे कुछ बोलणा,

मां बी आपणे बचार बताणे।

18 कऊँकि मेरे मनो दे बी गल्ला परिया रिया ए,

ओर मेरी आत्मा माखे पीतरा ते उकसाणे लगी री।

19 मेरा मन तेस अंगूरा रे रसो जेड़ा ए, जो केसी पांडे रे बन्द पड़ी रा

ओर जो बारे छलखणे रिया तँईं त्यार ए, से नवें अंगूरा रे रसो री कुप्पिया जेड़ा फटणे वाल़ा ए।

20 मां दिलो दे शान्ति पाणे रिया तँईं बोलणा;

मां मूँ खोली की अय्यूबो खे ज्वाब देणा।

21 ना मां केसी माणूंए रा पक्ष लणा

ओर ना ई मां केसी माणूंए खे चलाकी करने री पदवी देणी।

22 कऊँकि माखे तो चलाकी करनी नि आऊँदी,

नयी तो माखे बनाणे वाल़े परमेशरो मेरा पला बीचे ई अन्त करी देणा।