1 मेरे प्राण निकल़ने वाल़े ए, मेरिया जिन्दगिया रे दिन पूरे ऊई चुके रे

ओर मेरिया तँईं कब्र त्यार ए।

2 पक्का जो मां साथे ए सेयो मजाक करने वाल़े ए

ओर तिना रा बगावत करना माखे लगातार दिशदा रओआ।

3 ओ परमेशर! मेरी जमानत दे, मां ओर तां बीचे तूँई जमानतदार ए;

तांते अलावा ओर कुण माणूं मेरी जमानत देई सकोआ।

4 तैं जो करी राखेया ए तिजी रिया बजा ते मेरेया दोस्ता मेरी नि सुणनी।

पर आऊँ नि चाँदा कि सेयो समजो कि सेयो सई थे।

5 जो कोई माणूं आपणे दोस्ता री तअन-दौलता रे लाल़चो रे चूगली करोआ,

तिना रे बच्चे अन्दे ऊई जाणे।

6 परमेशरो रिया बजा ते आऊँ लोका बीचे आसिया जोगा बणीगा

ओर लोक माखे तुच्छ जाणी की मेरे मुंए पाँदे थूकोए।

7 दु:खो रिया बजा ते मेरिया आखी तुँदल़िया ऊई गी रिया

ओर मेरे सारे अंग छांयी जेड़े पतल़े ऊईगे रे।

8 जो सीदे ओर बेकसुर लोक ए; सेयो बी माखे देखी की एरान ऊई जाओए!

फेर सेयो बी माखे पापी माणूं बोलोए!

9 तेबे बी तार्मिक माणूं आपणियां बाटा रे चलदे रणे

ओर साफ काम करने वाल़ेया खे सामर्था पाँदे सामर्थ मिलदी रणी।

10 पर तुसे सारे के सारे मांगे आओ तो आओ,

पर तुसा बीचे एक बी माणूं मेरिया नजरा दे अक्लमंद नि मिलणा।

11 मेरे दिन तो पूरे ऊईगे रे ओर मेरिया इच्छा खत्म ऊईगिया

ओर जो इच्छा मेरे मनो रे थिया, सेयो सब नाश ऊईगिया।

12 मेरे दोस्त राती खे दिन बोलोए;

सेयो बोलोए कि ये लगभग प्याग ए। पर माखे पता ए कि एबु बी न्हेरा ई ए।

13 मेरी एक ई उम्मीद मरेया दे लोका री दुनिया ए,

जेती मां न्हेरे दे सऊणे खे लेटी जाणा।

14 जे आऊँ कबरा खे ये बोलूँ, "तूँ मेरा बाओ ए,"

ओर कबरा रे कीड़े खे बोलूँ, "तूँ मेरी माये ए ओर मेरी बईण ए,"

15 तो आऊणे वाल़े बखतो रे मेरी उम्मीद केई रयी?

ओर मेरी उम्मीद केसखे दिशणी?

16 जेबे मां मरे रे लोका रिया दुनिया दे उतरी जाणा

तो उम्मीद मां साथे नि जाणी।