1 तेबे तेमान शईरो रे रणे वाल़े एलीपजे अय्यूबो खे बोलेया,

2 "क्या अक्लमंद माणूंए खे ठीक ए कि से मूर्खता साथे ज्वाब देओ

या आपणा मन गरम अवा साथे परो?"

3 ताखे एड़िया गल्ला नि करनिया चाईयो जेते कि केसी रा फाईदा नि ओ,

या एड़ा शब्द नि बोलणा चाईयो जेते कि केसी रा पला नि ओ।

4 जे तेरिया गल्ला खे मानिए; तो केसी खे बी परमेशरो रा डर नि रणा

ना तेसगे केसी प्रार्थना करनी।

5 तूँ आपणियां गल्ला ते आपणा पाप प्रकट करेया,

जिंयाँ चलाक माणूं बोलोए, तिना जेड़ा तूँ बोलेया।

6 आऊँ नि पर तेरिया गल्ला ई ताखे दोषी ठराओईया;

ओर तेरे ई वचन तेरे खलाफ गवाई देओए।

7 क्या पईला माणूं एते तरतिया पाँदे तूँई पैदा ऊईरा?

क्या तेरा जन्म इना पाह्ड़ा ते बी पईले ऊईरा?

8 क्या तूँ परमेशरो रिया सभा रे बैठी की सुणे था?

क्या अक्ला रा ठेका तैं ई लई राखेया?*

9 तूँ एड़ा क्या जाणेया, जो आसे नि जाणदे?

तांदे एड़ी कुणजी समज ए जो आसा रे नि ए?

10 आसा लोका बीचे तो जाणकार ओर बऊत स्याणे माणूं ए,

जिना री उम्र तेरे बाओ री उम्रा ते बी जादा ए।

11 परमेशरो री शान्ति देणे वाल़िया गल्ला

ओर जो वचन ताखे नरम ए, क्या यो तेरिया नजरा दे कुछ पनिए?

12 तेरा मन परमेशरो ते ताखे खींजी की कऊँ लई जाओआ?

ओर गुस्से साथे तेरिया आखी कऊँ लाल ऊणे लगी रिया?

13 ओर तूँ परमेशरो रे खलाफ आपणा गुस्सा दखाएया,

ओर बेकारो रिया गल्ला बोलेया।

14 कोई बी माणूं ये नि बोली सकदा कि से सदा ईमानदार ए।

ना ई कोई ये बोली सकदा कि तिने कदी गल़त काम नि कित्तेया।

15 देख, परमेशर आपणे स्वर्गदूता पाँदे बी परोसा नि करदा;

से तिना खे बी पुरिया तरआ ते पवित्र नि मानदा।

16 इजी री खातर से सई तरआ ते तिना गंदेया ओर प्रष्ट लोका पाँदे परोसा नि करदा

जो बुरे काम करोए जिंयाँ कि सेयो सानिया दे पाणी पियोए।

17 अय्यूब, सुण जो आऊँ तांते बोलूँगा।

जो कुछ आऊँ जाणूंआ, से मां ताखे बताणा,

18 यो गल्ला मैं अक्लमंद माणूंए ते सिखी राखिया ए,

जो सेयो आपणे बाओ-दादेया ते लई कि सीखदे आई रे, तिने तेतेरा कोई पेत लकोई की नि राखेया।

19 परमेशरे से देश तिना बुजुर्गा खे दित्तेया,

जो सच्चो खे ई समजदार थे; कोई परदेशी तिना खे परमेशरो ते दूर नि लई कि गया।

20 एक दुष्ट माणूंए रा जीवन सुखी नि ऊँदा।

इजी रे बजाये, से जीतणे बी साला तक जिऊँदा रणा, तेसखे पीड़ ई ऊणी।

21 तेसरे कानो रे डराऊणी आवाज गुँजदी रओई

ओर जेबे बखत ठीक चली रओआ तेबे बी नाश करने वाल़ा* तेस पाँदे टूटी की पड़ी जाओआ।

22 तेसखे न्हेरे ते निकल़ने दे तेबे कोई परोसा नि ऊँदा

ओर हर कोई तेसखे काणे री ताका रे रओआ।

23 से रोटिया खे ओरे-पोरे पटकदा रओआ ओर पूछोआ कि रोटी केई मिलणी।

तेसखे महसूस ओआ कि विनाशो रा दिन नेड़े आईगा रा।

24 सेयो बऊत डरे दे ओर उल़जणा दे ए,

जिंयाँ एक डरेया दा राजा युद्धो दे जाणे खे त्यार ए।

25 एड़ा तेबे ओआ जेबे कोई माणूं परमेशरो री आज्ञा खे नि मानदा।

एड़ा माणूं सोचोआ कि से सर्वशक्तिमानो ते जादा जरूरी ए।

26 से तेते तरआ रा माणूं ए जो परमेशरो साथे बईस करने री कोशिश करोआ।

से परमेशरो पाँदे बी अमला करने री कोशिश करोआ।

27 ऊई सकोआ कि तेसगे खाणे खे बऊत सारा खाणा ओ।

ओर से बऊत मोटा ऊई सकोआ।

28 पर से एड़े शईरो दे रणा

जेती कोई ओर नि रंदा।

ओर तेसरा कअर नि ऊणा। कऊँकि लोके तेसरा कअर उजाड़ी ता ऊणा।

29 तेस आपणा पैसा रचाई देणा। ऊई सकोआ कि तेसगे कई कीमती चीजा ओ,

तेस सेयो बी रचाई देणियां।

30 सेयो न्हेरे ते नि बचणे,

ओर परमेशरो रिया आगी री लूपिया तिना रा आऊणे वाल़ा बखत फुकी देणा।

31 से बेकार गल्ला रा परोसा करी की आपू खे तोखा नि देओ,

कऊँकि तिजी रा बदला तोखा ई ऊणा।

32 स्याणा ऊणे ते पईले ई तेसरा जीवन खत्म ऊई जाणा।

तेसरे से कुछ पनि ऊणा जो से करना चाओ था।

33 सेयो एड़िया अंगूरा रिया बेला जेड़े ऊईगे दे जिदे अंगूर पाकणे ते पईले ई थाले छुट्टी जाओए

ओर जैतूनो रे एड़े डाल़ो जेड़े जेते रे फुल फल लगणे ते पईले ई थाले छुट्टी जाओए।

34 अधर्मिया री संगति निष्फल ओई

ओर जो रिश्वत लओए, तिना रे कअर आगी साथे फूखी जाणे।

35 ये सेयो ई ए जो मुसीबता री योजना बणाओए ओर बुराई करोए;

तिना रा मन सदा छलो ते परेया दा रओआ।