अय्यूब 13

1 सुणो, आऊँ ये सब कुछ आपणियां आखी ते देखी चुकेया रा,

ओर आपणे कानो ते सुणी चुकेया रा ओर समजी बी चुकेया रा।

2 जो कुछ तुसे जाणोए, से आऊँ बी जाणूंआ;

आऊँ तुसा लोका ते कुछ कम नि ए।

3 पर मां तो सर्वशक्तिमान परमेशरो तेई गल्ला करनिया

ओर मेरी इच्छा येई ए कि आऊँ आपू परमेशरो साथे बईस करुँ।

4 पर तुसे लोक चूठिया गल्ला बनाणे वाल़े ए;

तुसे सारे के सारे नकम्मे बैद ए।

5 खरा ऊँदा, जे तुसे बिल्कुल चुप रंदे;

ओर चुप रणे देई तुसा री अक्लमंदी ए।

6 एबे तुसे मेरी सुणो कि एबे आऊँ तुसा खे क्या बोलणा चाऊँआ

ओर मेरिया गल्ला पाँदे त्यान देओ।

7 क्या तुसा परमेशरो रिया तँईं चूठिया गल्ला बोलणिया

ओर तेसरे पक्षो दे कपटो साथे बोलणा?

8 क्या तुसा परमेशरो साथे पक्षपातो ते बर्ताव करना

ओर परमेशरो रे खलाफ मकद्दमा लड़ना।

9 क्या ये खरा ऊणा कि से तुसा री छाणबीण करो?

जेड़ा कोई केसी माणूंए खे तोखा देओआ,

तेड़ा ई क्या तुसा परमेशरो खे बी तोखा देणा?

10 जे तुसे चोरी-छिपे पक्षपात करोगे,

तो परमेशरो पक्का तुसे डांटणे।

11 क्या तुसे महान् परमेशरो ते नि डरदे?

क्या तेसरा डर तुसा रे मनो रे नि समांदा?

12 तुसा रे याद राखणे जोगिया समजा रिया गल्ला स्वाई जेड़िया ए;

तुसा रे आपणे आपू खे बचाणे रे बचार माट्टिया रेई ठईरी रे, जो टल़ी जाओई।

13 मां साथे गल्ला करनिया छाडो, ताकि आऊँ बी कुछ बोली सकूँ;

तेबे मां पाँदे जो कुछ पड़ो, से पड़ो।

14 एतेरा नतीजा मेरिया तँईं जेड़ा बी ओ

तेते रा जिम्मेबार आऊँ आपू आ।

15 पले ई परमेशर माखे काई देयो, फेर बी मां तेस पाँदे ई परोसा करना।

पर मां तेसखे बजा बताणी कि तेस आऊँ कऊँ नि मारना चाईयो।

16 ये बी मेरे बचणे री बजा ऊणी कि जो माणूं पखण्ड करोआ,

से परमेशरो रे सामणे नि जाई सकदा।

17 मन लगाई की मेरी गल्ल सुणो

ओर मेरी बिनती तुसा रे कानो रे पड़ो।

18 देखो, मैं आपणे मकद्दमे री पूरी त्यारी करी राखी,

माखे निश्चा ए कि आऊँ निर्दोष ठईरना।

19 एड़ा कुण ए जो मां साथे मकद्दमा लड़ी सकोआ?

जे एड़ा कोई अया तो मां चुपचाप आपणे प्राण छाडी देणे।

20 ओ परमेशर, सिर्फ दो गल्ला मेरिया मानी लओ;

तेबे मां तांते नि लूकणा।

21 तूँ आपणी ताड़ना मांते दूर कर

ओर आपणे डरो ते माखे नि डरा।

22 ओ परमेशर, तूँ मांते पूछ ओर आऊँ तिजी रा ज्वाब देऊँ,

या मांते पूछणे दे ओर तूँ तिजी रा उतर देया।

23 मांते कितणे सारे बुरे काम ओर पाप ऊई रे?

मेरे पाप ओर मेरे पाप मांगे बताई दे।

24 तूँ आपणा मूँ मांते कऊँ फेरी लएया

ओर तूँ माखे आपणा दुश्मण कऊँ मानेया?

25 आऊँ तो तेस पत्ते जेड़ा ए जो अवा साथे उडाया जाओआ। तूँ माखे डराणे री कोशिश कऊँ करेया? तूँ माखे कष्ट कऊँ देया?

ओर क्या तां सूके रे डंठल़ो पीछे पड़ना?

26 तूँ मां पाँदे बुरे दोष लगाएया,

एथो तक कि जेबे आऊँ जवान था तेबे मैं जो पाप कित्ते तिना रिया तँईं बी।

27 ओर तूँ मेरे पैरा दे काठो रिया बेड़िया पन्याएआ

ओर मेरा सारा चाल-चलण देखदा रया

ओर तूँ मेरे पैरा रे चऊँ कनारे बाड़ा लगाई देआ।

28 नतीजा ए आ कि आऊँ सड़िया-गल़िया लकड़िया जेड़ा

ओर कीड़े रे खाए दे टाल्लेया जेड़ा नाश ऊणे लगी रा।