1 तेबे एलीहू ईंयाँ ओर बी बोलदा गया,

2 ओ अय्यूब, तेरा ये बोलणा सई नि,

कि तूँ परमेशरो रिया नजरा दे तर्मी ए,

3 ओर तूँ परमेशरो ते पूछेया,

"पाप ना करने ते माखे क्या फाईदा ऊआ ए?"

4 आऊँ ताखे बी ओर तेरे साथिया खे बी कट्ठे ज्वाब देऊँआ।

5 अय्यूब, सर्गो रिया तरफा खे नजर करी की देख

ओर सर्गो खे ताकदा रओ, जो तांते ऊच्चा ए।

6 जे तैं पाप करी राखेया तो परमेशरो रा क्या बिगड़ोआ?

जे तेरे पाप बऊत जादा ई बढ़ी जाओ, तेबे बी तूँ तेस साथे क्या करेया?

7 जे तूँ तर्मी ए तो तेसखे क्या देया

या तेसखे तांते क्या मिलोआ?

8 तेरी दुष्टता रा नतीजा तां जेड़े माणूंए खे ए

ओर तेरे तर्मो रा फल बी माणूंआ खे ईए।

9 जेबे लोका पाँदे अत्याचार ओआ,

तो सेयो चिंगोए

10 तेबे बी कोई ईंयाँ नि बोलदा, माखे बनाणे वाल़ा परमेशर केई ए,

जो राती बी गीत गवाओआ

11 ओर आसा खे तरतिया रे डांगरा ते जादा

ओर सर्गो रे पंछिया ते जादा समज देओआ?

12 सेयो दुहाई देओए पर परमेशर ज्वाब नि देंदा,

ये बुरे लोका रे कमण्डो रिया बजा ते ओआ।

13 तिना री बिनती करना बेकार ए;

सर्वशक्तिमान परमेशर तिना खे ना तो देखोआ ओर ना ई सुणोआ।

14 अय्यूब, तूँ बोलेया कि तूँ परमेशरो खे नि देखी सकदा;

पर ईम्मत राख ओर इन्तजार कर, तेरा मकद्दमा तेसरे सामणे ए।

15 तुसे सोचोए कि परमेशर सजा नि देंदा,

कि से पापो पाँदे थोड़ा ई त्यान देओआ।

16 इजी बजा ते, अय्यूब, तूँ नि जाणदा कि तूँ क्या बोलेया। ओर जो शब्द तूँ बोलेया तेतेरा कोई मतलब नि आ।