अय्यूब 28

अक्ला रिया तारीफा दे

1 ये सच्च ए कि चाँदिए रिया खानी ओईया

ओर सूईने खे शुद्ध करने रिया तँईं बी एक जगा ओई।

2 लोआ माट्टिया ते निकयाल़ेया जाओआ

ओर तांबा कच्ची धातुआ खे शुद्ध करने ते मिलोआ।

3 माणूं दिऊए साथे न्हेरे खे दूर करी की,

दूरो-दूरो तक जमीना रे पीतरे खणी-खणी की,

अन्दकूप न्हेरे दे कच्ची धातु टोल़ोए।

4 सेयो बऊत गईरा गड्डा खणोए जो गाँवो या शईरा ते बऊत दूर ए।

सेयो कल्ले ई काम करोए।

ओर सेयो तेस गड्डे दे थाले उतरने दे मताद करने रिया तँईं मजबूत रस्सिया पाँदे लटकदे रओए।

5 आसे आपणा खाणा डोरूआ दे पैदा करूँए।

पर जमीना ते थाले आग ए।

6 तरतिया रे पात्थरा ते नीलमणि मिलोई;

ओर तेसी जगा दे सूईना बी मिलोआ।

7 इना खानी खे खणने वाल़ेया री बाट कोई मास खाणे वाल़ा पंछी जेड़ा बाज बी नि जाणदा;

ना तिना पाँदे ईला उडोईया।

8 तिना खानी पाँदे जंगल़ी डांगरे पैर नि राखेया

ओर कोई शेर बी तीसिए कदी नि गया।

9 माणूं सबी ते सख्त चट्टानी खे खणोए,

तिना रिया थालिया ते पाह्ड़ा खे खणोए।

10 से चट्टानी तोड़ी की तिना बिछिए बाटा बणाओआ;

ओर तेबे तेसखे हर एक कीमती चीजा दिशोईया!

11 सेयो नदिया रिया सूबल़ा खे खणोए

ओर जो छिपेया दा ए तेस प्रयासे दे ल्याओए।

12 पर समज केई मिली सकोई?

ओर समजा री जगा केई ए?

13 समज एते दुनिया दे आसा माणूंआ बीचे नि मिलदी

ओर ना केसी खे तिजी री असली कीमता रा पता ए।

14 महासागर बोलोआ, से माँदे नि ए,

ओर समुद्र बी बोलोआ, से मांगे पनि ए।

15 से शुद्ध सूईने साथे बी खरीदी नि जांदी

ओर ना तिजी खे खरीदणे खे चाँदी तोलेया जाओआ।

16 ना तो तिजी साथे ओपीर देशो रे सूईने री बराबरी ऊई सकोई

ओर ना ई कीमती सुलैमानी पात्थर ओर नीलमणिया री।

17 ना सूईना, ना काँच तिजी री बराबरी करी सकोआ,

से कुन्दनो रे गईणेया रे बदले पनि मिलणी।*28:17 नसी 8:10

18 मूंगा ओर स्फटिक मणि तिजी रे आगे कुछ पनिए!

अक्ला री कीमत माणिको ते बी जादा ए।

19 कूश देशो रा पुखराज बी तिजी री बराबरी नि करी सकदा;

ओर तिजी साथे शुद्ध कुन्दनो री बराबरी ऊई सकोई।*28:19 नसी 8:19

20 तेबे समज केई मिली सकोई? ओर समजा री जगा केईए?

21 से सारे प्राणिया रिया आखी ते लूकी रिये;

ओर सर्गो रे पंछिया खे पनि दिखदी।

22 विनाश ओर मौत बोलोई,

"आसे तिजी रे बारे सुणी राखेया।"*28:22 प्रकाशित 9:11

23 सिर्फ परमेशर ई समजा री बाट समजोआ

ओर से तिजी री जगा बी जाणोआ।

24 परमेशर तो तरतिया*28:24 समुद्र ओर बड़ा समुद्र रे कूणे तक देखदा रओआ

ओर से सर्गो रे निठे सब कुछ देखी सकोआ।*28:24 पजन 11:4

25 परमेशरे अवा री शक्तिया रा फैंसला कित्तेया।

ओर तिने समुद्रो रे आकारो रा बी फैंसला कित्तेया।

26 परमेशर बर्खा खे बताओआ कि केई पड़ना चाईयो।

ओर से आज्ञा देओआ कि पऊण-चूखाना केई जाणा चाईयो।

27 तेबे तिने समजा खे देखी की तिजी रे बारे दे बी बताया

ओर तिजी खे सिद्ध करी की तिजी रा पूरा पेत जाणी ला।

28 तेबे परमेशरे माणूंए खे बोलेया,

"देख, मां प्रभुए रा डर मानणा येई अक्ल ए

ओर बुराईया ते दूर रणा येई समज ए।"*28:28 बिध. 4:6