अय्यूब 8

बिल्ददो रा तर्क

1 फेर शूआ जगा रे बिल्ददे अय्यूबो ते गल्ला कित्तिया। तिने बोलेया,

2 "तां कदुओ तक एड़िया-एड़िया गल्ला करदे रणा?

ओर तेरे मुंए रिया गल्ला एड़िया लगोईया मानो बड़ी पारी अवा चलणे लगी री?

3 क्या परमेशर अन्याय करोआ?

क्या सर्वशक्तिमान परमेशर तार्मिकता खे उल्टा करोआ?"

4 तेरे बच्चेया जरूर कोई पाप करी राखेया ऊगा,

तेबेई परमेशरे तिना खे सजा दित्ती, जो तिना खे मिली थी।

5 पर ताखे सर्वशक्तिमान परमेशरो ते प्रार्थना करनी चाईयो,

ओर तेसखे आपणी मताद करने खे बोलणा चाईयो।

6 जे तूँ इमानदार ओर तर्मी ए,

तो परमेशर तेरी मताद करने खे आऊणा,

तेबे तेस तूँ बचाई लणा ओर तेरी तार्मिकता रा टब्बर फेर जेड़ा का तेड़ा ई ऊई जाणा।

7 तुसे बऊत अमीर ऊणे।

परमेशरो तुसा खे पईले ते केथी जादा तअन देणा।

8 अय्यूब, पिछलिया पीढ़िया रे लोका ते तो पूछ

ओर जो कुछ तिना रे बुजुर्गे खोजबीण कित्ती, तिजी पाँदे त्यान दे।

9 आसा रा जीवन छोटा ए, आसे कुछ पनि जाणदे;

आसे तरतिया पाँदे छांयी जेड़े टल़दे जाऊँए।

10 क्या तेरे बुजुर्गा ताखे शिक्षा नि देणी? ताखे नि सखाणा?

जरूर तिना दिलो ते ताखे शिक्षा देणी।

11 क्या नदिया रे कनारे रा काआ बिना पाणिए ते बढ़ी सकोआ?

क्या नंगल़ बिना पाणिए ते बढ़ोआ?

12 चाए से अरी ओ ओर बाडी पनि राखी ओ,

तेबे बी से ओर सब प्रकारा रे काओ ते

पईले सूकी जाओई।

13 परमेशरो खे पूलणे वाल़ेया री दशा बी एड़ी ई ओई

ओर जो परमेशरो री पग्ती नि करदे तिना री उम्मीद टूटी जाओई।

14 तेसरी उम्मीदा री जड़ कटी जाओई

ओर जेस पाँदे से परोसा राखोआ, से गल़ाऊए रे जाल़ेया जेड़ा कमजोर ओआ।

15 चाए से आपणे कअरो पाँदे परोसा राखो, पर तेसरा कअर टल़ी जाणा;

तेस से मजबूतिया साथे पकड़ना, पर से टिकेया रा नि रणा।

16 दुष्ट माणूं तेस पौधे जेड़ा ए जो तूपा दे अरा-परा ऊई जाओआ

ओर तिजी रिया डाल़िया बगीचे रे चऊँ कनारे फैली जाओईया।

17 तेतेरी जड़ पात्थरा रे टेरा बीचे कूसी री रओई

ओर से पात्थरा बीचे बढ़दा जाओआ।

18 पर जेबे तिना डाल़ा खे तेथा ते पटी की बारे सेटी देओए;

तेबे केसी खे ये पता पनि चलदा कि तेती एड़ा कुछ लगी रा था।

19 आ, बुरेया लोका गे बस इतणा ई आनन्द ए;

एबे दूजे आई कि तिना री जगा लई लओए।

20 पर निर्दोष माणूंआ खे परमेशर ईंयाँ कल्ले नि छाडदा

ओर ना से तिना खे छाडी की दुष्ट माणूंआ री मताद करोआ।

21 तेस तूँ खुशिया साथे परी देणा

ओर तांते जयजयकार कराणी।

22 जो लोक तांते कृणा करोए, तिना आपू शरमा रे मारे मूँ लकोई कि फिरना;

ओर दुष्ट माणूंआ रा नाओं-नशाण ई मिटी जाणा।