1 फेर अय्यूबे दूजी बार ज्वाब देंदे ऊए बोलेया,

2 "आज आऊँ कड़वाहटा ते परी की शकाईत करूँआ,

कऊँकि परमेशरे मां साथे बुरा बर्ताव कित्तेया ओर आऊँ दु:खी कित्तेया ए।"

3 काश! आऊँ जाणी सकदा कि परमेशर माखे केई मिली सकोआ,

तेबे मां तेसरे सिंहासणो रे नेड़े जाणा!

4 मां तेस सामणे आपणा मकद्दमा पेश करना था

ओर आपणियां बेगुनाईया रे बऊत सारे सबूत देंदा।

5 आऊँ जाणी लंदा कि तेस माखे क्या ज्वाब देणा

ओर जो कुछ तेस माखे बोलणा था, मां से समजी लणा था।

6 क्या तेस आपणी बड़ी सामर्थ दखाई की मां साथे मकद्दमा लड़ना?

ना, बल्कि तेस मां पाँदे त्यान देणा।

7 ईमानदार माणूं तेस साथे बईस करी सकोए

ओर ईंयाँ आऊँ आपणे न्याय करने वाल़े परमेशरो रे आथो ते सदा खे निर्दोष सिद्ध ऊई जाणा।

8 देखो, आऊँ पूर्वो रिया तरफा खे जाऊँआ, पर से तेती नि मिलदा,

आऊँ पच्छमा रिया तरफा खे जाऊँआ, पर से माखे तेती नि दिशदा;

9 आऊँ उत्तर दिशा रिया तरफा खे गया ओर आऊँ दखणा दे गया,

पर मैं परमेशर केथी नि देखेया।

10 पर से जाणोआ कि मेरा चाल-चलण केड़ा ए;

ओर जेबे तेस आऊँ परखणा, तेबे आऊँ खरे सूईने जेड़ा निकल़ना।*

11 मेरे पैर तेसरिया बाटा दे बणे रे रए

ओर आऊँ बिना पटके तेसरिया बाटा रेई चलदा रया।

12 आऊँ हमेशा सेई करूँआ जो परमेशर माखे आज्ञा देओआ;

आऊँ तेसरिया इच्छा रा पाल़न करूँआ, आपणियां इच्छा रा नि

13 से कदी नि बदलदा। से जो करना चाओआ

तेस करने ते कोई तेसरा बरोद या रोकी नि सकदा ए।

14 जो कुछ तिने मेरे बारे दे नियम सोची राखेया,

से तेस पूरा बी करना;

ओर तेसरे दिलो दे एड़िया-एड़िया कई गल्ला ए।

15 इजी बजा ते आऊँ तेस सामणे कबराई जाऊँआ;

जेबे आऊँ सोचूँआ, तेबे आऊँ तेसते डरी जाऊँआ।

16 कऊँकि मेरा दिल परमेशरे ई कमजोर करिता रा

ओर सर्वशक्तिमान परमेशरे ई आऊँ डराई ता रा।

17 एड़ा लगोआ जेड़ा मेरे सामणे सिर्फ कणा न्हेरा ए,

पर आऊँ परमेशरो ते डरूँआ, न्हेरे ते नि।