अय्यूब 10

अय्यूबो री परमेशरो ते बिनती

1 आऊँ जिन्दगिया ते थकी गा दा ए!

ओर आपणी गईरी निराशा ते,

आऊँ परमेशर तांते शकाईत करूँआ!

2 मां परमेशरो खे बोलणा, माखे दोषी नि ठरा;

माखे बता कि तूँ किजी बजा ते मां साथे मकद्दमा लड़ने लगी रा?

3 क्या तुसा रा इतणा गुस्से ऊणा सई आ?

जो कुछ तैं आपू बणाई राखेया तीजी री बेजती करने रिया तँईं?

ओर फेर दुष्टा रिया योजना पाँदे खुश ऊणे रिया तँईं?

4 क्या तेरिया आखी माणूंए जेड़िया ए?

क्या तूँ माणूंए जेड़ा देखेया?

5 क्या तेरे दिन माणूंए रे दिना जेड़े कम ए

या तेरे साल मर्दो रे बखतो जेड़े ए,

6 कि तूँ मेरे पापो री खोजबीण करोआ

ओर मेरी बुराई पूछेया?

7 फेर तुसे मेरे सारेया पापा रा

ओर मेरे सबी दोषा रा पता कऊँ लगाओए?

8 तैं आऊँ आपणे आथो साथे बणाई राखेया

ओर तेबे बी तूँ माखे नाश करने लगी रा।

9 याद कर कि तैं आऊँ गूँदी री माट्टिया ते बणाया,

क्या तां आऊँ फेर तूड़ा रे मलाई देणा?

10 तैं आऊँ दूदो जेड़ा लटी की

ओर दंईए जेड़ा जमाई की नि बणाया।

11 तेबे तैं मां पाँदे चामड़ी ओर मास चढ़ाया

ओर आड्डिया ओर नसा गूँदी की आऊँ बणाया।

12 तैं माखे जिन्दगी दित्ती ओर मां पाँदे करूणा कित्ती

ओर तेरिया निगरानिया दे मेरे प्राणो री रक्षा ऊई।

13 पर एबे आऊँ तेरेया पेता खे जाणूंआ कि

तैं पईले ते ई सोची की राखेया था कि तां माखे दु:ख देणा।

14 तुसे देखणे लगी रे थे कि क्या मां पाप करना,

ताकि तूँ माखे माफ करने ते ना करी सके

15 जिंयाँ ई आऊँ पाप करूँआ, माखे तेरे जरिये सजा दित्ती जाओई,

पर जेबे आऊँ सई करूँआ, तो माखे कोई शाबाशी नि मिलदी।

आऊँ दु:खी आ ओर शर्मा रे मारे लूकी रा।

16 चाए माखे कोई बी कामयाबी मिलो, तो तूँ मेरा शेरो जेड़ा शकार करेया;

ओर माखे दु:ख देणे रिया तँईं चमत्कार बी करोए।

17 तूँ मेरे खलाफ आपणे नये-नये गवाह् ल्याएआ

ओर मां पाँदे आपणा गुस्सा बढ़ाएया

ओर मां पाँदे बिपदा री सेना अमला करोई।

18 कऊँ, परमेशर, तैं आऊँ पैदा ऊणे दित्तेया?

माखे केसी ओरी रे देखणे ते पईले ई मरी जाणा चाईयो था।

19 मेरा ऊणा ना ऊणे रे बराबर ऊँदा

ओर पेटो तेई सीदा कब्रा रे पऊँचणा था।

20 मेरे जीवनो रे एबे थोड़े ई दिन रईगे रे, माखे कल्ले जे रणे देयो,

ताकि जो बखत मांगे अया तिदे माखे कुछ शान्ति मिलो।

21 आऊँ छोड़ ई मरने वाल़ा ए, मरने ते पईले खुश रणा चाऊँआ।

फेर मां एड़िया जगा जाणा जेथा ते आऊँ वापस नि आई सकदा।

22 मां एकी न्हेरिया जगा दे जाणा

जेती सिर्फ न्हेरा ई आ।

तेते जगा दे दिने बी आदिया राती जेड़ा न्हेरा ओआ।