1 एड़े तूफानो रे बारे दे सोची की ई

माखे बऊत डर लगणा शुरू ऊई जाओआ।

2 तुसे सब परमेशरो रे शब्द सुणो,

जो गिड़ने रिया तरआ आवाज करोए।

3 से सारे सर्गो दे गिड़ने री आवाज सुणाओआ,

ओर से प्रयासे खे तरतिया पाँदे सबी ते दूरो रे रिया जगा दे चमकणे री बजा बणोआ।

4 इजी ते बाद गिड़ने री आवाज ओई,

से आपणी शक्तिशाली आवाजा ते गिड़ोआ

ओर जेबे तेसरे गिड़ने री आवाज सुणोई, तेबे बिजल़ी लगातार चमकणे लगोई।

5 परमेशर आपणे गरजणे री आवाज नौखे तरीके ते सुणाओआ

ओर बड़े-बड़े काम करोआ, जिना खे आसे नि समजी सकदे।

6 से बर्फा खे बोलोआ कि तरतिया पाँदे पड़ी जा

ओर ईंयाँ ई बरखा खे बी

ओर बड़ी पारी बरखा खे बी तरतिया पाँदे बरसणे री आज्ञा देओआ।

7 ओर जेबे परमेशर एड़ा करोआ, तो से लोका खे आपणे-आपणे काम करने ते रोकोआ,

ताकि सब लोक जाणी लओ कि तिने ई एड़ा करी राखेया

8 तेबे बणो रे डांगर आपणी-आपणी गुफा रे चली जाओए

ओर जदुए तक बरखा रूकदी नि, तदुए तक तेथी रओए।

9 दक्खणी दिशा ते पऊण-चूखाना आओआ

ओर उत्तर दिशा ते ठण्डी अवा आओईया।

10 परमेशरो रे साओ रिया फूकरा ते बर्फ पड़ोई,

तेबे झीला रा पाणी बी जम्मी जाओआ।

11 तेबे से काल़े बादल़ा खे प्वाफो साथे परोआ;

ओर आपणी बिजल़िया रे प्रयासे ते परेया रा बादल़ दूरो तक फैलाई देओआ।

12 सेयो बादल़ परमेशरो री बसाई रिया तरतिया पाँदे

परमेशरो री समजा रे मुताबिक

तेसरी दित्ती री आज्ञा खे मानदे ऊए ओरे-पोरे फिरोए।

13 कदी-कदी परमेशर आसा खे सजा देणे रिया तँईं बर्खा पेजोआ,

ओर कदी-कदी से आसा खे ये दखाणे रिया तँईं बर्खा पेजोआ कि से आसा रे प्रति दया दखाओआ।

14 ओ अय्यूब, रूक ओर त्यानो साथे सुण;

ओर तिना अचम्बे रे कामा पाँदे बचार कर जो परमेशर करोआ।

15 क्या तूँ जाणेया कि परमेशर किंयाँ तूफानो खे आपणे वशो दे राखोआ

ओर बादल़ो ते बिजल़ी किंयाँ चमकोई।

16 क्या तूँ जाणेया कि सर्गो दे बादल़ किंयाँ चलोए

जो कि सर्वज्ञानी परमेशरो रे अचम्बे रे कारीगरिया रे काम ए?

17 ना, तुसे सिर्फ गर्मिया देई परेशान ऊई सकोए

जेबे दक्खणा री गर्म अवा तरतिया पाँदे अत्याचार करोई।

18 क्या तूँ परमेशरो खे सर्गो खे फलाणे ओर तेसखे चमकाई दी

धातुआ जेड़े सख्त बणने दे मताद करी सकेया?

19 तूँ सोचेया कि तूँ समजदार ए। तो आसा खे बता कि आसा परमेशरो खे क्या बोलणा चाईयो।

ओ अय्यूब, आसा री मताद कर, कऊँकि आसे नि जाणदे कि तेसते क्या बोलिये।

20 क्या माखे परमेशरो खे बोलणा चाईयो कि आऊँ तांते गल्ला करना चाऊँआ?

ना, कऊँकि जे मैं एड़ा कित्तेया, तो से माखे नाश करी सकोआ।

21 अवे सारे बादल़ उडाई ते दे।

एबे सर्गो दे तेज चमकणे वाल़े सूरजो रिया तरफा खे कोई नि देखी सकदा।

22 लोक सर्गो दे उत्तर दिशा दे बांके रंग देखी सकोए।

पर सेयो डरो जोगे परमेशरो खे नि देखी सकदे कऊँकि से बऊत महान ओर बऊत बांका ए।

23 सर्वशक्तिमान परमेशर जो बऊत सामर्थी ए

ओर जेसरा पेत आसे जाणी नि सकदे,

से न्यायी ए ओर पुरिया तरअ ते तार्मिक ए, से आसा पाँदे अत्याचार नि करी सकदा।

24 इजी बजा ते खरे माणूं तेसरा डर मानोए;

पर जो माणूं आपू खे आपणियां नजरा दे अक्लमंद समजोए, से तिना पाँदे नजर पनि करदा।