1 प्रभुए अय्यूबो खे ज्वाब दित्तेया,
2 "जो माणूं दूजेया रे दोष टोल़ोआ, क्या से मां सर्वशक्तिमान परमेशरो रा सामणा करी सकोआ?
जो मां साथे बईस करोआ, से मेरे सवाला रा ज्वाब देओ!"
अय्यूबो रा परमेशरो खे ज्वाब
3 तेबे अय्यूबे प्रभुए खे ज्वाब दित्तेया,
4 "एबे माखे पता लगेया कि आऊँ पुरिया तरआ ते तुच्छ आ। आऊँ शाईद तिना सवाला रा ज्वाब नि देई सकदा
ओर मां आगे ओर कुछ नि बोलणा
5 मां जितणा बोलणा था तेते ते जादा बोली ता
ओर एबे ओर कुछ नि बोलणा।"
परमेशरो रा अय्यूबो खे ज्वाब
6 तेबे प्रभुए अय्यूबो खे बड़े पारी तूफानो बीचा ते ये ज्वाब दित्तेया,
7 "एबे सीदा खड़ा ऊई जा
मां तांते ओर सवाल पूछणे ओर मेरेया सवाला रा ज्वाब दे।40:7 अय्यू. 38:3
8 क्या तां मेरा न्याय बेकार ठराणा?
क्या तां आपू निर्दोष ऊणे रिया इच्छा ते आऊँ दोषी ठराणा?
9 तूँ क्या परमेशरो रिया तरआ तागतबर ए?
तेरेया शब्दा दे क्या परमेशरो रिया तरआ गिड़ने री आवाज ओई?"
10 जे एड़ा ए, तो आपणियां इज्जती ओर प्रतापो दे खड़ा ऊई जा;
एश्वर्य ओर तेजो खे पईनी लओ।
11 आपणे गुस्से रे ब्वाल़ो खे बारे निक्याल़;
ओर हरेक कमण्डिये खे देखदे ई तेसखे तुच्छ ठरा।
12 हर एक कमण्डिये खे देखी की चुकाई दे
ओर दुष्ट लोका खे जेती खड़े रे ओ, तिना खे तेथी रूड़ाई दे।
13 तिना खे जमीना दे दबाई दे!
तिना खे तेते जगा दे पेजी दे जेती मरे दे लोक ए, जेथा ते सेयो बारे नि निकल़ी सकदे!
14 जे तूँ ये काम करी सकेया तो मां बी तेरी तारीफ करनी।
तेबे मां मानणा कि आपणे आपू खे बचाई सकेया।
15 तेस दरियाई कोड़े खे तो देख, जिंयाँ मैं तूँ बणाई राखेया, तिंयाँ ई मैं से बी बणाया,
से बल़दो जेड़ा काआ खाओआ।
16 देख तेसरे लको रे तेसरी तागत ए
ओर तेसरे पेटो रे पट्ठेया रे तेसरी तागत रओई।
17 से आपणी पूँछा खे देवदारो रे डाल़ो जेड़ा सख्त करी लओआ,
तेसरी खुटिया रिया नसा एकी-दूजे साथे मिली रिया ए।
18 तेसरिया आड्डिया मानो पीतल़ी रिया नल़िया ए,
तेसरिया पसल़िया मानो लोए रिया छड़ा ए।
19 सेयो जानवरा बीचे सबी ते मजबूत ए
जो मैं बणाई राखे, ओर आऊँ परमेशरे, जिने सेयो बणाए, सिर्फ सेईए जो तिना खे तलवारे की काई सकोआ।
20 तेसखे पाह्ड़ा पाँदे चारा मिलोआ,
जेती ओर बणो रे डांगर कूमेया-फिरेया करोए।
21 से कौल़ो रे पौधेया निठे लेटेया रा रओआ
ओर से नगल़ो री आड़ा दे चीकड़ो बीचे पड़ेया रा रओआ।
22 कौल़ो रे पौधे तेस पाँदे छांए करोए;
से नाल़ो रे बिऊँसा रे डाल़ा साथे केरेया रा रओआ।
23 चाए नदिया रे बाढ़ बी आई जाओ तेबे बी से कबरांदा नि,
यरदन नदी बढ़ी की तेसरे मुंए तक चढ़ी की आई जाओ, फेर बी से बिना डरे रओआ।
24 जेबे से चौकस ओ, तेबे क्या कोई तेसखे जाल़ बछयाई की पकड़ी सकोआ
या तेसरी नाक बीनी की कोई माणूं तिजी दे नथ पाई सकोआ?