1 मैं आपणियां आखी साथे वादा करी राखेया,
कि मां कोई कँवारी छोट्टी बुरिया नजरा ते नि देखणी।
2 एड़े बचार राखणे वाल़े मर्दा ते परमेशर नराज ओआ।
जे आऊँ एड़ा करूँगा तो सर्वशक्तिमान परमेशरो मेरे इस्से दे क्या देणा।
3 से केसी बी तरआ रे गल़त काम करने वाल़ेया लोका ते नराज रओआ।
ओर जो लोक सई तरीके ते नि जिऊँदे तिना साथे बुरा ई ऊणा।
4 परमेशर सबी गल्ला खे जाणोआ कि आऊँ क्या करूँआ।
से माखे कदमा-कदमा दे देखदा रओआ।
5 आऊँ कसम खाऊँआ कि मैं कदी बी बुरा बर्ताओ नि कित्तेया
ओर ना मैं कदी केसी खे तोखा देणे री कोशिश कित्ती।
6 आऊँ सिर्फ इतणी बिनती करूँआ कि परमेशर मेरा सई तरीके दे न्याय करो,
ओर जे से एड़ा करोआ तो तेसखे पता चली जाणा कि आऊँ बेकसुर आ।
7 जे आऊँ सई बाटा ते मुड़ी गा दा ए
या आपणे आपू खे बुराईया रिया तरफा खे मुड़ने देऊँआ,
जे मेरे आथ पापो ते रंगी रे;
8 तो मेरिया मईणती रा फल़ दूजा माणूं खाओ,
बल्कि मेरे डोरूआ री सारी फसल जड़ी तेई पट्टी देणी चाईयो।
9 जे मेरा मन पड़ोसिये रिया जवाणसा पाँदे लगी गा ओ
ओर आऊँ तेसरे द्वारो पाँदे घात लगाई की बैठी रा ओऊँ,
10 तो मेरी जवाणस दासी बणी जाओ, ओर ओरी रिया तँईं चाक्की पीसो
ओर पराये मर्द तेसा खे प्रष्ट करो।
11 कऊँकि मेरा ये बर्ताव तो महापाप ए;
ओर एते पापो री सजा न्याय करने वाल़ेया रे जरिए जरूर दित्ती जाणी चाईयो।
12 कऊँकि एड़ा कुकर्म एक एड़ी आग ए जो फूकी की स्वा करी देओई
ओर से मेरी सारी फसला खे जड़ी ते नाश करी देओई।
13 जेबे मेरे दास-दासिये मेरे खलाफ मांते शकाईत कित्ती,
तेबे जे मैं तिना री शकाईत नि सुणी ओ,
14 तो मां परमेशरो रे सामणे क्या करना जेबे से न्याय करने रिया तँईं उठणा?
ओर जेबे से मांते पूछोगा, तेबे मां तेसखे क्या ज्वाब देणा?
15 से परमेशर सबी खे एक जेड़ा ए
तिने परमेशरे आऊँ ओर मेरा दास दोनो बणाई राखे।
16 जे मैं केसी गरीबो री इच्छा पूरी नि कित्ती ओ
या मेरिया बजा ते कदी कोई बिदुआ मुसीबता रे रई ओ,
17 या मैं कदी कल्ले ई रोटी खाई ओ
ओर मेरिया रोटिया दे कोई अनाथ बाल़क बराबर इस्सेदार नि ओया ओ,
18 पर बचपनो तेई मैं से एड़ा पाल़ेया जेड़ा बाओ आपणे बच्चेया खे पाल़ोआ
ओर आऊँ जन्मो ते बिदुआ खे पाल़दा आई रा,
19 जे मैं कोई गरीब बिना टाल्लेया ते ठण्डी री बजा ते मरदा ऊआ देखेया ओ
या कोई गरीब जेसगे टखणे खे कुछ नि था
20 ओर तेसखे आपणी पेडा री ऊना रे टाल्ले नि दित्ते ओ
ओर तिने गर्म ऊई की माखे आशीर्वाद नि दित्तेया ओ,
21 जे मैं कदी केसी अनाथो खे तोखा देई राखेया ए,
ये जाणदे ऊए कि आऊँ कचरिया दे जीती गा दा ए,
22 तो मेरी बाँ फरकुए गे ते उखड़ी की थाले पड़ी जाओ
ओर मेरिया बांई री आड्डी टूटी जाओ।
23 कऊँकि परमेशरो रिया तरफा ते पाई री बिपदा रिया बजा ते आऊँ डरो रे मारे थरथराऊँ था,
इजी खे आऊँ ये पाप नि करी सकदा। आऊँ परमेशरो रे प्रतापो रा सामणा नि करी सकदा।
24 जे मैं सूईने पाँदे परोसा कित्तेया रा ऊँदा
या कुन्दनो खे आपणा आसरा समजेया ऊँदा,
25 जे मैं आपणी बऊत सारी तअन-दौलता पाँदे खुशी मनाई ऊँदी
या इजी बजा ते कि बऊत सारा तअन मेरे आथे लगी गा रा,
26,27 मैं कदी बी सर्गो रे सूरज
ओर चाँदो खे देखी की तिना री आराधना नि कित्ती।
28 तो मेरा ये काम बी न्याय करने वाल़ेया ते दण्ड पाणे जोगा ऊँदा,
कऊँकि एड़ा करी की मैं सबी ते श्रेष्ठ परमेशरो रे खलाफ विश्वासघात कित्तेया ऊँदा।
29 जे आऊँ आपणे दुश्मणो रे नाशो ते खुश ऊँदा
या जेबे तेस पाँदे मुसीबत पड़ी तेबे तेस पाँदे आसेया ऊँदा,
30 पर मैं ना तो तेसखे स्राप देणे
ओर ना तेसखे मौता री सजा री प्रार्थना करदे ऊए आपणे मुंए ते पाप करी राखेया;
31 मेरे डेरे दे रणे वाल़ा हरेक माणूं ये बोलोआ:
"से माणूं कुण ए जो अय्यूबो रे कअरो री रोटी खाई की रज्जेया नि ओ?"
32 मेरिया बजा ते परदेशिया खे सड़का दे रात नि कटणी पड़ो थी,
आऊँ यात्रिया खे आपणा द्वार सदा खुला राखूँ था;
33 जे मैं आदमो जेड़ा आपणा पाप छुपाई की
आपणा पाप टखी ता ओ,
34 माखे कदी एते गल्ला रा डर नि लगेया कि लोका क्या बोलणा;
आऊँ कदी चुप नि रया या कअरो रे पीतरे नि रया
कऊँकि माखे तिना रिया बेज्जतिया रा डर था।
35 काश! मेरा बी कोई पलाई करने वाल़ा ऊँदा,
जो मेरी गल्ल सुणदा! परमेशरो री कचैरिया दे मेरी येई अर्जी ए: सर्वशक्तिमान परमेशर मेरा न्याय करो!
खरा ऊँदा कि जो शकाईतनामा मेरे बरोदिये लिखी राखेया, से मांगे ऊँदा!
36 मां पक्का से आपणी कांदा पाँदे चकी की कूमणा था
ओर मां से बांकी पगड़ी समजी की आपणे सिरो पाँदे बानी की राखणा था।
37 मां परमेशरो खे आपणे कदमो-कदमो रा साअब देणा था,
मां तेसरे नेड़े परदानो जेड़ा बिना डरे जाणा था।
38 जे मैं से जमीन चोरी ती दी ए जेते दे आऊँ फसल बाऊँआ
ओर तेसा तेतेरे मालको ते लई लऊँआ
39 जे मैं आपणे डोरूआ री फसल मजदूरो खे बिना मोल दित्ते खाई ओ
या जमीना रे मालको रा प्राण लया ओ;
40 तो मेरे डोरूआ रे कणका रे बदले कांडे,
ओर जौ रे बदले जंगल़ी काआ जम्मो!
अय्यूबो रे यो वचन पूरे ऊए जो तिने आपणे तिंऊँ दोस्ता खे बोले।