1 तेबे अय्यूबे यहोवे खे ज्वाब दित्तेया,

2 "ओ यहोवा, आऊँ जाणूंआ कि तूँ सब कुछ करी सकेया

ओर तेरी कोई बी योजना निष्फल नि ऊँदी।"*

3 तैं मांते पूछेया, "जेबे आऊँ इतणा नासमज ए तो

मैं तुसा रिया समजा पाँदे सवाल उठाणे री ईम्मत किंयाँ कित्ती?"

4 तैं माखे बोलेया, "जदो तँईं खे आऊँ तांते गल्ला करने लगी रा तदुए तक सुण।

आऊँ तांते कुछ सवाल पूछणा चाऊँआ, इजी रिया खातर तिना रा ज्वाब देणे रिया तँईं आपू खे त्यार कर।"

5 प्रभु, आऊँ तेरे बारे दे इतणा ई जाणूं था जितणा मांगे दूजेया बताया था,

पर एबे मेरिया आखी ताखे देखोईया।

6 इजी री खातर माखे आपू पाँदे कृणा आओई

ओर आऊँ तूड़ा रे ओर स्वाई बीचे बैठी की पश्चाताप करूँआ।*

7 तेबे एड़ा ऊआ कि जेबे प्रभु इना गल्ला खे अय्यूबो खे बोली चुकेया, तेबे तिने तेमान शईरो रे रणे वाल़े एलीपजो खे बोलेया, "मेरा गुस्सा तां ओर तेरे दुँईं दोस्ता पाँदे पड़की रा, कऊँकि जेड़िया ठीक गल्ला मेरे दास अय्यूबे मेरे बारे बोली राखिया, तेड़िया तुसे लोके नि बोलिया। 8 एबे तुसा रे पापो रा येई प्राश्चित ए कि तुसे सात बल़द ओर सात खाडू लई की मेरे दास अय्यूबो गे जाओ ओर आपणियां तरफा ते माखे होमबलि चढ़ाओ। तेबे मेरे दास अय्यूबो तुसा रिया तँईं मांते प्रार्थना करनी, ओर मां तेसरी प्रार्थना ग्रईण करनी। तेबे मां तुसा री मूर्खता रिया गल्ला रिया तँईं तुसा खे सजा नि देणी, तुसे लोके मेरे बारे सच्च नि बोलेया बल्कि मेरे दास अय्यूबे मेरे बारे सच्च बोली राखेया।" 9 ये सुणी की तेमान शईरो रे रणे वाल़े एलीपजे, शूही वंशो रे बिल्ददे ओर नामाती शईरो रे रणे वाल़े सोपरे जाई की प्रभुए री आज्ञा रे मुताबिक कित्तेया ओर प्रभुए अय्यूबो री प्रार्थना ग्रईण कित्ती ओर तेसरे दोस्ता खे सजा नि दित्ती।

10 जेबे अय्यूब आपणे तीऊँ दोस्ता खे माफ करने रिया तँईं प्रार्थना करी चुकेया, तेबे प्रभुए तेसरा सारा दु:ख दूर कित्तेया ओर जितणी तअन-दौलत अय्यूबो गे पईले थी, तिजी रा दुगणा प्रभुए अय्यूबो खे वापस दित्तेया। 11 तेबे तेसरे सब पाई, सब बईणा ओर जितणे लोक तेसखे पईले जाणो-पछयाणो थे, तिने सबी तेसरे कअरे आई की तेस साथे रोटी खाई ओर जितणिया बिपदा प्रभुए तेस पाँदे पाईया थिया, तिजी रिया तँईं तिने दलासा दित्तेया ओर अय्यूबो खे शान्ति दित्ती ओर तेसखे एक-एक चाँदिए रा सिक्का ओर सूईने री एक-एक बाल़ी दित्ती।* 12 जो आशीष प्रभुए अय्यूबो खे पईले दित्ती थी तिजी ते जादा आशीष एबे दित्ती ओर तेसगे चौदा ह्जार पेडा-बाकरिया, छे ह्जार ऊँट, एक ह्जार बल़दा रिया जोड़िया ओर एक ह्जार गह्दिया ऊईगिया। 13 तेसरे सात माठे ओर तीन बेटिया बी जम्मिया। 14 इना बीचा ते तिने बड़ी बेटिया रा नाओं यमीमा, दूजिया रा कसीआ ओर तीजिया रा नाओं केरेन्हप्पूक राखेया। 15 तेस सारे देशो रे एड़िया जवाणसा केथी नि थिया, जो अय्यूबो री बेटिया जेड़िया बांकिया ओ ओर तिना रे बाओ अय्यूबे तिना रे पाईया साथे ई तिना खे बी आपणियां जायदाता दे इस्सा दित्तेया। 16 आपणे दुख पुगतणे ते बाद अय्यूब 140 साला तक जिऊँदा रया ओर तिने चार पीढ़िया तक आपणा वंश देखेया। 17 ईंयाँ अय्यूब स्याणा ओर बऊत उम्रा रा ऊई की मरीगा।