1 अय्यूबे आपणे दोस्ता खे ज्वाब दित्तेया,

2 "तुसा कदुए तक मेरे प्राणो खे दु:ख देंदे रणा

ओर आपणियां गल्ला साथे चूर-चूर करदे रणा?"

3 बार-बार तुसे लोक मेरी निन्दा ई करेया करो,

मां साथे एड़ा सख्त बर्ताव करदे ऊए तुसा खे शर्म नि आऊँदी।

4 आऊँ मानूँआ कि मांते पूल ऊई री,

तेबे बी से पूल तो मेरे ई सिरो पाँदे रणी।

5 तुसे सोचोए कि तुसे मांते खरे ए,

ओर मेरिया परेशानिया खे मेरे पापो री गवाईया रे रूपो दे देखोए।

6 तो तुसे ये जाणी लओ की परमेशरे मां साथे अन्याय करी राखेया

ओर आऊँ आपणे जाल़ो रे फसाईता रा।

7 देखो, आऊँ बचाओ! बचाओ ईंयाँ बोली की चींगदा रऊँआ, पर कोई नि सुणदा;

आऊँ मतादा रिया तँईं दुहाई देऊँआ, पर कोई न्याय नि करदा।

8 प्रभुए मेरी बाट एड़ी बन्द करी राखी कि आऊँ आगे नि चली सकदा

ओर तिने मेरिया बाटा दे न्हेरा करिता रा।

9 तिने मेरा वैभव ओर मेरे सिरो रा मुकुट मांते दूर करिती री।

10 तिने आऊँ चऊँ कनारा ते बर्बाद करिता दा,

तिने मेरी उम्मीद टल़े दे डाल़ो जेड़ी थाला ते पट्टी की खत्म करिती दी ताकि आऊँ सुकी की मरी जाऊँ।

11 तिने मां पाँदे आपणा गुस्सा पड़काई राखेया

ओर माखे आपणा दुश्मण समजोआ।

12 तेसरे सैनिका रे चूण्ड मेरे खलाफ कट्ठे ऊई की मां पाँदे अमला करोए

ओर मेरे रणे रिया जगा खे केरी लओए।

13 प्रभुए मेरे पाईबन्दु मांते दूर करीते रे

ओर मेरिया जाण-पछयाणी रे लोक मांते बिल्कुल अणजाण ऊईगे रे।

14 मेरे टब्बरो वाल़ेया आऊँ छाडीता रा

ओर मेरे प्यारे दोस्त माखे पूली गे रे।

15 जो मेरे कअरे रया करो थे, सेयो, बल्कि मेरिया

दासिया बी माखे अणजाणा जेड़ा गिणोईया;

तिना रिया नजरा दे आऊँ परदेशी ऊईगा रा।

16 जेबे आऊँ आपणे दासो खे बुलाऊँआ, तेबे से माखे ज्वाब तक नि देंदा,

माखे तेसखे कितणा गिड़गिड़ाई की बुलाणा पड़ोआ।

17 मेरा साआ मेरिया लाड़िया खे बी बुरा लगणे लगी गा रा

ओर मेरी बास मेरे पाईया खे बुरी लगोई।

18 बच्चे बी मेरा मजाक ड्वाओए

ओर जेबे आऊँ उठणे लगूँआ, सेयो मेरा मजाक ड्वाओए।

19 मेरे सारे प्यारे दोस्त मांते कृणा करोए

ओर जिना साथे मैं प्यार कित्तेया, सेयो बदली की मेरे बरोदी बणीगे रे।

20 मेरी चामड़ी ओर मास मेरिया आड्डिया साथे चिपकी गे रे

ओर आऊँ मरदे-मरदे बचीगा रा।

21 ओ मेरे दोस्तो! मां पाँदे दया करो, दया करो,

कऊँकि आऊँ परमेशरे ई रोगी बणाई राखेया।

22 तुसे परमेशरो जेड़े मां पीछे कऊँ पड़ी रे?

तुसे माखे बदनाम कऊँ करोए?

23 खरा ऊँदा, जे मेरिया गल्ला लिखिया जांदिया;

खरा ऊँदा, जे मेरिया यो गल्ला कताबा रे लिखिया जांदिया,

24 ओर लोए रिया छिणियाँ ओर शीशे साथे सेयो सदा खे

चट्टानी पाँदे टाकी की लिखिया जांदिया।

25 पर माखे तो निश्चा ए कि मेरा छुड़ाणे वाल़ा परमेशर जिऊँदा ए

ओर से अन्तो रे माखे बचाणे रिया तँईं आऊणा।*

26 मेरा शरीर बमारिया रे जरिये नाश ऊणे ते बाद बी,

एते शरीरो दे रंदे ऊए मां परमेशर देखणा।

27 मेरा दिल बेचैन ए कि आऊँ आपणियां आखी साथे परमेशरो खे आपू साथे खड़ेया रा देखूँ।,

28 तुसे बोलोए कि मैं आपणी परेशानी आपू पैदा करी राखी।

ओर तिजी रिया बजा ते तुसे माखे ओर बी जादा कष्ट देओए।

29 पर तुसा खे एते गल्ला ते डरना चाईयो कि तुसा साथे क्या ऊई सकोआ।

परमेशरो तय करना कि तुसे अच्छे काम करी राखे या बुरे। से तय करी सकोआ कि तुसे बुरे काम करी राखे ए।

ओर तेबे से तुसा खे सजा* देई सकोआ।