अय्यूबो री शकाईत
1 सर्वशक्तिमान परमेशर दुष्ट माणूंआ रा न्याय कऊँ नि करदा?
ओर जो लोक तेसरा डर मानोए सेयो तेस चूने दे न्याय रे दिनो खे कऊँ नि देखी सकदे?
2 कई लोक आपणेया बन्नेया खे आगे दूजेया रे डोरूआ पाँदे कब्जा करोए
ओर दूजेया रे डांगरा खे चोरी की एड़े मालक बणोए कि सेयो तिना रे आपणे ए!
3 कुछ लोक अनाथा रा गह्दा खेदी की लई जाओए
ओर बिदुआ रा बल़द रईन करी की राखी देओए।
4 सेयो गरीब लोका खे तिना रे अक्क लणे ते रोकोए ओर
जरूरतमंदा खे नठणे ओर लूकणे खे मजबूर करोए।
5 देखो, गरीब मजदूरी करने रिया तँईं निकल़ी जाओए;
सेयो बणो रे गह्दे जेड़े रोटी कमाणे रिया तँईं
ओरे-पोरे निकल़ी जाओए; तिना रे बच्चेया खे रोटी उजाड़ जगा तेई मिलोई।
6 गरीब लोका खे दूजेया रे डोरूआ रे बची री फसल कट्ठी करनी पड़ोई
ओर दुष्टा रे बगीचे रे बचे रे अंगूर कट्ठे करने पड़ोए।
7 सेयो पूरी रात बिना टाल्लेया ते पड़े रे रओए;
ओर ठण्डी रे बखते बी तिना गे टखणे खे कुछ नि मिलदा।
8 सेयो पाह्ड़ो पाँदे बरखा साथे सीजदे रओए
ओर जेबे तिना खे बरखा ते बचणे रिया तँईं रणे खे जगा नि मिलदी, तेबे सेयो चट्टानी साथे चिपटी जाओए।
9 दुष्ट लोक अनाथ बच्चेया खे गुलाम बणाओए
ओर गरीबा रे बाल़का खे कर्ज चुकाणे रिया तँईं लई जाओए।
10 जेते कि सेयो गरीब बच्चे बिना टाल्ले पईने नांगे कूमोए
ओर पूखे पेटे पूल़िया टोणियां पड़ोईया।
11 सेयो गरीब लोक दुष्टा रे कअरे जैतूनो रा तेल बणाओए
ओर तिना रे अंगूरा रे रसकुण्डो रे अंगूर केसदे ऊए बी त्याये रओए।
12 शईरो दे मरने वाल़े गरीबो रा कणना सुणोआ;
काईल गरीब माणूंए रा प्राण दुहाई देओआ,
तेबे बी परमेशर तिना री प्रार्थना पाँदे त्यान नि देंदा।
13 तेबे कुछ लोक प्रयासे साथे बैर राखोए,
सेयो तिजी री बाटा खे नि पछयाणदे
ओर ना प्रयासे रिया बाटा रे बणे रे रंदे।
14 दु:खी ओर गरीब माणूंए रा खून करने रिया तँईं खूनी न्हेरे-न्हेरे देई उठी जाओआ
ओर से राती चोर बणी जाओआ।
15 व्याभिचारी माणूं ये सोची की कि कोई माखे देखी नि लओ,
दिन छपदा ऊआ न्याल़दा रओआ
ओर से आपणा मूँ बी टखी की राखोआ।
16 न्हेरे दे बुरे लोक दूजे लोका खे लुटणे रिया तँईं निकल़ोए।
पर दिने सेयो आपणे कअरा दे सये दे रओए।
17 तिना खे प्यागा रे बजाए रात पसन्द ए।
ओर सेयो राती दे ऊणे वाल़िया चीजा ते नि डरदे।
18 सेयो पापी पाणिए पाँदे गन्दे चागो जेड़े ए।
ओर इजी रिया बजा ते तिना रे डोरूआ दे
ओर अंगूरा रे बगीचे स्रापो रे वशो दे ऊई जाणे ओर फसल नि देणी।
19 जिंयाँ सूका पड़ने ते ओर गर्मिया ते बर्फा रा पाणी सूकी जाओआ,
तिंयाँ ई पापी लोक तरतिया पाँदा ते राची जाओए।
20 एबे तो तिना रिया माया बी तिना खे याद नि करदिया।
दुष्ट लोक बाडे दे डाल़ो जेड़े नाश ऊई जाओए,
ओर कीड़े तिना रिया लाशा खे खाई जाओए।
21 एड़ा इजी रिया तँईं ओआ कऊँकि तिने बिदुआ साथे बुरा बर्ताओ कित्तेया
ओर बाँज जवाणसा साथे कोई दया नि दखाई।
22 पर परमेशर आपणियां सामर्था ते बड़ेया लोका ते छुटकारा दलाओआ।
परमेशर काम करोआ ओर दुष्ट लोका खे काई देओआ।
23 परमेशर तिना खे सई-सलामत राखोआ, ओर तिना खे सम्बाल़ोआ;
से तिना री बुरिया बाटा दे तिना री रक्षा करोआ।
24 दुष्ट लोक थोड़े जे बखतो खे बढ़दे जाओए,
पर फेर सेयो बाडे दे काओ जेड़े
ओर नज्जो रे सिल्लेया जेड़े सुकी जाओए।
25 जो मैं बोलेया, क्या ये सब सच्च नि ए? कुण माणूं माखे चूठा ठराई सकोआ?
केस माणूंए मेरिया गल्ला नकम्मिया ठराणियां?