1 ऊज देशो दे अय्यूब नाओं रा एक मर्द था; से बऊत ई सीदा सादा माणूं था ओर से परमेशरो रा डर मानो था ओर से बुराईया ते दूर रओ था।* 2 अय्युबो रे सात माठे ओर तीन बेटिया थिया। 3 तेसगे सात ह्जार पेडा-बाकरिया, तीन ह्जार ऊँट, पाँज सौ बल़दा रिया जोड़िया ओर पाँज सौ गह्दिया ओर बऊत सारे नौकर-नौकराणिया थे, बल्कि तेसगे इतणी तअन-दौलत थी कि से माणूं पूर्व देशो रे लोका बीचे सबी ते जादा अमीर था। 4 अय्यूबो रे माठे त्योआरो रे मोके पाँदे एकी-दूजे रे कअरे खाणे-पीणे जाया करो थे; ओर सन्देशा पेजी की आपणियां तीऊँ बईणा खे आपू साथे खाणे-पीणे खे बुलाया करो थे। 5 हर बड़े खाणे ते बाद प्यागा, अय्यूब चट उठदा ओर आपणे हरेक बच्चे खे शुद्ध करने रिया तँईं बलिदान चढ़ाओ था। तिने हमेशा एड़ा इजी खे कित्तेया कऊँकि तिने सोचेया था कि तिना बीचा ते एकी अणजाणे दे परमेशरो री बेज्जती करी की पाप कित्तेया ऊगा।

6 एक दिन स्वर्गदूत परमेशरो सामणे आजीर ऊए ओर तिना बीचे शैतान बी आया। 7 यहोवे शैतानो ते पूछेया, "तूँ केथा ते आई रा?" शैताने प्रभुए खे ज्वाब दित्तेया, "आऊँ तरतिया पाँदे ओरे-पोरे कूमदे-फिरदे एती आई रा।" 8 यहोवे शैतानो ते पूछेया, "क्या तैं मेरे दास अय्यूबो पाँदे त्यान देई राखेया? कऊँकि तेस जेड़ा सीदा सादा ओर निष्कपट ओर मेरा डर मानणे वाल़ा ओर बुराईया ते दूर रणे वाल़ा माणूं तरतिया पाँदे ओर कोई नि ए।" 9 शैताने प्रभुए खे ज्वाब दित्तेया, "क्या अय्यूब परमेशरो रा डर बिना फायदे ते मानोआ?* 10 तैं हमेशा तेसरी ओर तेसरे कअरो री ओर तेसरिया हर चीजा री रक्षा करी राखी। जो कुछ से करोआ, तेस पाँदे तूँ आशीष देओआ, ओर तैं तेसखे ईतणे पशु दित्ते कि सारा देश परीगा रा ए। 11 पर एबे मानी लो कि तुसे तेसरा सब कुछ लई लओए, तो तेस पक्का खुल्ली की तुसा खे स्राप देणा!" * 12 तेबे यहोवे शैतानो खे ज्वाब दित्तेया, "ठीक ए, तेसगे जो कुछ तअन-दौलत ए से सब तेरे वशो रे देई देऊँआ, बस तूँ अय्युबो रे शरीरो खे नुकशाण नि पऊँचाणा।" तेबे शैतान यहोवे रे सामणे ते चलीगा।

13 एक दिन एड़ा ऊआ कि अय्यूबो रे माठे-बेटिया बड़े पाईए रे कअरे रोटी खाणे लगी रे थे ओर अंगूरा रा रस पीणे लगी रे थे; 14 तेसी बखते एक दास अय्यूबो गे नठी की आया ओर बोलणे लगेया, "ओ मालक! आसे तो तेरे डोरूआ दे बल़दा साथे अल़ बाणे लगी रे थे ओर गह्दिया तिना रे नेड़े चरने लगी रिया थिया 15 कुछ शेबा देशो रे लोके अमला कित्तेया ओर सेयो डांगरा खे लूटी की लईगे ओर तलवारी साथे तेरे नौकर काईते ओर आऊँ ई कल्ला बची की ताखे खबर देणे आई रा।" 16 से एबु ये बोलणे ई लगी रा था कि दूजा दास बी आई की बोलणे लगेया, "परमेशरो री आग सर्गो ते छूटी ओर तिजी साथे पेडा-बाकरिया ओर नौकर फूखी की पस्म ऊईगे ओर आऊँ ई कल्ला बची की ताखे खबर देणे आई रा।" 17 से ये बोलणे ई लगी रा था कि एक ओर बी आई की बोलणे लगेया, "कसदी लोक तीन चूण्ड बणाई की ऊँटा पाँदे अमला करी की तिना खे लईगे ओर तलवारी साथे तेरे दास काईते ओर आऊँ ई कल्ला बची की ताखे खबर देणे आई रा।"* 18 से बी ये बोलणे ई लगी रा था कि एक ओर दास बी आई की बोलणे लगेया, "तेरे माठे-बेटिया बड़े पाईए रे कअरे रोटी खाणे लगी रे थे ओर अंगूरा रा रस पीणे लगी रे थे, 19 कि सुनसाण जगा रिया तरफा ते एक बड़ा पारी पऊण-चूखाना आया ओर कअरो रे चऊँ कनारे एड़ा ताका बाह्या कि तेतेरी रिया दवाला तेरे माठे-बेटिया पाँदे पड़िया ओर सेयो दबी की मरीगे ओर आऊँ ई कल्ला बची की ताखे खबर देणे आई रा।"

20 तेबे अय्यूब उठेया ओर तिने शोक प्रकट करने रिया तँईं आपणा चोगा फाड़ेया ओर आपणे सिरो रे बाल़ कटवाई की जमीना दे पड़ेया ओर माथा टेकी की परमेशरो री आराधना करी की बोलेया,* 21 आऊँ आपणियां माया रे पेटो ते खाली आथे आई रा ओर खाली आथे ई मरी जाणा; यहोवे दित्तेया ओर यहोवे ई लई ला, यहोवे रा नाओं तन्य ए।*

22 इतणा सब कुछ ऊणे ते बाद बी ना तो अय्यूबे पाप कित्तेया ओर ना परमेशरो पाँदे मूर्खता करी की दोष लगाया।