1 "क्या तूँ समुद्री राक्ष लिब्यातानो या मगरमच्छो खे मच्छली पकड़ने री ऊक मतलब बँसिया रे कांडे दे फसाई की खींजी सकेया

या डोरिया साथे तेसरी जीब दबाई सकेया?*

2 क्या तूँ तेसरे नाको रे नकेल पाई की आपणे काबूए रे करी सकेया

या तेसरा जबड़ा परेगा साथे बीनी सकेया?

3 क्या तेस आपणे प्राण बचाणे रिया तँईं तांगे बऊत गिड़गिड़ाई की बिनती करनी

या तांते मीठिया गल्ला बोलणिया?

4 क्या तेस तां साथे वादा करना

कि से सदा खे तेरा दास रणा?

5 क्या तां तेस साथे एड़ा खेलणा जेड़ा चिड़िया साथे या

आपणी दासिया साथे आपणा जिऊ बईलाणे रिया तँईं तेसा खे बानी की राखी सकेया?"

6 क्या बपारिया से बजारो दे खरीदणे री कोशिश करनी?

क्या तिना तिजी रे टुकड़े करी की मास बेची पाणा?

7 क्या तू तेसरा चामड़ा भाल़े साथे

या तेसरा सिर मच्छुए रे त्रिशूलो साथे बीनी सकेया?

8 तांदे ईम्मत अए तो तेसखे आथ लगा, ये लड़ाई ताखे सदा याद रणी

ओर फेर एड़ा करने री ईम्मत तांदे कदी नि ऊणी।

9 देख, लिब्यातानो खे पकड़ने री उम्मीद निष्फल रओई;

माणूंआ री तेसखे देखदे ई ईम्मत टूटी जाओई।

10 कोई इतणा मूर्ख नि ए जो तेसखे जगाई सको। सब जाणोए कि से बऊत डराऊणा ए ओर मैं से बणाया!

इजी रिया बजा ते कोई मेरे खलाफ युद्ध नि करी सकदा।

11 क्या कदी किने माणूंए माखे त्वार देई राखेया कि आऊँ तेसखे वापस करुँ?

देख, जो कुछ सर्गो निठे पुरिया तरतिया पाँदे ए, से सब मेरा ए।*

12 मां लिब्यातानो रे शरीरो रे अंगो रे बारे दे

ओर तेसरी बड़ी तागती रे ओर तेसरे शरीरो री बांकी बणाऊटा रे बारे दे तांगे बताणा।*

13 क्या कोई माणूं तेसरी पाँदली चामड़ी त्वारी सकोआ?

तेसरे दाँदा री दुँईं पाल़िया रे मतलब जबड़ेया बीचे कुण आऊणा?

14 तेसरे मुंए रे दोनो द्वार कुण खोली सकोआ?

तेसरे दाँद चऊँ कनारो ते डराऊणे ए।

15 तेसरिया पीठी पाँदलिया रेखा कमण्डो री बजा ए,

सेयो मानो मुअर लगाई की बन्द करी राखिया।

16 सेयो एकी-दूजे साथे एड़िया जुड़ी रिया

कि तिना बीचा ते अवा पनि जाई सकदी।

17 सेयो आपू बीचे मिली रिया

ओर एड़िया जुड़ी रिया कि लग-लग नि ऊई सकदिया।

18 तेसरे छिकणे ते प्रयासा चमकोआ

ओर तेसरिया आखी प्यागा रिया पलका जेड़िया ए।

19 तेसरे मुंए ते बल़दी ऊईया लूपिया निकल़ोईया

ओर आगी रे चीलू छूटोए।

20 जिंयाँ खौल़दिया ऊईया आण्डिया ते ओर बल़दे ऊए नंगल़ो ते तुआँ निकल़ोआ,

तिंयाँ ई तेसरिया नासा ते निकल़ोआ।

21 तेसरे साओ ते कोईले सुलगी जाओए

ओर तेसरे मुंए ते आगी री लौ निकल़ोई।

22 तेसरिया क्याड़िया दे तागत बणी री रओई

ओर जो कोई तेसरे सामणे आओआ, से डरो रे मारे कबराई जाओआ।

23 तेसरे मासो पाँदे मास चढ़ेया राए

ओर आपू बीचे एड़ा जुड़ेया राए जो ईल्ली नि सकदा।

24 तेसरा दिल पात्थरो जेड़ा सख्त ए,

बल्कि चाक्किया रे थालले पाटो जेड़ा मजबूत ए।

25 जेबे से उठणे लगोआ, तेबे तागतबर मर्द बी डरी जाओए

ओर डरो रे मारे तिना री सुध-बुध लोप ऊई जाओई।

26 जे कोई तेस पाँदे तलवार चलाओ, तेबे बी तेस पाँदे कुछ असर नि ऊणा;

ओर ना भाल़े, ना बड़छे ओर तीरो साथे तेसरा मुकाबला करी सकोए।*

27 तेस सामणे लोआ बी पराल़ो जेड़ा ए

ओर पीतल़ सड़ी री लकड़िया जेड़ा ए।

28 तेसखे तीरो साथे नठाई नि सकदे,

गूलेलो साथे बाए रे पात्थर बी तेसखे पूए जेड़े लगोए।

29 डण्डेया री मार बी तेसखे पूए जेड़े लगोई, से बड़छेया रे चलणे रे वारो री आवाजा ते आसोआ।

30 तेसरे शरीरो रे थालले इस्से टूटे रे माट्टिया रे पांडेया री पैनी ठीकरिया जेड़े ए,

मानो चीकड़ो पाँदे से अल़ फेरोआ।

31 तेसरे समुद्रो दे तरदे ई पाणी उबल़णे लगोआ।

जेबे से डूगिया दे तैरोआ, तो पाणी पांडे दे तेलो जेड़ा बुलबुले पैदा करोआ।

32 जेबे से पाणिये बिछिए जाओआ, तो तेसरे पीछे रा पाणी चमकोआ।

एड़ा लगोआ कि पाणी सफेद ऊईगा दा।*

33 तेस जेड़ा नडरा प्राणी तरतिया पाँदे ओर कोई नि ए।

34 से सबी ते तागतबर जानवरा ते बी तागतबर ए।

से सबी जंगल़ी जानवरा रे राजे जेड़ा ए।