अय्यूब 22

एलीपजो रा आरोप

1 फेर तेमान शईरो रे रणे वाल़े एलीपजे ज्वाब दित्तेया,

2 "एक माणूं जो कुछ बी करी सकोआ से परमेशरो रिया तँईं कुछ बी किमती नि ए।

एक अक्लमंद माणूं बी परमेशरो री मताद नि करी सकदा।"

3 क्या तेरे तार्मिक ऊणे ते सर्वशक्तिमान परमेशर सुख पाई सकोआ?

तेरे खरे चाल-चलणो ते क्या तेसखे कोई फायदा ऊई सकोआ?

4 एतेरे बारे दे सोचो कि परमेशर तुसा खे सजा कऊँ देओआ।

एड़ा इजी रिया तँईं नि ए कऊँकि तूँ एक पला माणूं ए।

5 ना! एड़ा इजी रिया बजा ते ए कऊँकि तूँ एक बुरा माणूं ए।

ओर तैं इतणे गल़त काम करी राखे कि कोई तिना री गिणती नि करी सकदा। इजी बजा ते से ताखे सजा देणे लगी रा।

6 तैं तो आपणे पाईए रा बन्दक बिना बजा ते राखी ला रा

ओर तैं तो नांगेया माणूंआ रे बी टाल्ले खोली ते रे।

7 तैं थके रे माणूंआ खे पीणे खे पाणी नि दित्तेया

ओर पूखेया माणूंआ खे रोटी देणे ते ना कित्ती।

8 तूँ, अय्यूब, एक तागतबर माणूं था ओर तांगे जमीन थी।

पर जो कुछ तेते जमीना दे पजो था, से सब तैं आपणे आपू गे राखी ला।

9 तैं ना सिर्फ बिदुआ री मताद करने ते ना कित्ती,

बल्कि अनाथ लुटे ओर तिना साथे गल़त बर्ताव बी कित्तेया।

10 इजी बजा ते तेरे चऊँ कनारे फन्दे लगी रे

ओर अचाणक डरो रे मारे तूँ कबराणे लगी रा।

11 तेरा प्रयासा न्हेरे दे बदली गा रा; इजी खे तांते दिशदा नि;

ओर तूँ विनाशो रिया बाढ़ा रे डूबणे लगी रा!

12 परमेशर स्वर्गो दे रओआ, जो तारेया ते पोरे आ।

तेथा ते से तरतिया पाँदे ऊणे वाल़िया सबी चीजा खे देखी सकोआ।

13 तेबे तूँ बोलेया, "परमेशर क्या जाणोआ?

क्या तेस अन्दकूप न्हेरे बीचा ते ऊई की न्याय करना?

14 काल़े बादल़ा साथे से एड़ा टकेया रा रओआ कि से कुछ नि देखी सकदा,

से तो सर्गो पाँदे ई चलदा-फिरदा रओआ।"

15 अय्यूब, क्या तां तेसा ई पुराणिया बाटा रे चलदे रणा,

जिदे सेयो अनर्थ करने वाल़े माणूं चलदे रओ?

16 जेबे सेयो एबु जवान ई थे तेबुई अचाणक तिना री मौत ऊई गी;*22:16 बखतो ते पईले मौत सेयो एड़े राची गे

जेड़े बाढ़ आऊणे पाँदे सब कुछ राची जाओआ।

17 तिने परमेशरो खे बोलेया था, "आसा ते दूर ऊई जा!

ओर ये बी बोलेया कि सर्वशक्तिमान परमेशर म्हारा क्या करी सकोआ?"

18 पर परमेशर ई था जिने तिना रे कअरा खे खरिया चीजा ते परी ता था,

इजी रिया खातर आऊँ ये नि समजणे लगी रा कि दुष्ट लोक एड़ा बचार कऊँ करोए।

19 पर जेबे परमेशर दुष्टा खे सजा देओआ, ओर बेकसुर लोक ये देखोए, तो सेयो खुश ओए,

ओर सेयो दुष्टा रा मजाक करदे ऊए आसोए।

20 सेयो बोलोए कि जो दुश्मण म्हारे खलाफ उठे थे,

तिना रा नाश ऊईगा ओर तिना री तअन-दौलत फूखी की नाश ऊई गी।

21 इजी री खातर अय्यूब, परमेशरो साथे मेल-मलाप करी लओ तेबे ताखे शान्ति मिलणी;

इजी ते तेरी पलाई ऊणी।

22 तूँ सुण की परमेशर ताखे क्या करने खे बोलोआ;

फेर तिना खे आपणे मनो दे याद राख।

23 जे तूँ सर्वशक्तिमान परमेशरो रिया तरफा खे फिरी की नेड़े जाएगा

ओर आपणे डेरे ते बुरे काम दूर करेगा, तो तूँ बणी जाणा।

24 जे तूँ आपणी कीमती चीजा खे तूड़ा रे बराबर, बल्कि

ओपीर देशो रा सूईना बी नाल़ो रे पात्थरा जेड़ा समजे।*22:24 ओपीर सूईने री अच्छी किस्मा खे दर्शाओआ। ओपीर एक एड़िया जगा रा नाओं ए जो आपणे सूईने रिया तँईं जाणेया जाओ था।

25 तो सर्वशक्तिमान परमेशर आपू तुसा रिया तँईं सूईना

ओर किमती चाँदी बणी जाणा।

26 तेबे ताखे सर्वशक्तिमान परमेशरो ते सुख मिलणा

ओर तूँ परमेशरो रे नेड़े नशंग जाई सकेया।

27 तां तेसते प्रार्थना करनी ओर तेस तेरी प्रार्थना सुणनी;

ओर तां तेसरिया तँईं आपणी मान्नता पुरिया करनिया।

28 जो गल्ल तां ठाणी लणी, तिदे तूँ कामयाब बी ऊई जाणा

ओर तेरी बाट प्रयासे साथे चमकी री रणी।

29 चाए बखत बुरा ओ तेबे बी तां बोलणा कि अच्छा ऊणा,

कऊँकि परमेशर नम्र माणूंआ खे बचाओआ।*22:29 मत्ती 23:12,1 पत 5:6, नसी 29:23

30 बल्कि जो निर्दोष नि ओ तेसखे बी से बचाओआ,

तेरे अच्छे कामा रिया बजा ते तूँ बचाया जाणा।