1 राजा दाऊदे इस्राएलो रे सारे परदाना खे, मतलब गोत्रा रे परदान ओर राजे री सेवा करने वाल़े दलो रे परदाना खे ओर जो ह्जार सिपाईया पाँदे सेनापति ओर सौ सिपाईया पाँदे सेनापति थे ओर राजा ओर तेसरे पाऊआ रे डांगर बगैरा सब तअन-सम्पत्तिया रे अधिकारी, सरदार ओर वीर ओर सारे शूरवीर यरूशलेम शईरो दे बुलाए। 2 तेबे दाऊद राजा खड़े ऊई की बोलणे लगेया, "ओ मेरे पाईयो! ओर ओ मेरी प्रजा रे लोको! मेरी सुणो, मेरी इच्छा तो थी कि यहोवे रे वादे रे सन्दूको खे ओर आसा लोका रे परमेशरो रे पैरा री चौकिया खे राम करने खे एक मन्दर बणाऊँ ओर मैं तिजी खे बनाणे री त्यारी बी कित्ती थी।" 3 पर परमेशरे माखे बोलेया कि तूँ मेरे नाओं रा मन्दर नि बणाई सकदा, कऊँकि तूँ युद्ध करने वाल़ा ए ओर तैं खून बाह्यी राखेया। 4 तेबे बी इस्राएलो रे यहोवा परमेशरे मेरे बाओ रे सारे कराने बीचा ते आऊँ ई चूणेया, ताकि इस्राएलो रा राजा सदा बणेया रा रऊँ, मतलब तिने यहूदा खे परदान ऊणे खे ओर यहूदा रे कराने बीचा ते मेरे बाओ रा कराना‍ चूणी ला ओर मेरे बाओ रे पाऊआ बीचा ते से माखे ई सारे इस्राएलो रा राजा बनाणे खे खुश ऊआ। 5 यहोवे माखे बऊत पाऊ देई राखे। तिने मेरे सबी पाऊआ बीचा ते सुलैमान चुणेया, ताकि से इस्राएलो रे परमेशरो रे राज्य रे सिंहासनो पाँदे बैठो। कऊँकि इस्राएल देशो पाँदे यहोवे रा ई राज था। 6 ओर तिने माखे बोलेया, "तेरे पाऊ सुलैमानो ई मेरा मन्दर ओर आँगण बनाणा, कऊँकि मैं से चूणी ला रा कि से मेरा पाऊ ठईरो ओर आऊँ तेसरा बाओ ठईरूँ। 7 ओर जे से मेरी आज्ञा ओर नियम मानणे खे आज-काल जेड़ा ए तेड़ा ई मजबूत रओ, तो मां तेसरा राज्य सदा बणाया दा राखणा।" 8 इजी री खातर एबे तुसे इस्राएलो रे सामणे, मतलब यहोवे री मण्डल़िया रे सामणे ओर आपणे परमेशरो सामणे, आपणे परमेशर यहोवे री सारी आज्ञा खे मानो ओर तिना पाँदे त्यान देंदे रओ; ताकि तुसे एस अच्छे देशो रे अधिकारी बणे रे रओ। ओर एते जमीना खे आपू ते बाद आपणे कुलो रे लोका खे तिना री आपणी जमीन ऊणे खे छाडी देयो।

9 "ओ मेरे पाऊ सुलैमान! तूँ आपणे बाओ रे परमेशरो रा ज्ञान राख ओर खरे मनो ते ओर खुश ऊई की तेसरी सेवा करदा रओ; कऊँकि यहोवा मनो खे परखोआ ओर जाणोआ कि माणूंए रे मनो दे क्या ए, तिजी रे बारे दे बी समजोआ। जे तूँ यहोवे रे नेड़े जाएगा, तो से ताखे मिलणा; पर जे तूँ तेसखे छाडी दे, तो तेस तूँ सदा खे छाडी देणा। 10 एबे चौकस रओ, ओर याओ बानी की यहोवे रे मन्दरो खे बनाणे रे कामो दे लगी जा, कऊँकि तिने तूँ एस कामो खे करने खे चूणी ला रा, जो कि पवित्र जगा ठईरनी।"

11 तेबे दाऊदे आपणे पाऊ सुलैमानो खे मन्दरो रे बरांडे, कमरे, पण्डार, अटारिया, पीतरले कमरे ओर प्राश्चितो रे टकणे री जगा रा नमूना, 12 ओर यहोवे रे मन्दरो रे आँगणो ओर चऊँ कनारले कमरे ओर परमेशरो रे मन्दरो रे पण्डार ओर पवित्र कित्ती री चीजा रे पण्डार, जो-जो नमूने तेसखे परमेशरो री आत्मा री प्रेरणा ते मिले थे, सेयो सब देईते। 13 फेर पुरोईत ओर लेविया रे दल, ओर यहोवे रे मन्दरो री सेवा रे सारे काम ओर यहोवे रे मन्दरो री सेवा रे सारे समान, 14 मतलब सबी प्रकारा री सेवा रे कामा खे सूईने रे पांडेया रिया तँईं सूईना तोली की ओर सब प्रकारो री सेवा रे कामा खे चाँदिए रे पांडेया खे चाँदी तोली की, 15 ओर सूईने री दीवटा खे ओर तिना रे दिऊएया खे हर एकी खे एक-एक दीवट ओर तेतेरे दिऊए रा सूईना तोली की ओर चाँदिए रे दीवटा खे एक-एक दीवट ओर तिना रे दिऊए री चाँदी, एक-एक दीवटो रे कामो रे मुताबिक तोली की, 16 ओर पेंटा री रोटिया री मेजा खे एक-एक मेजो रा सूईना तोली की ओर चाँदिए री मेजा खे चाँदी, 17 ओर शुद्ध सूईने रे कांडे, कटोरे ओर प्याले ओर सूईने रिया कटोरिया खे एकी-एकी कटोरिया रा सूईना तोली की ओर चाँदिए री कटोरिया खे एक-एक कटोरिया री चाँदी तोली की, 18 ओर तूपो री बेदिया खे तपाया रा सूईना तोली की, ओर रथ, मतलब यहोवे रे वादे रा सन्दूक टकणे खे ओर पंख फैलाए रे करूबा रे नमूनेया खे सूईना दित्तेया।

19 दाऊदे बोलेया, "मैं यहोवे री सामर्था ते जो माखे ज्ञान मिलेया, ये सब जाणी-बूजी की लिखी ता रा।" 20 तेबे राजा दाऊदे आपणे पाऊ सुलैमानो खे बोलेया, "याओ बान ओर मजबूत ऊई की एस कामो खे करने खे लगी जा। डर नि ओर तेरा मन कच्चा नि ओ, कऊँकि यहोवा परमेशर जो मेरा परमेशर ए, से तां साथे ए ओर जदुओ तक यहोवे रे मन्दरो दे जितणा काम करना ऊगा, से नि ऊई चुकोगा, तदुओ तक तेस ना तो ताखे तोखा देणा ओर ना तूँ छाडणा। 21 ओर देख, परमेशरो रे मन्दरो रे सारे कामो खे पुरोईत ओर लेविया रे दल बणाई राखे ओर हर प्रकारा री सेवा खे सबी प्रकारा रे काम खुशिया साथे करने खे अक्लमंद मर्दा बी तेरा साथ देणा ओर परदान ओर सारी प्रजा रे लोका बी जो कुछ तां बोलणा, सेई करना।"