अय्यूबो रा सोपरो खे ज्वाब
1 तेबे अय्यूबे आपणे तीऊँ दोस्ता खे ज्वाब दित्तेया,
2 "तुसा लोका खे एड़ा लगोआ कि तुसे लोक सब कुछ जाणोए।
ओर सोचोए कि तुसा रे मरने ते बाद कोई ओर अक्लमंद नि ऊणा इदे कोई शक नि ए कि तुसेई माणूं ए ओर जेबे तुसे मरने तेबे अक्ल बी चली जाणी।"
3 पर तुसा जेड़ी मांदे बी समज ए,
आऊँ तुसा लोका ते कुछ कम अक्लमंद नि ए,
जो गल्ला तुसे बोलिया, तिना खे कुण नि जाणदा।
4 मेरे दोस्त बी मां पाँदे आसोए;
सेयो मजाक उडाओए,
जेबे कि आऊँ तर्मी ओर निर्दोष आ; पर एक बखत था
जेबे परमेशर मेरी प्रार्थना रा उतर देया करो था।
5 तुसा जेड़े लोक जिना खे कोई परेशानी नि ए, सेयो मेरा मजाक उडाओए;
सेयो मां जेड़े तिना लोका रा ओर दु:खो रा कारण बणोए जो पईले ते ई जादा कष्ट चेलेया करोए।
6 दूजेया लोका खे लुटणे वाल़े लोक आपणे कअरो दे सई-सलामत ए।
सेयो परमेशरो खे गुस्सा चढ़ाओए। पर तिना खे लगोआ कि तिना रे देवते सेयो सई-सलामत राखणे।
7 पर डांगरा ते तो पूछ ओर तिना ताखे सखाणा
ओर तुँ सर्गो रे पंछिया ते पूछ ओर तिना तांगे बताई देणा।
8 तरतिया पाँदे त्यान देओ, तेबे डाल़-बूटेया ते ताखे शिक्षा मिलणी
ओर समुद्रो रिया मछलिया बी तांगे परमेशरो रे बारे दे बताणा।
9 इना सबी गल्ला खे सब जाणोए,
कि प्रभुए ई आपणे आथो साथे ये दुनिया बणाई राखी।12:9 रोमी 1:20
10 एकी-एकी माणूंए री आत्मा परमेशरो रे आथो दे रओई ओर
एकी-एकी माणूंए खे जिन्दगी देणे रा प्राण परमेशरो रे आथो रे रओआ।
11 जिंयाँ जीबा साथे रोटिया रा स्वाद चाखेया जाओआ,
तिंयाँ ई कान वचना खे परखोए।
12 स्याणे माणूं अक्लमंद ओए
ओर जो जादा उम्रा वाल़े ओए सेयो समजदार इजी खे माने जाओए कऊँकि तिने आपणियां जिन्दगिया रे बऊत जादा अनुभव पाई राखेया।
13 परमेशरो रेई बुद्धि ओर सामर्थ पाई जाओई;
योजना ओर समज तेसदे ई पाई जाओई।
14 देखो, जे परमेशर केसी चीजा खे तोड़ी देओ तो कोई बी तिजी खे फेर बणाई नि सकदा;
ओर जेसखे परमेशर जेला दे बन्द करी देओ तो तेसखे कोई बारे नि निकाल़ी सकदा।12:14 प्रकाशित 3:7
15 देखो, जेबे परमेशर बरखा खे रोकी की राखोआ तो नाल़ो रा पाणी सूकी जाओआ;
फेर जेबे से सर्गो ते पाणिए री बरखा करोआ, तेबे तरतिया पाँदे बाढ़ आई जाओई।
16 परमेशरो गे पूरी तागत ए; तेसखे कोई नि अराई सकदा,
तोखा खाणे वाल़ा ओर तोखा देणे वाल़े इना दूई पाँदे सेई राजा ए।
17 से मंत्रिया खे लूटी की गुलामिया रे लई जाओआ
ओर न्याय करने वाल़ेया रिया अक्ला खे असफल करी देओआ।
18 से राजेया रा अक्क खत्म करी देओआ
ओर तिना खे बन्दी बी बणाई देओआ; तिना रे लको दे गुलामिया रे बन्दन बानोआ।
19 से पुरोईता खे लूटी की गुलामिया रे लई जाओआ
ओर तागतबरा खे उल्टी देओआ।
20 से परोसेया जोगे माणूंए ते बोलणे री शक्ति
ओर बुजुर्गा खे सोचणे-समजणे री तागता ते वंचित करी देओआ।
21 से परदाना खे बेज्जतिया जोगा करी देओआ
ओर तागतबरा खे कमजोर करी देओआ।
22 से न्हेरे रचे दे गुप्त षड़यन्त्रा खे प्रकट करी देओआ
ओर अन्दकूप न्हेरे खे बी प्रयासे दे बदली देओआ।
23 से देशा रिया जातिया खे महान बणाओआ ओर तिना खे नाश बी करी देओआ;
से तिना खे फैलाओआ ओर गुलामिया रे लई जाओआ।
24 से तरतिया रे खास लोका री बुद्धि खत्म करी देओआ
ओर तिना खे सुनसाण जगा रे जेती बाट नि ए, पटकाई देओआ।
25 सेयो बिना प्रयासे ते न्हेरे दे तोपदे ऊए फिरदे रओए
ओर परमेशर तिना खे एड़ा बणाई देओआ कि सेयो नशेड़िये
जेड़े लड़खड़ांदे ऊए हांडोए।