अय्यूब 39

1 "क्या ताखे पता ए कि पाह्ड़ो पाँदे जंगल़ी बाकरिया बच्चे कदी देओईया?

या कदी ईरणियां बच्चे पैदा करोईया, तेबे क्या तूँ देखदा रएया?

2 क्या तूँ तिना रे गर्भो रे मीन्ने गिणी सकेया,

क्या तूँ तिना रे बच्चे पैदा करने रा बखत जाणेया?

3 क्या ताखे पता ए कदी सेयो चूकी की आपणे बच्चेया खे पैदा करोईया,

ओर सेयो आपणियां पीड़ा ते छूटी जाओईया?

4 तिना रे बच्चे तगड़े ऊई की खुले मैदानो रे बढ़दे जाओए;

तेबे सेयो जंगल़ो खे निकल़ी जाओए ओर दुबारा आपणियां माया गे वापस नि आऊँदे।

5 बणो रा गह्दा आजाद करी की किने छाडी राखेया?

किने तेसरे बन्दन खोली राखे?

6 मैं ई तेसखे रणे रिया तँईं सूकी जमीना रा प्रदेश देई राखेया;

ओर मैं खारी जमीन तेसरे रणे रिया जगा खे देई राखी।

7 से शईरो रे आल्ले ते दूर रओए, ओर तिना खे कोई आपणे कब्जे दे नि करी सकदा

ओर ना तिना ते काम करवाई सकदा ए।

8 पाह्ड़ा पाँदे जो कुछ मिलोआ, से तिजी खे चरोआ;

से सबी किस्मा री अरयाली टोल़ोआ।"

9 "क्या जंगल़ी सांड तेरी सेवा करने रिया तँईं त्यार ऊणा?

क्या से तेरिया गवाईणी गे रणा?

10 क्या तूँ जंगल़ी सांडो खे रस्से रे बानी की डोरूआ रे तेसते अल़ चलाई सकेया?

क्या से डोरूआ दे तां पीछे-पीछे मईड़ा फेरी सकोआ?

11 क्या तूँ तेसरिया तागती पाँदे परोसा करी की

आपणे सारे मईणती रे कामा रा बोज तेस पाँदे छाडी सकेया?

12 क्या तां तेसरा परोसा करना, ताकि से तेरा नज्ज कअरे ल्याओ

ओर तेरे खल्याणो रा नज्ज कट्ठा करो?"

13 शुतुरमुर्गी अण्डे देंदे बखते आपणे पंखा खे खुशिया साथे फैलाओई,

पर क्या तेसा रे ये पंख अण्डेया रिया तँईं तेसा रा प्यार प्रकट करोए?

14 कऊँकि से आपणे अण्डे जमीना दे राखी की तिना खे बेसाअरा छाडी देओई

ओर माट्टिया रेई तिना खे गर्म करोई;

15 ओर से इजी रा ख्याल नि राखदी कि से केसी रे पैरा साथे जिखी सकोए

या कोई बणो रा डांगर तिना खे मांडी सकोआ।

16 फेर से आपणे बच्चेया साथे एड़ा निर्दयी बर्ताव करोई कि मानो सेयो तेसा रे अए नि,

तेबे बी तेसा रा अण्डे देणे रा कष्ट निष्फल ऊई सकोआ, तेबे बी तेसा खे एसा गल्ला री फिकर ई नि रंदी।

17 कऊँकि मैं परमेशरे से नासमज बणाई राखी;

ओर मैं तेसा खे समजणे री शक्ति नि देई राखी।

18 जेस बखते से सीदी ऊई की उडणे रिया तँईं आपणे पंख फैलाओई,

तेबे से आपणी तेज चाला रिया बजा ते कोड़े ओर तेसरे सवारो खे कुछ पनि समजदी।

19 क्या तैं कोड़े खे तेसरी तागत देई राखी?

क्या तैं तेसरिया क्याड़िया दे बाबरिया वाल़े कणे बाल़ जमाई राखे?

20 क्या तूँ तेसखे टिड्डिया जेड़ी उटकणे री तागत देया?

तेसरे सड़यूँकणे री आवाज डराऊणी ओई।

21 जेबे से अथियारा साथे सजे रे दुश्मणा रा सामणा करने रिया तँईं निकल़ोआ तेबे से काअटिया रे टाप बाओआ,

ओर आपणियां तागती ते खुश रओआ।

22 से डरो रिया गल्ला पाँदे आसोआ ओर दुश्मणा ते कबरांदा नि

ओर तलवारी रे डरो ते पीछे नि अटदा।

23 तेस पाँदे तरकशो रे तीर बरसोए ओर चमकदा ऊआ सांग

ओर भाल़ा तेस पाँदे खड़खड़ाओआ।

24 तेबे से गुस्से रे मारे तरतिया खे निगल़ी जाओआ,

जेबे तेसखे रड़सिंगे री आवाज सुणोई, तेबे से आपणियां जगा पाँदे खड़ा नि रंदा।

25 जेबे-जेबे रड़सिंगा बजोआ, तेबे-तेबे से कोड़ा हिण-हिण करोआ

ओर युद्ध ओर सैना रे सेनापतिये री ललकार

ओर जयजयकार दूरो तेई सींगी लओआ।

26 "क्या तेरे समजयाणे ते बाज उडोआ

ओर दक्खणो रिया तरफा ते उडने रिया तँईं आपणे पंख फैलाओआ?"

27 क्या उकाब तेरे ऊक्मो ते ऊबे उड़दा जाओआ

ओर ऊच्चिया जगा दे आपणा कोअला बणाओआ?

28 से चट्टानी पाँदे रओआ ओर चट्टानी री चूँडिया पाँदे

ओर मजबूत जगा पाँदे आपणा बसेरा करोआ।

29 से आपणियां आखी साथे दूरो तक देखोआ,

तेथा ते से आपणे शकारो खे देखी लओआ।

30 उकाबो रे बच्चे बी खून चूसोए

ओर जेती मुड़दे पड़े रे रओए, तेती से बी ओआ*39:30 लूक 17:37, मत्ती 24: 28