1 अय्यूबे आपणे तिंऊँ दोस्ता खे आपणियां गल्ला ओर बी गईराईया ते बोलिया,

2 "परमेशरो री जिन्दगिया री कसम ए, आऊँ न्याय रिया नजरा ते निर्दोष था, फेर बी तिने माखे मौता री सजा दित्ती!

सर्वशक्तिमान परमेशरे मेरा प्राण दु:खी करी राखेया।

3 जदुए तक मांदे साआ आया करोआ,

जदुए तक परमेशरो रा साआ मेरिया नासा रे अया"

4 आऊँ ये बोलूँआ कि तदुए तक मेरे मुंए ते कोई बुरी गल्ल नि निकल़नी

ओर ना ई मां छल-कपटो री गल्ल बोलणी।

5 परमेशर नि करो कि आऊँ तुसा लोका खे सच्चा ठराऊँ,

जदुओ तक मेरे शरीरो ते मेरा प्राण नि निकल़ो, तदुओ तक मां आपणा खरा चाल-चलण आपू ते लग नि करना।

6 मैं आपणी तार्मिकता जोरे की पकड़ी की राखी रिये ओर मां से आथो ते नि जाणे देणी;

कऊँकि मेरे दिलो आऊँ पूरी जिन्दगी दोषी नि ठराणा।

7 आऊँ चाऊँआ कि परमेशर तिना सबी दुष्टा खे सजा देओ,

आऊँ चाऊँआ कि से तिना खे सजा देओ जो मेरे खलाफ खड़ा ओआ।

8 जेबे परमेशर तिना रे प्राण लई लओगा

जो परमेशरो खे नि मानदे, तेबे चाए तेसगे तअन बी ओ, तेबे बी तेसरी क्या उम्मीद रणी।

9 जेबे अधर्मी मुसीबता रे पड़ना,

तेबे क्या परमेशरो तेसरी दुहाई सुणनी?

10 क्या तेसखे सर्वशक्तिमान परमेशरो ते सुख मिलणा ओर क्या तेस

हर बखत परमेशरो खे आका पाणिया?

11 ओ मेरे दोस्तो, मां तुसा खे परमेशरो रे आथो रे कामा रे बारे शिक्षा देणी;

ओर मां सर्वशक्तिमान परमेशरो री गल्ला रा पेत तुसा ते नि छिपाणा।

12 देखो, तुसे सब के सब जो काम परमेशर महान सामर्था साथे करोआ, आपू देखी चूकी रे,

तेबे तुसे बेकार कऊँ सोचदे रओए?

13 आऊँ तुसा खे बताऊँआ कि परमेशरो एक बुरे माणूंए रे इस्से साथे क्या करना ओर किंयाँ सजा देणी।

14 चाए तिना रे बच्चे गिणतिया रे बढ़ी बी जाओ, तेबे बी सेयो तलवारी साथे मारे जाणे

ओर तिना री ल्वादा खे पेट परी की रोटी नसीब नि ऊणी।

15 जो लोक बची जाणे सेयो बमारिये की मरने,

ओर तिना रिया बिदुआ बी तिना रे मरने पाँदे शोग नि करना।

16 चाए तिने बऊत सारा चाँदी कट्ठा करी राखेया ओ,

ओर चाए तिने अणगिणत टाल्लेया रे टेर लगाई राखे ओ,

17 तिने बेशक सेयो त्यार करी राखे ऊगे, फेर बी सेयो तार्मिक माणूंआ ई पईनणे

ओर तेसरा बऊत सारा चाँदी निर्दोष लोका आपू बीचे बांडी लणा।

18 बुरा माणूं जो कअर बणाओआ, से गल़ाऊए रे जाल़ेया जेड़ा ओआ

ओर डोरूआ री रखवाल़ी करने वाल़े री चूँगड़िया जेड़ा ओआ।

19 दुष्ट माणूं माँजे पाँदे लेटे रे आपू खे अमीर महसूस करोआ, पर तेसरा चूठ सामणे आऊणा

ओर जेबे प्याग ऊणी तेबे से सारा पैसा चली जाणा।

20 आतंको अचाणक बाढ़ी जेड़े अमला करना;

राती दे पऊण-चूखाने से डवाई की लई जाणा।

21 तेबे पूर्वो ते एड़ी अवा आऊणी कि से दुष्ट माणूं तेसा तेसरे कअरो ते डवाई की लई जाणा

ओर तेसरा नाओं-नशाण सदा खे मिटी जाणा।

22 कऊँकि तेसा अवा* तेस पाँदे बिना तरस खाये बिपदा पाणिया,

तेबे तेस चाणा कि आऊँ एसरे आथो री पऊँचा ते नठी जाऊँ।

23 से अवा* एड़ी ए जेड़े कोई तिना री बेज्जती करने रिया तँईं चाड़ी बजाओआ,

जेती बी सेयो दौड़ोए, तिना खे बकोए।