1 अंतो दे अय्यूबे आपणा मूँ खोलेया ओर तेस दिनो खे शाप दित्तेया जेस दिने तेसरा जन्म ऊआ था।

2 अय्यूबे बोलेया,

3 से दिन नाश ऊई जाओ जिदे आऊँ पैदा ऊआ

ओर से रात बी जेबे बोलेया कि पाऊ ऊईरा।

4 ओ परमेशर, जेबे आऊँ पैदा ऊआ से दिन न्हेरा ऊई जाओ!

से दिन कदी बी याद नि रओ!

तिदे कोई प्रयासा नि ओ।

5 इजी खे न्हेरा ओर बऊत जादा न्हेरे वाल़ा दिन बणाओ;

इजी खे बादल़े की टकी देयो,

ओर सूरजो खे मटयाई देयो।

6 जेसा राती दे आऊँ गर्भो दे आया तेसा खे अन्दकूप न्हेरा केरी लओ;

साला रे दिना बीचे से खुशिया रा दिन नि मानेया जाओ

ओर ना मीन्नेया रे दिना दे तेस दिनो री दुबारा गिणती ओ।

7 सुणो, से रात बाँज ऊई जाओ;

तिदे खुशिया रे गाणे री आवाज नि सुणो

8 तेस दिनो खे जादूगरा खे स्राप देणे खे बोलो,

जो लिब्यातानो जेड़े समुद्रो रे दानवो खे वशो दे करना जाणोए।

9 तेस दिने तड़के रा तारा नि दिखो

तेसा* राती दे प्याग ऊणे री उम्मीद ई खत्म ऊई जाओ।

10 कऊँकि तेसे राती मेरिया माया री कोख बन्द नि कित्ती

ओर ना ई मेरिया नजरा ते कष्ट दूर कित्ते।

11 आऊँ गर्भो रेई कऊँ नि मरीगा?

पेटो ते निकल़दे ई मेरे प्राण कऊँ नि निकल़े?

12 मेरिये माये माखे जन्म कऊँ दित्तेया?

माखे माया रा दूद कऊँ पल़्याया?

13 जे आऊँ मरी जांदा तो एबे आऊँ चुपचाप पड़ेया रा रंदा,

आऊँ सया रा रणा था ओर शान्तिया साथे राम करदा रणा था।*

14 राजेया ओर मंत्रिया जेड़ा सया दा रंदा

जिने पुराणे मईल दुबारा बणवाए थे।

15 या आऊँ तिना राजकुमारा साथे ऊँदा जिना गे बऊत सारा सूईना था,

जिने आपणा कअर चाँदिए साथे परीता था;

16 या आऊँ बखतो ते पईले गई री टाल़ा रे बच्चे जेड़ा ऊँदा,

या एड़े बच्चे जेड़ा ऊँदा जिने

प्रयासा कदी देखेया ई ना ओ।

17 कब्रा दे दुष्ट लोक बुराई करना बंद करी देओए

ओर थकेया रेया खे राम मिलोआ।

18 तिदे कैदी कट्ठे सुखो साथे रओए

ओर मईणत करने वाल़ेया री सख्त आज्ञा नि सुणदे।

19 कब्रा दे छोटे-बड़े सब बराबर ए ओर तेती दास आपणे

स्वामिए ते आजाद रओआ।

20 जेबे जीवन मुश्किल ओर इतणा कड़ुआ ए

तो परमेशरे आऊँ कऊँ जिऊणे दित्तेया?

21 सेयो मौता खे न्याल़दे रओए, पर से आऊँदी नि;

ओर दबाया रा तअन टोल़ने वाल़ेया ते जादा सेयो मौता खे टोल़ोए।*

22 सेयो कब्रा रे पऊँची की खुश ओर बऊत मगन ओए।

23 जेबे परमेशरे आऊँ केरी ला दा ए,

ओर माखे बाट दिखणे नि लगी री,

तो आऊँ कऊँ जिऊणे लगी रा?

24 लाम्बे-लाम्बे साआ परना ई मेरी रोटी ए

ओर मेरा दु:ख पाणिए री ताअरा जेड़ा बह्यींदा रओआ।

25 जिना डराऊणिया गल्ला ते आऊँ डरूँआ, सेई मां पाँदे पड़ोई

ओर जिना हैरान करने वाल़िया गल्ला ते आऊँ डरूँआ, सेई मां पाँदे आई जाओईया।

26 माखे ना तो सुख ए, ना शान्ति ए, ओर ना ई राम मिलोआ,

पर मेरे दु:खो रा कोई अन्त ई नि दिशदा।