अय्यूब 33

अय्यूबो पाँदे एलीहूए रा पईला आरोप

1 ओ अय्यूब! तूँ एबे मेरिया गल्ला सुणी लओ

ओर मेरे सारे वचन त्यानो साथे सुण।

2 एबे मेरे मनो दे क्या ए तेस बताणे रिया तँईं आऊँ त्यार आ

3 मेरे शब्द मेरे दिलो री निष्कपटता बताओए;

जो ज्ञान आऊँ राखूँआ, से मां सच्चाईया साथे बोलणा।

4 आऊँ परमेशरो रिये आत्मे बणाई राखेया

ओर सर्वशक्तिमान परमेशरो रे साओ ते माखे जिन्दगी मिलोई।

5 जे तूँ माखे ज्वाब देई सकेया, तो दे;

मां सामणे आपणियां गल्ला खे एक-एक करी की बताणे खे खड़ा ऊई जा।

6 देख, परमेशरो री मौजुदगिया रे आऊँ बी तां जेड़ा ए,

आऊँ बी माट्टिया तेई बणाई राखेया।

7 देख, ताखे मांते डरने री जरूरत नि ए

ओर ना ई तूँ मेरे सवाला रे बोजो साथे दबणा।

8 तेरिया गल्ला माखे सुणने रे आई रिया

ओर मैं तेरिया गल्ला सुणी राखिया।

9 तूँ ये बोलेया, "आऊँ तो पवित्र ए, निरपराध ए ओर निष्कलंक ए;

ओर माँदे कोई पाप नि ए।

10 तुसे दावा करोए कि परमेशरे तुसे आपणे दुश्मण बणाई ले दे ए,

11 कि तिने तेरे पैर बानी की तेरी बाट रोकी ती दी ए।

12 पर अय्यूब, आऊँ ताखे ज्वाब देऊँआ, इजी गल्ला रे तूँ सच्चा नि ए,

कऊँकि परमेशर माणूंआ ते महान ए।

13 तूँ तेसरे खलाफ ये

कऊँ बोलेया कि से तेरी केसी बी गल्ला रा ज्वाब नि देंदा।

14 ओ अय्यूब सुण, परमेशर एक बार क्या, बल्कि दो बार बोलोआ,

पर लोक तेस पाँदे त्यान नि देंदे।

15 राती जेबे लोक सुती रओए तो परमेशर सुफने रे

ओर दर्शणो रे जरिए गल्ला करोआ,

16 कदी-कदी राती से आसा खे चतौणी देणे रिया तँईं

डराऊणे सुफनेया रा इस्तेमाल करोआ।

17 जेते कि से माणूंआ खे तिना री बुरिया बाटा ते रोको

ओर कमण्डो रे जाल़ो ते माणूंआ खे छुड़ाई लओ।

18 परमेशर तेसरे प्राणो खे गड्डे रे पड़ने ते बचाओआ;

ओर तेसरी जिन्दगिया खे तलवारी रे वारो ते बचाओआ।

19 परमेशर आसा खे रोग ओर शरीरो दे तकलीफ देई कि डांटोआ।

20 एथो तक की माणूंआ रा प्राण बमारिया रिया बजा ते रोटिया ते बी कृणा करने लगोआ;

ओर तेसरी पूखमरी जाओई।

21 तेसरा शरीर बऊत पतल़ा ऊई जाओआ, जेतेरिया बजा ते से कंकाल़ो जेड़ा दिशोआ,

ओर तेसरिया तेसरे आड्डिया जो पईले नि दिशो थिया एबे दिशणे लगी रिया ए।

22 तेबे से मौता रे नेड़े पऊँचणे ई वाल़ा ओआ

ओर तेसरा प्राण नाश करने वाल़ेया रे वशो दे ऊई जाओआ।

23 एक ह्जार स्वर्गदूता बीचा ते एक तेबे ये बोली की म्हारे बचाओ दे आओआ

कि आसे लोक निष्कपट ए।

24 परमेशर दया दखाओआ,

आसा खे बारे निकाल़ने रिया तँईं आज्ञा देओआ,

कऊँकि कीमत चुकाई राखी थी।

25 तेबे तेस माणूंए रा शरीर बाल़को रे शरीरो ते जादा तन्दरूस्त ओर मुलायम ऊई जाणा,

तेसरी जवानिया रे दिन फेर वापस आई जाणे।"

26 तेबे माणूंए परमेशरो ते प्रार्थना करनी ओर परमेशरो से ग्रईण करी लणा,

तेस खुशिया साथे परमेशरो रा दर्शण करना

ओर परमेशरो माणूंए री तार्मिकता जिंयाँ की तिंयाँ वापस करी देणी।

27 हर केसी सबी रे सामणे बोलणा,

"मैं पाप करी राखेया ए।

मैं ठीक नि कित्तेया, पर परमेशरे माखे माफ कित्तेया।

28 तिने मेरे प्राण मौती ते बचाया ओर आऊँ जिऊँदा सई-सलामत ए।"

29 अय्यूब, देख, परमेशर एड़े-एड़े काम माणूंआ री पलाईया रिया तँईं एक ई बार नि,

बल्कि बार-बार करोआ!

30 ओर हर बार परमेशर तेस माणूंए रे जीवनो खे मौती ते बचाओआ,

ताकि तेस माणूंए खे जीवन जिऊँणे दे खुशी मिलो।

31 ओ अय्यूब! त्यानो साथे मेरी गल्ल सुण;

चुप रओ, माखे ओर बोलणे दे।

32 जे तां कुछ बोलणा तो माखे ज्वाब दे;

बोल! कऊँकि आऊँ ताखे निर्दोष ठराणा चाऊँआ।

33 जे तांगे कोई जबाव नि ए

तो चुपचाप रओ ओर तूँ मेरी सुण; मां ताखे अक्ला रिया गल्ला सुनाणियां।