शूही बिल्ददो रा वचन
1 तेबे शूही शईरो रे बिल्ददे अय्यूबो खे दूजी बार ज्वाब दित्तेया ओर बोलेया,
2 "अय्यूब, तां कदुए तक गल्ला करनिया बन्द करनिया? जे तूँ गल्ला करना बन्द करी दे
ओर सुणे, तो आसे ताखे कुछ दसी सकूँए"
3 आसे लोक तुसा रिया नजरा दे डांगरा जेड़े कऊँ समजे जाऊँए ओर
आसे तुसा रिया नजरा दे मूर्ख कऊँ ए?
4 ओ अय्यूब, तूँ आपणे गुस्से ते आपणे आपू खे चोट देणे लगी रा
क्या तेरिया तँईं तरती ऊजड़ी जाणी
ओर चट्टान आपणियां जगा ते अटी जाणी?
5 तेबे बी दुष्ट माणूंआ रा दिऊआ बीजी जाणा
ओर तेतेरिया आगी रा प्रयासा नि चमकणा।
6 तेसरे डेरे रा प्रयासा न्हेरे दे बदली जाणा
ओर तेते पाँदला दिऊआ बीजी जाणा।
7 तिना रे मजबूत पैर कमजोर ऊई जाणे
ओर से आपणियां ई योजना रे जरिए ई रूड़ी जाणा।
8 से आपू आपणे पैरा खे जाल़ो रे फसाओआ,
से तोखेया रे गड्डेया पाँदे चलोआ।
9 तेसरी आड्डी फन्दे रे फसी जाणी
ओर से जाल़ो रे पखड़ी जाणा।
10 तेसखे फसाणे रिया तँईं फन्दे रिया रस्सिया जमीना दे
ओर जाल़ बाटा दे लकोई राखेया।
11 चऊँ कनारे ते डराऊणिया चीजा से डराणा
ओर तिना पीछे पड़ी की से नठाणा।
12 कई साल पईले सेयो अमीर थे पर एबे सेयो पूखे ए। जे सेयो गल़ती करोए,
तो तिना खे कईया दु:खा रा सामणा करना पड़ना।
13 तिना रे शरीरो दे ना ठीक ऊणे वाल़ी बमारी बढ़ोई
ओर तिना रे आथा पैरा रा मास सड़ने लगोआ।
14 तिना पापिया खे एक खतरनाक मौत मरने रिया तँईं
तिना रे तम्बूए री सुरक्षा ते रगड़ेया जाणे।
15 तेबे तिना रे डेरे ओर तन-दौलत फूकी की स्वा बणाई देणी।
16 ओर सेयो तिना डाल़ा जेड़े बणी गे रे
जो जड़ी ते सुकी गे रे ए।
17 तरतिया पाँदा ते तिना री याद मिटी जाणी
ओर तरतिया पाँदे केथी बी तिना रा नाओं कदी नि सुणना।
18 सेयो जिऊँदेया रे देशो ते बारे काडी देणे,
ओर प्रयासे ते तेते जगा खे पेजी देणे जेती सदा न्हेरा ई रओआ।
19 तेसरे टब्बरो रे तेसरा कोई पाऊ-पोता नि रणा
ओर जेती से रओ था, तेती कोई बचेया रा नि रणा।18:19 अय्यू. 27:14
20 पूर्वा ते लई कि पच्छमा तक सारे लोक18:20 जेड़े पईले रणे वाल़े तेसरे विनाशो रे दिनो ते डरने, तेड़े ई तेसते पीछे रणे वाल़े बी डरने। तिना री दुर्दशा रे बारे दे सुणी की थुरने लगणे।18:20 पजन 37:13
21 कोई शक नि ए कि पापी लोका साथे एड़ा ओआ,
ओर जो लोक परमेशरो खे छाडी देओए,
तिना रा एड़ा ई अन्त ओआ।