1 तेबे यहोवे माखे बोलेया, "यिर्मयाह, जे मूसा ओर शमूएल बी मेरिया नजरा सामणे खड़े ऊई जाओ, ओर यहूदा प्रदेशो रे लोका रिया तँईं दया री पीख माँगो, तेबे बी मेरा काल़जा इना रिया तँईं नि पीगल़ना। इना खे मेरे सामणे ते दूर करी देयो ओर बारे नठाई देयो। 2 जे सेयो तांते पूछो कि आसे लोक केयी जाईए? तो बोलणा कि यहोवा ईंयाँ बोलोआ कि जो मरने वाल़े सेयो मरने खे चली जाओ, जो तलवारी साथे मरने वाल़े ए, सेयो तलवारी साथे मरने खे, जो अकाल़ो साथे मरने वाल़े ए, सेयो अकाल़ो साथे मरने खे ओर बाकी जो लोक गुलाम बणने खे लग करी राखे सेयो परदेशिया गुलामिया दे लई जाणे।"*15:2 प्रका. 13:10 3 यहोवा बोलोआ मां तिना रे खलाफ चऊँ प्रकारा रे नाश ठराणे, मारने खे तलवार, फाड़ने खे कुत्ते, नोचणे खे सर्गो रे पंछी ओर फाड़ी की खाणे खे बणो रे जानवर, यहोवे री येई बाणी ए।*15:3 प्रका. 6:8 4 ये हिजकिय्याह रे पाऊ यहूदा रे राजा मनश्शे रे तिना बुरेया कामो रिया बजा ते ऊणा जो तिने यरूशलेम शईरो रे करी राखे ओर मां सेयो एड़े करने कि सेयो तरतिया रे राज-राज रे मारे-मारे फिरने। 5 यहोवा पूछोआ, "ओ यरूशलेम शईरो रे लोको, तुसा पाँदे केस तरस खाणा ओर तुसा रिया तँईं केस दु:ख करना? तेरा सुखसाँद पूछणे खे कोई तुसा री तरफा खे नि मुड़ना। 6 यहोवे री ये बाणी ए कि तुसे माखे छाडी की पीछे अटी गे रे, इजी री खातर मां तुसा पाँदे आपणा आथ बढ़ाई की तुसा रा नाश करना, कऊँकि आऊँ तरस खांदा-खांदा थकी गा रा। 7 मैं सेयो देशो रे बड़े द्वारो पाँदे सूपो साथे फड़ाकी राखे, तिने बुरी बाट नि छाडी, इजी बजा ते मैं आपणी प्रजा बिना कराने री करी ती ओर नाश बी करीते। 8 तिना री बिदुआ मां सामणे समुद्रो रे बालूआ री कणियां जेड़िया बऊत ऊईगिया रिया, तिना रे जवाना री माया रे खलाफ त्याड़िया ई मैं लूटेरे ठराई राखे, मैं सेयो अचाणक मुसीबता रे पायी ते ओर डराईते। 9 आपणे साता बच्चेया खे खोणे वाल़ी माये बी बेओश ऊईगी ओर प्राण छाडी ते, तेसा रा सूरज त्याड़िया ई डूबी गा, तेसा री उम्मीद टूटी गी ओर तेसा रा मूँ काल़ा ऊईगा ओर जो रयी गे रे सेयो बी मां दुश्मणा री तलवारी साथे मरवाई देणे," यहोवे री येई बाणी ए।

10 मैं आपणी माया ते बोलेया, मां पाँदे हाय, कि तैं माखे एड़े माणूंए खे जन्म दित्तेया जो दुनिया दे लड़ाई ओर बईस करने वाल़ा ठईरी रा! ना तो मैं ब्याजो पाँदे पैसे दित्ते ओर ना केसी ते त्वार लई राखेया, तेबे बी लोक माखे कोसोए। 11 यहोवे बोलेया, "यिर्मयाह, मां तेरी पलाईया रिया तँईं तूँ पक्का मजबूत करना, मुसीबत ओर कष्टो रे बखते बी मां दुश्मणा ते तेरी प्रार्थना करवाणी। 12 यिर्मयाह, तूँ जाणेया कि कोई बी माणूं लोए रे टुकड़े खे चूर-चूर नि करी सकदा। मेरे बोलणे रा मतलब तेस लोए ते ए जो उत्तर दिशा रा ए ओर कोई माणूं पीतल़ी रे टुकड़े खे चूर-चूर नि करी सकदा। 13 तेरे सारे पापो रिया बजा ते जो सारे देशो रे ऊई रे, मां तेरी तअन सम्पत्ति ओर खजाने, बिना दाम दित्ते लुटणे देणे। 14 यहूदा रे लोको, मां तुसे तुसा रे दुश्मणा रे दास बनाणे। तुसे तेस देशो रे दास ऊणे जेतेखे तुसे नि जाणदे, कऊँकि मेरे रोषो री आग पड़की री ओर तेसा तुसे फूकी देणे।"

15 तेबे मैं बोलेया ओ यहोवा, तूँ तो जाणेया, माखे याद कर ओर मेरी सम्बाल़ लई की मेरे सताणे वाल़े ते मेरा बदला लओ। तूँ सब्रो साथे रोष करने वाल़ा ए, इजी री खातर माखे नि चक, तेरिया तँईं ई मेरी बेज्जती ऊई री। 16 जेबे तेरे वचन मांगे पऊँचे, तेबे मानो मैं तिना री सुणी ली ओर तेरे वचन मेरे मनो री खुशी ओर आनंदो री बजा ऊए, कऊँकि ओ सेना रे परमेशर यहोवा, माखे तेरा बोलेया जाओआ। 17 तेरी छांए मां पाँदे ऊई, आऊँ मन बईलाणे वाल़ेया बीचे बैठी की खुश नि ऊआ, आऊँ तेरे आथो रे दबाओ ते कल्ला बैठेया, कऊँकि तैं आऊँ गुस्से साथे परी ता था। 18 मेरी पीड़ लगातार कऊँ बणी री रओई? मेरे जख़्मो री कोई दवा कऊँ नि ए? क्या तूँ सच्ची खे ई मेरिया तँईं तोखा देणे वाल़ी नदी ओर सूकणे वाल़े पाणिए जेड़ा ऊणा?

19 ये सुणी की यहोवे ज्वाब दित्तेया, "जे तूँ मांगे वापस आई जाए, तो मां फेर तूँ आपू सामणे खड़ा करना। जे तूँ जरूरी गल्ल बोले ओर नकम्मे खे ना बोले, तेबे तूँ मेरे मुंए जेड़ा ऊणा। सेयो लोक तेरी तरफा खे फिरने, पर तैं तिना रिया तरफा खे नि फिरना। 20 मां तूँ तिना लोका सामणे पीतल़ी री मजबूत दवाल बनाणा, सेयो तां साथे लड़ने, पर तां पाँदे प्रबल नि ऊणे, कऊँकि आऊँ ताखे बचाणे ओर तेरा उद्धार करने खे तां साथे ए, यहोवे री येई बाणी ए। मां तूँ दुष्ट लोका रे आथो ते बचाणा, 21 ओर हुड़दंगी लोका रे पंजेया ते छुड़ाणा।"