यिर्मयाह 19

टूटी दी सुराईया रा उदारण

1 यहोवे माखे एक ओर सन्देश देई की बोलेया; "यिर्मयाह, तूँ जाई की कुम्हारो ते माट्टिया री एक सुराई खरीदी लो ओर यहूदा रे परदान ओर बड़े पुरोईता बीचा ते बी कुछ साथे लई की, 2 हिन्नोमिया री तराईया रिया तरफा खे तेस बड़े द्वारो रे नेड़े चली जा जेती ठीकरे सेटोए ओर जो वचन आऊँ बोलूँ, तिना खे लोका गे प्रचार कर।" 3 यहोवे माखे ये बोलणे खे बोलेया, "तैं तिना खे ये बोलणा, ओ यहूदा प्रदेशो रे राजा ओर यरूशलेम शईरो रे सब रणे वाल़ेयो, यहोवे रा वचन सुणो। इस्राएलो रा परमेशर सेना रा यहोवा एड़ा बोलोआ कि आऊँ एसा काअटिया दे एड़ी मुसीबत पाणे वाल़ा ए कि जो कोई तिजी रे बारे दे खबर सुणोगा, तेस पाँदे सन्णाटा छायी जाणा। 4 तेबे ये ऊणा कऊँकि तुसे यहूदा रे लोके आऊँ छाडीता, ओर एते काअटिया दे दूजे देवतेया रिया तँईं, जिना खे ना तो सेयो जाणदे ओर ना तिना रे बुजुर्ग या यहूदा रे पुराणे राजा जाणो थे, तूप बाल़ेया ओर ये पराया करी ता ओर तिने ये जगा निर्दोषो रे खूनो साथे परी ती, 5 ओर बाल देवते खे ऊच्ची जगा बणाई की आपणे बाल-बच्चे बाल देवते खे बलि करीते, तेबे बी मैं कदी बी इजी री आज्ञा नि दित्ती, ना इजी री चर्चा कित्ती ओर ना ई कदी एड़ा मेरे मनो रे आया। 6 इजी बजा ते यहोवे री ये वाणी ए कि एड़े दिन आऊणे कि एसा जगा खे फेर तोपेत या हिन्नोमिया री तराई नि बोलेया जाणा, बल्कि खून कित्ती री तराई बोलेया जाणा। 7 ओर मां एते जगा रे यहूदा ओर यरूशलेम शईरो रे लोका री योजना बेकार करी देणी ओर सेयो तिना रे दुश्मणा रे आथो री तलवार चलवाई की काई देणे। तिना री लाशा मां सर्गो रे पंछिया खे ओर जमीना रे जीवजन्तुआ खे खाणे खे देणियां। 8 मां ये यरूशलेम शईर पूरी तरआ ते उजाड़ी देणा कि लोक एसखे देखी की डरने, जो कोई इसिये जाओगा, से एथो री मुसीबता देखी की हैरान ऊणा ओर डरना। 9 जेबे तिना रे दुश्मणा ओर तिना खे काणे वाल़ेया यरूशलेम शईर केरी लणा, ओर तेती खाणे-पीणे रा समान खत्म ऊई जाणा, तेबे मां तिना रे माठे-बेटिया रा मास तिना खे खुलाणा ओर एकी-दूजे रा मास बी खुलाणा।"

10 यहोवे माखे बोलेया, "यिर्मयाह, तेबे तैं से सुराई तिना माणूंआ सामणे तोड़ी देणी जो तां साथे जाणे, 11 ओर तिना खे बोलणा, सेना रा यहोवा ईंयाँ बोलोआ कि जिंयाँ ये माट्टिया रा पांडा जो टूटी गा रा, जेतेखे फेर बणाई नि सकदे, ईंयाँ ई मां एस देशो रे लोक ओर ये शईर तोड़ी देणा ओर तोपेत नाओं री तराईया रे इतणियां कब्रा ऊणिया कि कब्रा खे ओर जगा नि रणी।" 12 यहोवा ईंयाँ बोलोआ, "कि मां एते शईरो रे ओर इदे रणे वाल़ेया साथे एड़ा ई करना, मां ये शईर तोपेतो जेड़ा बणाई देणा। 13 यरूशलेम शईरो रे कअर ओर यहूदा रे राजेया रे मईल, जिना रे छतो पाँदे सूरज, चाँद ओर सर्गो रे तारे मानो सेयो देवता ए, तिना खे तूप बाल़ेया ओर दूजे देवतेया खे अर्घ दित्तेया, सेयो सारे तोपेतो जेड़े अशुद्ध ऊई जाणे।"*19:13 प्रेरि. 7:42 14 तेबे यिर्मयाह तोपेतो ते वापस ऊई की, जेती यहोवे से भविष्यबाणी करने खे पेजेया था, यहोवे रे मन्दरो रे आँगणो रे खड़ा ऊआ ओर सबी लोका खे बोलणे लगेया, 15 "इस्राएलो रा परमेशर, सेना रा परमेशर यहोवा ईंयाँ बोलोआ कि देखो, सबी गाँवो समेत यरूशलेमो रे एस शईरो पाँदे आऊँ एड़ी मुसीबत पाणा चाऊँआ जो मैं एते पाँदे ल्याऊणे खे बोली राखेया, कऊँकि इने हठ करी की मेरा वचन नि मानेया।"