यिर्मयाह 35

यिर्मयाह ओर रेकाबो रे वंशज

1 योशिय्याह रे पाऊ यहूदा प्रदेशो रे राजा यहोयाकीमो रे राजो दे यहोवे रिया तरफा ते ये वचन यिर्मयाह गे पऊँचेया, यहोवे माखे बोलेया, 2 "यिर्मयाह, रेकाबिया रे कराने गे जाई की तिना साथे गल्ला कर ओर तिना खे यहोवे रे मन्दरो रे एक कमरे दे लई जाई की तिना खे शराब पल़्या।" 3 तेबे मैं याजन्याह जो हबस्सिन्याह रा पोता ओर दूजे यिर्मयाह रा पाऊ था, तेसरे पाई ओर तेसरे पाऊ, मतलब रेकाबो रे वंशो रे सारे मर्द साथे लए। 4 आऊँ तिना खे यहोवे रे मन्दरो दे, यिग्दल्याह रे पाऊ हानान, जो यहोवे रा एक दास था, तेसरे कमरे दे ल्याया जो परदानो रे तेस कमरे नेड़े था ओर शल्लूमो रे पाऊ यहोवे रे मन्दरो रे खास द्वारो गे रखवाल़े मासेयाह रे कमरे पाँदे था। 5 तेबे मैं रेकाबो रे वंशो रे मर्दा खे शराबो साथे परेया दा टोकणा ओर कटोरे देई की बोलेया, "शराब पियो।" 6 पर रेकाबो रे लोके बोलेया, "आसा शराब कदी नि पीणा कऊँकि रेकाबो रे पाऊ योनादाबे जो म्हारा बुजुर्ग था आसा खे ये आज्ञा दित्ती थी, ‘ना तुसा ओर ना तुसा रे वंशो कदी बी शराब पीणा। 7 ना कअर बनाणा, ना बीज बाणा, ना अंगूरा रे बगीचे लगाणे ओर ना तिना रे अधिकारी ऊणा, पर पूरी जिन्दगी तम्बूआ देई रणा चाईयो, जे तुसे एड़ा करोगे तो तेते प्रदेशो दे ज्यादा बखतो तक रणे जेती तुसे एकी जगा ते दूजी जगा पाँदे कुमदे रओए।’ 8 इजी री खातर आसे रेकाबो रे पाऊ आपणे बुजुर्ग योनादाबो री गल्ल मानी की, तेसरी सारी आज्ञा रे मुताबिक चलूँए, ना आसे, ना म्हारी लाड़िए ओर ना ई म्हारे माठे-बेटिया कदी शराब पी ए, 9 ओर ना आसे कअर बणाई की तिना दे रंदे। आसे ना तो अंगूरा रे बगीचे, ना डोरू ओर ना बिऊ राखदे, 10 आसे तम्बूए देई रया करूँए ओर आपणे बुजुर्ग योनादाबो री गल्ल मानी की तेसरी सारी आज्ञा रे मुताबिक काम करूँए। 11 पर जेबे बाबेलो रे राजे नबूकदनेस्सरे यहूदा प्रदेशो पाँदे चढ़ाई कित्ती, तेबे आसे लोक यरूशलेम शईरो खे गये। आसे लोके आपू बीचे बोलेया, ‘आओ आसे लोक यरूशलेम शईरो दे जाऊँए। जेते कि आसे कसदी ओर अरामिया री सेना ते बची सकीये।’ इजी बजा ते आसे एबे यरूशलेम शईरो दे रऊँए।"

12 तेबे यहोवे रा ये वचन यिर्मयाह गे पऊँचेया, 13 इस्राएलो रे लोका रा परमेशर, सेना रा यहोवा ईंयाँ बोलोआ, "यिर्मयाह, जाई की यहूदा प्रदेशो रे लोका खे ओर यरूशलेम शईरो दे रणे वाल़े लोका खे बोलो कि यहोवे री ये बाणी ए कि, आऊँ यहोयादा, तुसा ते पुछूँआ कि तुसे मेरी गल्ल सुणने ते ओर मेरिया आज्ञा खे मानणे ते ना कऊँ करोए? 14 देखो, रेकाबो रे पाऊ योनादाबे जो आज्ञा आपणे वंशो खे दित्ती थी कि तुसे शराब नि पीणा से तो मानी राखी, एथो तक कि आजके दिनो तक बी सेयो लोक कोई शराब नि पींदे, सेयो आपणे बुजुर्गा री आज्ञा मानोए, पर आऊँ तुसा खे बड़ी कोशिश करी की बोलदा आई रा, तेबे बी तुसे मेरी नि सुणी। 15 इस्राएल ओर यहूदा रे लोको, आऊँ तुसा गे आपणे सारे दास नबिया खे बड़ी कोशिश करी की ये बोलणे खे पेजदा आई रा कि आपणी बुरी चाला ते फिरो, आपणे काम सुदारो ओर दूजे देवतेया पीछे जाई की तिना री आराधना नि करो, तेबे तुसे एते देशो दे जो मैं तुसा रे बुजुर्गा खे दित्तेया था, ओर तुसा खे बी देई राखेया, बसी सकोए। पर तुसे मेरी तरफा खे कान नि लगाया, ना मेरी सुणी। 16 देखो, रेकाबो रे पाऊ योनादाबो रे कराने तो आपणे बुजुर्गा री आज्ञा मानी, पर तुसे मेरी नि सुणी।" 17 इजी री खातर सेना रा परमेशर यहोवा, जो इस्राएलो रा परमेशर ए, ईंयाँ बोलोआ: देखो, यहूदा दे ओर यरूशलेम शईरो दे रणे वाल़ेया पाँदे जितणी मुसीबत ल्याऊणे री मैं चर्चा करी राखी, से तिना पाँदे एबे ल्याऊँआ, कऊँकि मैं तिना खे सुणाया। पर तिने नि सुणेया, मैं सेयो बुलाए, पर तिने ज्वाब नि दित्तेया।

18 तेबे भविष्यबक्ता यिर्मयाहे रेकाबो रे वंशो रे लोका खे बोलेया, "इस्राएलो रा परमेशर, सेना रा यहोवा तुसा खे ईंयाँ बोलोआ: कऊँकि तुसे आपणे बुजुर्ग योनादाबो री आज्ञा मानी, बल्कि योनादाबो री सारी आज्ञा मानी ओर जो कुछ तिने बोलेया तेतेरे मुताबिक काम कित्तेया, 19 इजी री खातर इस्राएलो रा परमेशर, सेना रा यहोवा ईंयाँ बोलोआ कि रेकाबो रे पाऊ योनादाबो रे कराने दे सदा एड़ा माणूं ऊणा जो मेरी सेवा करो।"