1 जातिया-जातिया रे बारे दे यहोवे रा जो वचन यिर्मयाह भविष्यबक्ते गे पऊँचेया, से ये था। 2 ये सन्देश मिस्र रे बारे दे। मिस्र रे राजा फिरौन नको री सेना जो फरात महासागरो रे कनारे पाँदे कर्कमीश शईरो दे थी ओर जो बाबेल रे राजा नबूकदनेस्सरे योशिय्याह रे पाऊ यहूदा रे राजा यहोयाकीम रे राज रे चौथे सालो रे जीती ला था, तेसा सेना रे बारे, 3 मिस्रो री सेना रे सेनापति जोरे की बोलोए, "आपणी बड़ी ओर छोटी ढाला खे त्यार करी की लड़ने खे नेड़े चली की आओ।" 4 ओ कोड़ेया रे सवारो आपणे कोड़ेया खे त्यार करो। कोड़ेया पाँदे चढ़ी की टोप पईनी की खड़े ऊई जाओ, भाल़ेया खे पैना करो, झिलम पईनी लो! 5 यहोवा बोलोआ, "आऊँ मिस्रो री सेना खे बेचैन कऊँ देखूँआ? सेयो डरो रे मारे पीछे अटी गे! तिना रे सिपाई रूड़ाईते ओर सेयो जल्दबाजी करी की नठीगे, सेयो पीछे देखदे पनि, कऊँकि यहोवे री ये बाणी ए कि चऊँ कनारे डर ई डर ए! 6 ना तेज दौड़ने वाल़े दौड़ी सकणे ओर ना मिस्री सेना बची सकणी, कऊँकि उत्तर दिशा रे फरात नदिया पाँदे सेयो ठोकर खाई की रूड़ी गे। 7 ये कुण ए, जो नील नदिया जेड़े, जेतेरा पाणी नदिया जेड़ा उछल़ोआ, बढ़ी की चलदा आओआ?"

8 मिस्र नील नदिया जेड़ा बढ़ोआ, तेते रा पाणी बड़ी नदिया जेड़ा उछल़ोआ। मिस्रे बोलेया, मां चढ़ी की तरती पाणिए री बाढ़ा जेड़े परी देणी, मां शईर तेथो रे रणे वाल़ेया समेत नाश करी देणा। 9 ओ मिस्री कोड़ेया रे सवारो आगे बढ़ो, ओ रथो पाँदे सवार ऊणे वाल़ेयो, बऊत तेज चलाओ! ओ ढाल पकड़ने वाल़े कूशी ओर पूती सिपाईयो, ओ धनुर्धारी लूदियो चली की आओ। 10 कऊँकि से दिन सेना रे परमेशर यहोवे रा बदला लणे रा दिन ऊणा, जिदे तेस आपणे बिरोदिया ते बदला लणा। तलवार रज्जी जाणी ओर तिना रा खून पी की रज्जी जाणी। कऊँकि उत्तर देशो रे फरात नदिया रे कनारे पाँदे, सेना रे परमेशर यहोवे रा यज्ञ ए। 11 ओ मिस्रो री कँवारी बेटियो, गिलादो दे जाई की बलसान औषधि लओ, तुसे बेकार ई लाज करोए, तुसे ठीक नि ऊणे! 12 कऊँकि सबी जातिया रे लोके सुणी राखेया कि तुसे नीच ऊईगे ओर देशो दे सबी तुसे रोंदे ऊए सुणी राखे। एक सिपाई दूजे सिपाईए साथे बजकणे लगी रे, ओर दोनो ई जमीना पाँदे रूड़ी जाओए। 13 यहोवे यिर्मयाह भविष्यबक्ते गे ये वचन बी बोलेया कि बाबेलो रे राजे नबूकदनेस्सरो मिस्र देश कऊँ नाश करना: 14 मिस्र देशो रे शईरा दे प्रचार करो ओर मिग्दोल शईरो दे सुणाओ, आ, नोप ओर तहपन्हेस शईरो दे सुणाई की ये बोलो कि खड़े ऊई की त्यार ऊई जाओ, कऊँकि तुसा रे चऊँ कनारे हर एक तलवारी साथे मरी चुकेया रा। 15 मिस्र, तेरे तागतबर सैनिक नाश कऊँ ऊईगे? सेयो इजी बजा ते खड़े नि रयी सके कऊँकि सेयो यहोवे तकेली ते।* 16 यहोवे तेरे सिपाईया खे ठोकर खुल़ाई, सेयो एकी-दूजे पाँदे रूड़े ओर सेयो एकी दूजे खे बोलणे लगे, "उठो, चलो, आसे अन्देर करने वाल़ेया री तलवारी रे डरो रे मारे आपणी-आपणी जन्म-भूमिया दे फेर वापस चलूँए। 17 तेती सेयो जोरे की आका पाई की बोलोए, मिस्रो रा राजा फिरौन सत्यानाश ऊआ, कऊँकि तिने आपणा बड़ा कीमती मोका खोयी ता।"

18 से महान राजा, जेसरा नाओं सेना रा यहोवा ए, तेसरी ये बाणी ए कि मेरी जिन्दगिया री कसम, जेड़ा ताबोर पाह्ड़ दूजे पाह्ड़ा दे ओर जेड़ा कर्मेल पाह्ड़ समुद्रो रे कनारे पाँदे ए, तेड़ा ई दुश्मण, जो मिस्रो पाँदे अमला करने आओआ, आऊणा। 19 ओ मिस्रो रे रणे वाल़े सबी लोको, गुलामिया दे जाणे खे आपणा समान त्यार करो, कऊँकि नोप शईर उजाड़ ओर एड़ा स्वा ऊई जाणा कि तिदे कोई नि रणा। 20 मिस्र बऊत सुन्दर बाच्छी तो आए, पर उत्तर दिशा ते शक्तिशाली दुश्मण राजा एसा पाँदे अमला करने आऊणे लगी रा। जेड़े एक माक्खी गायी पाँदे अमला करोई। 21 मिस्रो रे जो सिपाई कराये पाँदे आई रे, सेयो गवाईणी रे पाल़े-पोषे रे बाच्छूआ जेड़े ए, तिने मूँ मोड़ेया ओर एक साथे नठीगे, सेयो खड़े नि रये, कऊँकि तिना री मुसीबता रा दिन ओर सजा रा दिन आई गा रा। 22 मिस्रो रे सिपाईया रे नठणे री आवाज सापो जेड़ी आऊल़े-आऊल़े नठणे जेड़ी ए, कऊँकि सेयो डाल़ा खे बाडणे वाल़ेया री सेना ओर क्वाड़िया लई की तेसरे खलाफ चढ़ी की आऊणे। 23 यहोवे री ये बाणी ए कि चाए तिना रा बण कितणा बी कणा ओ, पर तिना से बाडी देणा, कऊँकि दुश्मण सिपाई टिड्डिया ते बी जादा अणगिणत ए। 24 मिस्रो रे लोक शर्मिंदा ऊणे, सेयो उत्तर दिशा रे दुश्मण देशो रे लोका रे वशो रे करी देणे। 25 इस्राएलो रा परमेशर, सेना रा यहोवा ईंयाँ बोलोआ, "देखो, आऊँ नौ शईरा दे रणे वाल़ेया समेत, आमोन जेसखे तेबेस देवता बोलेया जाओआ, फिरौन राजा, मिस्र देशो खे तेसरे देवतेया ओर राजेया समेत ओर फिरौनो खे तिना समेत जो तेस पाँदे परोसा राखोए, सजा देणे वाल़ा ए। 26 मां सेयो बाबेलो रे राजा नबूकदनेस्सर ओर तेसरे अधिकारिया रे वशो दे करी देणे, जो तिना खे काणा चाओए। पर जेबे बऊत बखत ऊई जाणा, तेबे मिस्रो रे फेर लोक बसाए जाणे, यहोवे री ये बाणी ए।"

27 पर ओ मेरे दास याकूब* तू नि डर, ओर ओ इस्राएलो रे लोको, तुसे डरो नि, कऊँकि मां तुसे ओर तुसा रा कराना गुलामिया रे देशो ते छुड़ाई की ली आऊणा। याकूब वापस ऊई की चैन ओर सुखो साथे रणे ओर केसी सेयो डराई नि सकणे। 28 यहोवे री ये बाणी ए, "ओ मेरे दास याकूब, तुसे डरो नि, कऊँकि आऊँ तुसा साथे ए। तेबे बी मां तिना सबी जातिया रा अन्त करी देणा, जिदे मैं तुसे जबरदस्ती निकयाल़ी ते थे, तेबे बी तुसा रा अन्त नि करना। मां ताखे सोची-समजी की सजा देणी। पर मां तुसे सीदे चलाणे, पर न्याय साथे।"