यिर्मयाह 41

1 तेस सालो रे सातुए मीन्ने दे एड़ा ऊआ कि इश्माएल जो नतन्याह रा पाऊ ओर एलीशामा रा पोता, यहूदा रे राजकराने रे कराने रा माणूं ओर राजा सिदकिय्याह रा एक बड़ा अधिकारी बी था, से दस माणूंआ खे लई की मिस्पा शईरो दे अहीकामो रे पाऊ गदल्याह गे आया। तेती मिस्पा दे तिने मिली की रोटी खाई। 2 जेबे सेओ कट्ठे रोटी खाया करो थे तेबे नतन्याह रे पाऊ इश्माएल ओर तेस साथले दस सिपाई उठी की गदल्याह, जो अहीकामो रा पाऊ ओर शापानो रा पोता था ओर जो बाबेलो रे राजे यहूदा प्रदेशो रा राजा ठराई राखेया था, से तलवारी साथे एड़ा मारेया कि से मरी गा। 3 इश्माएले यहूदा रे सेओ सारे लोक बी काई ते जो मिस्पा दे गदल्याहो साथे थे। इश्माएले सेओ बेबीलोनो रे सिपाई बी काई ते जो गदल्याह साथे थे। 4 गदल्याह खे काणे रे दूजे दिने जेबे केसी खे एते गल्ला रे बारे दे पता नि था, 5 तेबे शकेम, शीलो ओर शोमरोनो रे शईरा ते अस्सी मर्द शोग मनाणे खे दाढ़ी साफ करायी की, टाल्ले फाड़ी की, शरीरो दे चीरे लगाई की ओर आथो दे नज्जो री बलि ओर लोबान लई की, यहोवे रे मन्दरो दे जाणे खे आऊँदे ऊए दिशे। 6 तेबे नतन्याह रा पाऊ इश्माएल तिना अस्सी आदमिया साथे मिलणे खे मिस्पा शईरो ते गया ओर तिना साथे मिलणे खे जांदे बखते से रोंदा ऊआ चली गा। इश्माएल तिना अस्सी आदमिया साथे मिलेया, तेबे तिने तिना खे बोलेया, "अहीकामो रे पाऊ गदल्याह खे मिलणे मां साथे चलो।" 7 जेबे सेयो तेते शईरो दे आए तेबे नतन्याह रे पाऊ इश्माएले आपणे साथले सिपाईया साथे मिली की सेयो शोग करने वाल़े सत्तर माणूं काईते ओर गड्डे दे सेटी ते। 8 पर जो ओर दस जणे बची गे थे सेयो इश्माएलो खे बोलणे लगे, "आसा खे नि काओ, कऊँकि आसा गे डोरूआ दे राखी री कणक, जौ, तेल ओर सईत ए।" इजी री खातर तिने सेयो नि काये। 9 जेते गड्डे दे इश्माएले तिना लोका रिया लाशा सेटिया जो तिने गदल्याह साथे काये थे, ये सेई बड़ा गड्डा था जो आसा राजे तेबे खणाया था जेबे इस्राएलो रे राजा बाशे तेस पाँदे अमला कित्तेया था, तिने से काये रे लोका साथे परी ता। 10 तेबे जो लोक मिस्पा शईरो दे बची गे थे, मतलब राजकुमारिया ओर जितणे लोक मिस्पा दे रयी गे थे जो अंगरक्षको रे परदाने नबूजरदाने अहीकामो रे पाऊ गदल्याह गे सम्बाल़ीते थे, तिना सबी खे नतन्याह रा पाऊ इश्माएल बन्दी बणाई की यरदन नदिया रे दूजे कनारे अम्मोनिया रे देशो रिया तरफा खे लई चलेया। 11 जेबे कारेह रे पाऊ योहानाने ओर सिपाईया रे दला रे तिने सबी परदाने जो तेस साथे थे, सुणेया कि नतन्याह रे पाऊ इश्माएले ये सारी बुराई करी राखी, 12 तेबे से तिना रे सबी सिपाईया खे लई की नतन्याह रे पाऊ इश्माएलो साथे लड़ने खे आए ओर से तेस बड़े तलाबो गे मिलेया जो गिबोनो देया। 13 कारेह रे पाऊ योहानानो खे ओर दलो रे सबी परदाना खे देखी की सेयो सारे माणूं खुश ऊईगे, जिना खे इश्माएल आपू साथे बन्दी बणाई की लई चली रा था। 14 जितणे लोका खे इश्माएल बन्दी बणाई की मिस्पा ते निणे लगी रा था, मिस्पा ते सारे कैदी नठीगे ओर कारेह रे पाऊ योहानानो री मताद करने लगे। 15 पर नतन्याह रा पाऊ इश्माएल आठ मर्दा समेत योहानानो रे आथो ते बची की अम्मोनिया गे चली गा। 16 तेबे प्रजा बीचा ते जितणे बची गे थे, मतलब, जिना सिपाईया, जवाणसा, बाल-बच्चेया ओर खुसरेया खे कारेह रा पाऊ योहानान, अहीकामो रे पाऊ गदल्याह दे मिस्पा रे काणे ते बाद नतन्याह रे पाऊ इश्माएलो गे ते छुड़ाई की गिबोनो ते वापस ल्याया था, तिना खे से आपणे साथले दलो रे परदाना समेत लई की चली गा। 17 तेबे सेयो बेतलेहमो रे नेड़े जो किम्हामो री सराँए ए, तिदे सेयो इजी री खातर रूकी गे ताकि मिस्रो खे जाओ। 18 कऊँकि सेयो कसदिया ते डरो थे, इजी री बजा ए थी कि अहीकामो रा पाऊ गदल्याह जो बाबेलो रे राजे यहूदा प्रदेशो रा राजा ठराया था, से नतन्याह रे पाऊ इश्माएले काई ता था।