यिर्मयाह 7

मन्दरो दे यिर्मयाह रा प्रचार

1 ये एक ओर सन्देश यिर्मयाह खे यहोवे रिया तरफा ते मिलेया: 2 "यहोवे रे मन्दरो दे बड़े द्वारो गे जाई की खड़ा ऊई जा ओर एस वचनो रे बारे दे बता, ओ सारे यहूदियो, तुसे जो यहोवे गे माथा टेकणे खे इना बड़े द्वारा रे जाओए, यहोवे रा वचन सुणो।" 3 सेना रा यहोवा जो इस्राएलो रा परमेशर ए, एड़ा बोलोआ, "आपणा-आपणा चाल-चलण ओर काम सुदारो, तेबे मां तुसे एते जगा रे बसणे देणे। 4 तुसे लोक ये बोली की चूठी गल्ला पाँदे परोसा नि करो कि येई यहोवे रा मन्दर ए; येई यहोवे रा मन्दर ए, यहोवे रा मन्दर ए।" 5 जे तुसे लोक सच्ची खे ई आपणा-आपणा चाल-चलण ओर काम सुदारो ओर सच्ची खे ई माणूंआ बीचे न्याय करो, 6 परदेशी, अनाथ ओर बिदुआ पाँदे अन्देर नि करो; एस देशो दे निर्दोषो री अत्या नि करो ओर दूजे देवतेया पीछे नि चलो, जिना साथे तुसा रा नुकशाण ओआ, 7 जे तुसे मेरी आज्ञा रा पाल़न करोगे तो मां तुसे एती एस शईरो रे ओर एस देशो रे जो मैं तुसा रे बुजुर्गा खे दित्तेया था, युगो-युगो तक रणे देणे। 8 देखो, तुसे चूठी गल्ला पाँदे परोसा राखोए जिना साथे कोई फायदा नि ऊँदा। 9 तुसे जो चोरी, अत्या ओर व्याभिचार करोए, चूठी कसम खाओए, बाल देवते खे तूप बाल़ोए ओर दूजे नवें देवतेया पीछे जिना खे तुसे पईले नि जाणो थे हांडोए, 10 तो क्या ये ठीक ए कि तुसे एस मईलो रे आओ जेतेखे मेरा बोलोए ओर मां सामणे खड़े ऊई की एड़ा बोलो कि आसे इजी रिया तँईं छूटी गे रे कि यो सारे बुरे काम करो? 11 क्या ये मन्दर जेतेखे तुसे मेरा बोलोए, तुसा री नजरा रे डाकूआ री गुफा ऊईगा रा? मैं आपू ये देखी राखेया, यहोवे री येई बाणी ए।*7:11 मत्ती 21:13, मर. 11:17, लूक. 19:46

शीलो एक चतौणिया रे रूपो दे

12 यहूदा रे लोको, तुसे एबे शीलो शईरो खे जाओ, जेती मैं पईले आपणे नाओं रा मन्दर बणाया था, तेती जाई की देखो कि मैं आपणी इस्राएली प्रजा रिया बजा ते शीलो जगा री क्या दशा करी ती री। 13 एबे यहोवे री ये बाणी ए कि तुसे जो इना सारे काम करदे आई रे, तेबे बी आऊँ तुसा साथे बड़ी कोशिश करी की गल्ला करदा आई रा, तेबे बी तुसे नि सुणेया ओर तुसा खे बुलांदा आया, पर तुसे नि बोले। 14 इजी री खातर ये मन्दर जेतेखे मेरा बोलोए, जेते पाँदे तुसे परोसा राखोए ओर ये जगा जो मैं तुसा खे ओर तुसा रे बुजुर्गा खे दित्ती थी, एतेरी दशा मां शीलो जेड़ी करी देणी। 15 ओर जेड़े मैं तुसा रे ओ एप्रैमो रे लोको, तुसा रे सब इस्राएली साथी आपणे सामणे ते दूर करीते, तेड़े ई तुसे बी दूर करी देणे।

प्रजा रे जरीये आज्ञा रा उल्लंघन

16 यहोवे माखे बोलेया, "यिर्मयाह, जेथो तक तेरी री गल्ल ए, तुँ यहूदा रे इना लोका रिया तँईं प्रार्थना नि कर, ना इना लोका रिया तँईं जोरे की बुला ना मांते प्रार्थना कर, कऊँकि मां तेरी नि सुणनी।" 17 आऊँ जाणोआ कि तूँ देखणे लगी रा कि यहूदा रे यो लोक यहूदा रे शईर ओर यरूशलेम शईरो री सड़का दे क्या बुराई करने लगी रे? 18 यहूदा रे लोक जो करेया करोए से ये ए, बच्चे बाल़ने खे लकड़ू कट्ठे करोए, बाओ आग सुलगाओए ओर जवाणसा आटा गूँदोईया, ताकि देवी जेसा खे सेयो स्वर्गो री राणी बोलोए तेसा खे रोटिया बणाई की चढ़ाओए ओर माखे रोष चढ़ाणे रिया तँईं ओरी देवतेया सामणे अँगूरा रा रस अर्घ करी की चढ़ाओए। 19 यहोवे पूछेया, "सेयो एड़ा करी की माखे ई गुस्सा दलाओ ए, सेयो आपू बी एड़ा शर्मनाक काम करी की दु:खी ओए।" 20 तेबे प्रभु यहोवे ये बोलेया, "क्या माणूं, क्या डांगर, क्या मैदानो रे डाल़, क्या जमीना री उपज, तिना सबी पाँदे जो मन्दरो री एसा जगा दे ए, मेरे रोषो री आग पड़कणे वाल़ी ए, से रोज बल़दी रणी ओर कदी नि बीजणी।"

बलिदान ओर आज्ञा रा मानणा

21 सेना रा यहोवा जो इस्राएलो रा परमेशर ए, तिने माखे यहूदा रे लोका खे ये बोलणे खे बोलेया, "आपणे मेलबलिया साथे आपणे होमबलि बी चढ़ाओ ओर मास खाओ। 22 कऊँकि जेस बखते मैं तुसा रे बुजुर्ग मिस्र देशो ते निकयाल़े, तेस बखते मैं तिना खे मेलबलि ओर होमबलिया रे बारे दे कोई आज्ञा नि दित्ती थी। 23 पर मैं तिना खे ये आज्ञा दित्ती थी कि मेरे वचनो खे मानो, तेबे आऊँ तुसा रा परमेशर ऊणा ओर तुसे मेरी प्रजा ठईरने ओर जेसा बाटा री आऊँ तुसा खे आज्ञा देऊँगा, तिदे ई चलो, तेबे तुसा रा पला ऊणा। 24 पर तुसा रे बुजुर्गे मेरी नि सुणी ओर ना मेरी गल्ला पाँदे कान लगाया, सेयो आपणी ई योजना पाँदे ओर आपणे टीठ बुरे मनो पाँदे ई चलदे रये ओर आगे नि बढ़े, बल्कि पीछे अटी गे। 25 जेस दिने तुसा रे बुजुर्ग मिस्र देशो ते निकल़े, तेस दिनो ते आजो तक आऊँ तो आपणे सारे दास ओर भविष्यबक्ता खे तुसा गे बड़ी कोशिशा साथे पेजदा रया, 26 पर मेरे लोके मेरी नि सुणी, ना आपणा कान लगाया, तिने हठ कित्ती ओर आपणे बुजुर्गा ते बढ़ी की बुराईया करी राखिया।"

आज्ञा ना मानणे वाल़े यहूदा रिया तँईं रोणा

27 तेबे यहोवे माखे बोलेया, "तां सारिया गल्ला तिना खे बोलणिया, पर तिना तेरी नि सुणनी, तां सेयो बुलाणे, पर तिना ज्वाब नि देणा।" 28 यहोवे यिर्मयाह ते बोलेया, "तेबे तैं तिना खे बोली देणा कि ये से जाति ए जो आपणे परमेशर यहोवे री नि सुणदी ओर ताड़ना ते पनि मानदी, सच्चाई नाश ऊई गी ओर तिना रे मुंए ते दूर ऊई गी री।" 29 इजी री खातर ओ यरूशलेमो रे लोको, "शोगो दे आपणे सिरो रे बाल़ कटाई की सेटी देयो, बंजर टीलेया पाँदे चढ़ी की दु:खो रे गाणे गाओ, कऊँकि यहोवे एस बखतो रे माणूंआ पाँदे रोष कित्तेया ओर सेयो नकम्मे जाणी की छाडी ते रे।" 30 यहोवा बोलोआ, "इजी री बजा ए कि यहूदिये से काम करी राखेया, जो मेरी नजरा दे बुरा ए, तिने तेती मन्दरो दे जेतेखे मेरा बोलोए, आपणी घृणित मूर्तिया तिना ते आऊँ नफरत करूँआ राखी की से अशुद्ध करी ता रा। 31 ओर यहूदा रे लोके हिन्नोम कराने री तराईया दे तोपेत नाओं रिया ऊच्चिया बेदिया बणाई की, तुसे आपणे पाऊ-मुन्निया खे काई देओए ओर तिना खे ओरी देवतेया खे बलि करी की आगी दे फूकी देओए, जेतेरी आज्ञा मैं कदी नि दित्ती ओर ना ई एड़ा मेरे मनो दे आया। 32 यहोवे री ए वाणी ए, इजी री खातर एड़े दिन आऊणे कि तेसा तराईया खे फेर ना तो तोपेतो री ओर ना हिन्नोम कराने री बोलेया जाणा, बल्कि अत्यारी तराई बोलेया जाणा ओर तोपेतो दे इतणियां कब्रा ऊणिया कि कोई ओर जगा नि रणी। 33 इजी री खातर इना माणूंआ रिया लाशा सर्गो रे पंछिया ओर तरतिया रे जानवरा खाणिया ओर तिना खे नठाणे वाल़ा कोई नि रणा। 34 तेस बखते मां एड़ा करना कि यहूदा रे शईर ओर यरूशलेम शईरो री सड़का दे ब्याओ दे लाड़ी, लाड़े ओर लाड़िया री खुशी ओर आनंदो री आवाज नि सुणनी, कऊँकि देश पूरी तरअ ते नाश ऊई जाणा।"*7:34 होशे 2:11, यिर्म. 16:9