यिर्मयाह 10

परमेशर ओर मूर्तिपूजा

1 यहोवा एड़ा बोलोआ कि ओ इस्राएलो रे लोको जो वचन यहोवा तुसा खे बोलोआ से सुणो: 2 यहोवा बोलोआ, "दूजी जातिया जेड़ा चाल-चलण नि सीखो, ना तिना जेड़े सर्गो रे नशाणा ते डरो, कऊँकि दूजी जातिया रे लोक तिना ते डरोए। 3 कऊँकि दूजे देशो रे रवाज तो नकम्मे ए। मूर्ति तो बणो ते केसी रा बाडेया रा लक्कड़ ए, जो कारीगरे छिणियाँ साथे बणायी राखी। 4 तेबे लोक तेसा खे सूईने-चाँदिए साथे सजाओए ओर थौड़े साथे परेग ठोकी-ठोकी की मजबूत करोए, ताकि से ईल्ली-डूली नि सको। 5 सेयो मूर्तिया काकड़िया रे डोरूए रे खड़े रे पुतले जेड़िया ए, पर सेओ बोली नि सकदिया, सेयो चकी की निणियां पड़ोईया, कऊँकि सेयो चली नि सकदिया। तिना ते नि डरो, कऊँकि सेयो ना तो खरा करी सकदिया ओर ना ई बुरा।"

6 ओ यहोवा तां जेड़ा कोई नि ए, तूँ महान ए ओर तूँ बऊत सामर्थी ए। 7 सबी जातिया रे राजेया खे तांते डरना चाईयो। कऊँकि ये तां जोगा ए, दूजी जातिया रे सारे समजदारा बीचे ओर तिना रे सारे राज रे तां जेड़ा कोई नि ए।*10:7 प्रका. 15:4 8 पर सेयो समजदार मर्द ओर जातिया रे राजा डांगरो जेड़े छूदे मूर्ख ए, मूर्तिया ते क्या शिक्षा? सेयो तो लक्कड़ ईए! 9 पत्तर बणाई रा चाँदी तर्शीश शईरो ते ल्याया जाओआ ओर ऊफाज़ शईरो ते सूईना। सेयो तो कारीगर ओर सन्यारो रे आथो री कारीगरी ए, तिना रे पईरावे नीले ओर बैंगणी रंगो रे टाल्ले ए, तिना रे जो कुछ ए, सेयो पूरी तरअ ते कारीगरो री कारीगरी ए। 10 पर सिर्फ यहोवा ई सच्चा परमेशर ए। सेई एक कल्ला परमेशर ए ओर सदा रा राजा सेईए। तेसरे डरो ते तरती कांबोई ओर जातिया-जातिया रे लोक तेसरे रोषो खे सयीन नि करी सकदे।*10:10 नहू. 1:6 11 जो लोक दूजे देवतेया री पूजा करोए तिना ते ये बोल, "यो देवते जिने सर्ग ओर तरती नि बणाई, सेयो तरतिया पाँदा ते ओर सर्गो निठा ते नाश ऊई जाणे।"

स्तुतिया रा गीत

12 यहोवे ई तरती आपणी शक्तिया साथे बणाई, तिने दुनिया आपणी अक्ला साथे खड़ी कित्ती ओर सर्ग आपणी समजा साथे ताणी राखेया। 13 जेबे से बोलोआ तेबे सर्गो ते पाणिए रा बऊत शाद ओआ ओर से तरतिया रे कनारो ते कोरे खे चकोआ। से बर्खा खे बिजल़ी चमकाओआ ओर आपणे पण्डारो ते अवा चलाओआ। 14 सारे माणूं बिना ज्ञानो ते डांगरो जेड़े ए, आपणी कअड़ी री मूर्तिया रिया बजा ते सबी सन्यारा री उम्मीद टूटोई, कऊँकि तिना री कअड़ी रिया मूर्तिया चूठिया ए ओर सेयो साआ नि लई सकदिया।*10:14 यिर्म. 51:17,18 15 यहोवा बोलोआ, "सेयो बेकार ओर मजाको जोगिया ए, जेबे तिना रिया सजा रा बखत आऊणा तेबे सेयो नाश ऊई जाणिया। 16 पर परमेशर जो याकूबो रा इस्सा तिना मूर्तिया बराबर नि आ, कऊँकि से सबी खे बनाणे वाल़ा ए ओर इस्राएल तेसरे आपणे इस्से रा गोत्र ए, सेना रा यहोवा तेसरा नाओं ए।"

आऊणे वाल़ी गुलामी

17 ओ दुश्मणा ते केरे रे शईरो दे रणे वाल़ेयो, आपणी गाठड़ी जमीना ते चको! 18 कऊँकि यहोवा एड़ा बोलोआ कि मां एस बार एस देशो दे रणे वाल़े मानो गूलेला दे राखी की सेटी देणे ओर सेयो एड़ी-एड़ी मुसीबता दे पाणे कि तिना री समजा दे पनि आऊणा। 19 तेबे लोके ज्वाब दित्तेया, "आसा पाँदे हाय! म्हारे जख़्म ठीक ऊणे जोगे नि ए। तेबे आसे सोचेया कि ये तो बमारी ईए, इजी री खातर आसा खे एड़ा सयीन करना चाईयो।" 20 मेरा तम्बू नाश ऊईगा ओर डेरे रिया सारिया रस्सिया टूटी गिया, मेरे बच्चे मांगा गे ते चली गे ओर वापस नि आऊणे, एबे कोई नि ए जो मेरा तम्बू ताणो ओर मेरी कड़िया खड़ी करो। 21 कऊँकि गवाल़े डांगरा रे चूण्डो जेड़े ए ओर सेयो यहोवे खे नि बुलांदे, इजी बजा ते सेयो समजा साथे नि चलदे ओर तिना रिया सारिया पेडा तित्तर-बित्तर ऊई गी रिया। 22 सुणो! एक आवाज सुणने लगी री देख से आऊणे लगी रा! उत्तर दिशा दे एकी देशो ते म्हारे दुश्मणा रे आऊणे री आवाज ऊणे लगी री, ताकि सेयो यहूदा रे शईरो खे उजाड़ी की गीदड़ा रे रणे री जगा बणाई देयो। 23 ओ यहोवा, माखे पता लगी गा रा कि माणूंए री बाट तेसरे वशो रे नि ए, माणूं चलो तो आया, पर तेसरे कदम तेसरे वशो दे नि ए। 24 इजी री खातर ओ यहोवा आसा खे ताड़ना दे, पर न्याय साथे, रोषो रे आई की नि, केथी एड़ा नि ओ कि आसे नाश ऊई जाऊँ। 25 जो जाति ताखे नि जाणदी ओर जो तांते प्रार्थना नि करदे, तिना सबी पाँदे ई आपणा रोष कर, कऊँकि तिने तुसा रे लोक जो याकूबो रे वंशो रे ए, रा नाश करी ता ओर तिना रे रणे रिया जगा उजाड़ी तिया।*10:25 पज. 79:6,7