1 यिर्मयाहे बोलेया, "ओ बिन्यामीन गोत्रो रे लोको, यरूशलेम शईरो ते आपणा-आपणा समान लई की नठो! तकोआ शईरो दे नरसिंगा बजाओ ओर बेथक्केरेम शईरो दे चण्डा ऊच्चा करो, कऊँकि जो दुश्मण उत्तर दिशा ते आऊणे वाल़ा ए से बड़ा पारी नाश करने वाल़ा ए।" 2 सिय्योनो रे लोको, तुसे एक सुन्दर चराईया जेड़े ए। 3 गवाल़ेया आपणी-आपणी पेडा बाकरिया साथे लई की तेते पाँदे चढ़ी की तेसरे चऊँ कनारे आपणे तम्बू खड़े करने, तेबे तिना आपणे नेड़े-तेड़े रा काआ चराई लणा। 4 राजेया आपणी सेना ते बोलणा कि यरूशलेम शईरो रे खलाफ लड़ाईया री त्यारी करो, उठो, आसे त्याड़िया अमला करूँए! लाणत ए, लाणत ए, दिन डूबणे वाल़ा ए ओर साँज ऊणे वाल़ी ए। 5 उठो आसे राथियो खे ई चढ़ाई करूँए ओर तेथो रे मईल टाल़ी देऊँए।

6 सेना रा यहोवा तुसा खे बोलोआ, "यरूशलेम शईरो रे चऊँ कनारे रे डाल़ बाडो, ओर यरूशलेम शईरो रे खलाफ केरा पाणे रा टीला बणाओ। ये सेई शईर ए जो सजा जोगा ए, इदे अन्देर ई अन्देर परे राए। 7 जेड़ा कुएँ ते रोज नया पाणी निकल़ोआ, तेड़िया ई एस शईरो ते रोज नईया बुराईया निकल़ोईया, इदे हुड़दंग ओर बुराईया रा आल्ला-गोल्ला ऊँदा रओआ, माखे रोज बुड़ना ओर मार-पीटाई दिशोई। 8 ओ यरूशलेम शईरो रे लोको, ताड़ना ई मानी लो, नई तो तुसे मेरे मनो ते बी उतरी जाणे ओर मां यरूशलेम उजाड़ी की बिना माणूंआ रा करी देणा।"

9 सेना रा यहोवा ईंयाँ बोलोआ, "एथो तक कि जो थोड़े जे अंगूर इस्राएलो दे बची रे, सेयो बी दुबारा तोड़ी देणे, जेड़े कि एक बडाई करने वाल़ा हर बेला री दूजी बार फेर देखी लओआ, ताकि बचे दे अंगूरा खे तोड़ी सको।" 10 आऊँ केसखे बोलूँ ओर केसखे सावधान करी की बोलूँ ताकि सेयो मानो? देख, यो ऊच्चा सुणोए, यो त्यान पनि देई सकदे, देख, यहोवे रे वचनो री सेओ निन्दा करोए ओर यो यहोवे रा सन्देश नि सुणना चाँदे।* 11 इजी बजा ते एबे यहोवे रा रोष मेरे मनो दे परीगा, आऊँ तिजी खे रोकदे-रोकदे थकी गा रा। "बजारो दे बच्चेया पाँदे ओर जवाना री सभा रे बी ये बता, कऊँकि लाड़ा ओर लाड़िया दोनो पखड़ने स्याणे ओर ज्यादा स्याणे साथे पकड़े जाणे। 12 तिना लोका रे डोरू, जवाणसा ओर कअर सब दूजे रे ऊई जाणे, कऊँकि मां आपणा आथ चकणा ओर यहूदा प्रदेशो रे रणेया वाल़े लोका खे सजा देणी।" यहोवे री येई बाणी ए। 13 कऊँकि तिना बीचे छोटेया ते लई की बड़ेया तक सारे के सारे लाल़ची ए ओर क्या भविष्यबक्तेया ते लई की पुरोईता तक सारे के सारे कपट करी की लोका ते पैसा लओए। 14 सेयो शान्ति-शान्ति एड़ा बोली की मेरी प्रजा रे जख़्म पाँदिए-पाँदिए ई ठीक करोए, पर शान्ति कुछ पनि ए।* 15 क्या सेयो आपणे बुरे कामो रिया बजा ते कदी बी शर्मिंदा नि ऊए, पर सेयो बिल्कुल बी शर्मिंदा नि ऊए, सेयो शर्मिंदा ऊणा जाणदे ई नि, इजी बजा ते जेबे ओर लोक थाले पड़ोगे, तेबे सेयो बी पड़ने ओर जेबे मां तिना खे सजा देणे लगणा, तेबे सेयो ठोकर खाई की रूड़ने, यहोवे री येई बाणी ए।

16 यहोवा आपणे लोका ते बोलेया, "सड़का पाँदे खड़े ऊई की देखो ओर पूछो कि पुराणे बखतो री अच्छी बाट कुणजी ए, तिदे ई चलो ओर तुसा खे आपणे-आपणे मनो रे चैन मिलणा पर तिने बोलेया, आसा तिजी पाँदे नि चलणा।"* 17 मैं तुसा रिया तँईं पईरेदार बठयाल़ी की बोलेया रड़सिंगे री आवाज त्यानो साथे सुणेयो! पर तिने बोलेया, "आसा नि सुणनी।" 18 इजी री खातर, ओ तरतिया रे दूजे देशो रे सारे लोको सुणो ओर ओ मण्डल़ी, देख कि इना लोका बीचे क्या ऊणे लगी रा। 19 तरतिया रे लोको ये सुणो! देख, मां यहूदा रे लोका पाँदे एड़ी मुसीबत ल्याऊणी, जो तिना री सोचणे रा फल ए, कऊँकि तिने मेरे वचनो पाँदे त्यान नि दित्तेया ओर तिने मेरी शिक्षा नकम्मी मानी। 20 मेरिया तँईं जो लोबान शेबा जगा ते ओर खुशबूदार गूगल़ जो दूर देशो ते आओआ, तिजी रा क्या मतलब ए?* आऊँ तुसा री होमबलिया ते खुश नि ए ओर ना ई माखे तुसा रे मेलबलि मीठे लगदे। 21 इजी बजा ते यहोवे ये बोली राखेया कि देखो, मां यहूदा रे लोका रे आगे ठोकर राखणी ओर बाओ ओर माठा, पड़ोसी ओर दोस्त, सारे के सारे ठोकर खाई की नाश ऊणे।

22 यहोवा ये बोलोआ, "देखो, उत्तर दिशा ते, बल्कि तरतिया रे कनारे ते बड़ी जातिया रे लोका एस देशो रे खलाफ चढ़ाई करनी। 23 सैनिक धनुष ओर बड़छे लई की आऊणे, सेयो क्रूर ओर निर्दयी ए ओर जेबे सेयो बोलोए, तेबे एड़ा लगोआ कि समुद्र गरजणे लगी रा, सेयो कोड़ेया पाँदे चढ़ी की आऊणे, ओ सिय्योन, तिना वीरो जेड़े शस्त्र लई की ता पाँदे चढ़ाई करनी।" 24 यरूशलेम शईरो रे लोके बोलेया, "एतेरा सन्देश सुणदे ई म्‍हारे आथ टीले पड़ी गे रे; आसे संकटो रे पड़ी रे; जच्‍चा जेड़ी पीड़ आसा खे उठी री। 25 मैदानो रे नि निकल़ो, बाटा रे पनि चलो, कऊँकि दुश्मणा रे आथो रे तलवार ए, ओर चऊँ कनारे तिना रा डर ए। 26 ओ मेरे लोको आपणे लको रे टाट बान ओर स्वाई बीचे लेट, जेड़ा एकलौते पाऊआ रिया तँईं दु:ख ओआ, तेड़ा ई बड़ा दु:ख मना, कऊँकि दुश्मणा रा नाश करने वाल़ा आसा पाँदे अचाणक आऊणा।"

27 तेबे यहोवे माखे बोलेया, "मैं तूँ इजी री खातर आपणी प्रजा बीचे गुम्मट ओर गढ़ ठराई राखेया ताकि तूँ तिना रा चाल-चलण देखे ओर पछयाणे। 28 सेयो सारे बऊत ई टीठ ए, सेयो चूगली करदे ऊए फिरदे रओए, तिना सबी रा चाल-चलण बिगड़ेया राए, सेयो पीतल़ ओर लोए जेड़े कठोर ए। 29 धातुआ पाँदे कित्तेया रा काम गल़ी गा, सीसा आगी रे फूखी गा, बनाणे वाल़े बेकार ई बणाया, कऊँकि बुरे लोक नि निकयाल़े नि। 30 मां इस्राएलिया खे खोटा चाँदी ऊणे रा नाओं देणा, कऊँकि यहोवे खे सेयो खोटे मिले।"