1 यहोवे यिर्मयाह खे एक ओर सन्देश दित्तेया। तिने बोलेया, "उठी की कुम्हारो रे कअरे जा 2 ओर मां तेती ताखे बताणा कि लोका खे क्या बोलणा ए।" 3 तेबे आऊँ कुम्हारो रे कअरे गया ओर मैं देखेया कि कुम्हार आपणे चाको पाँदे माट्टिया रे पांडे बनाणे लगी रा। 4 जो माट्टिया रा पांडा से बनाणे लगी रा था से खराब ऊईगा, तेबे तिने तिजी रा ई दूजा पांडा आपणी मर्जिया रे मुताबिक बणाईता। 5 तेबे यहोवे ये वचन माखे बोलेया, 6 ओ इस्राएलो रे लोको, यहोवा री ये वाणी ए कि एस कुम्हारो जेड़ा तुसा साथे आऊँ बी करी सकूँआ। देखो, जेड़ी माट्टी कुम्हारो रे आथो रे रओई, तिंयाँ ई ओ इस्राएलो रे कराने, तुसे बी मेरे आथो रे ए।* 7 जेबे आऊँ केसी राज या जातिया रे बारे दे बोलूँ कि से पट्टी देणा या टाल़ी देणा या नाश करी देणा, 8 तेबे जे तेस देशो रे लोक जिना रे बारे दे मैं ये गल्ल बोली राखी ओ ओर सेयो आपणी बुराईया ते फिरो, तो मां तेसा मुसीबता रे बारे दे जो मैं तिना पाँदे ल्याऊणे खे ठाणी राखी ओ, पछताणा। 9 जेबे आऊँ केसी राज या जातिया रे बारे दे बोलूँ कि मां से बनाणी ओर रूमणी, 10 तेबे जे तेस राज्य रे लोक तेस कामो खे करोगे जो मेरी नजरा दे बुरा ए ओर मेरी गल्ल नि मानोगे, तो मां तेसा पलाईया रे बारे दे जो मैं तिना रिया तँईं करने खे बोलेया था, पछताणा। 11 इजी री खातर एबे तूँ यहूदा ओर यरूशलेम शईरो दे सबी रणे वाल़ेया लोका खे चतौणी दे, "यहोवा ईंयाँ बोलोआ कि देखो, आऊँ तुसा लोका रा नुकशाण करने री योजना ओर तुसा रे खलाफ योजना करने लगी रा। इजी री खातर तुसे आपणे-आपणे बुरे कामो ते फिरो ओर आपणा-आपणा चाल-चलण ओर काम सुदारो।"

12 पर सेयो ज्वाब देओए, "एड़ा नि ऊई सकदा, आसा तो आपणी इच्छा रे मुताबिक ई चलणा ओर आपणे बुरे मनो रिया जिदा पाँदे बणे दे रणा।" 13 इजी बजा ते यहोवा ईंयाँ बोलोआ कि जातिया-जातिया ते पूछ कि एड़िया गल्ला क्या कदी केसी रे सुणने दे आई रिया? ओ इस्राएलो रे लोको, जो मेरी कुँवारी बेटिया जेड़े ए, तिने काम करी राखेया तिजी रे सुणने ते रोम-रोम खड़े ऊई जाओए। 14 क्या लबानोनो रे पाह्ड़ो री बर्फ जो चट्टानी पाँदा ते गल़ी की मैदानो दे आओई, क्या से बन्द ऊई सकोई। क्या से ठण्डा पाणी जो दूरो ते बह्ओआ कदी नि सूकी सकदा। 15 पर मेरी प्रजा माखे पूली गी री; सेयो नकम्मी चीजा खे तूप बाल़ोए; तिने आपणी पुराणी बाटा रे ठोकर खाई राखी ओर राज री बाट छाडी की संगड़ी बाटा दे रूल़ी गे रे। 16 इजी ते इना रा देश एड़ा ऊजड़ ऊईगा रा कि लोका तेस पाँदे सदा चाड़िया बजांदे रणा ओर जो कोई तिसिये चलोगा से हैरान ऊणा ओर तेस ना मानणे खे सिर ईलाणा। 17 मां यहूदा रे लोक पूर्वो रिया अवा ते ऊड़ाई की दुश्मणा सामणे ते तित्तर-बित्तर करी देणे। तिना री मुसीबता रे बखते मां तिना खे मूँ नि पर पीठ दखाणी।

18 तेबे कुछ लोके एकी दूजे खे बोलेया, "चलो यिर्मयाह रे खलाफ योजना करूँए। कऊँकि ना पुरोईतो ते बिधान, ना ज्ञानिये ते ज्ञान ओर ना भविष्यबक्ते ते वचन दूर ऊणे। आओ, आसे एसरी कोई गल्ल पकड़ी की तेसखे नाश करवाऊँए ओर तेबे आसा तेसरी केसी गल्ला पाँदे त्यान नि देणा।" 19 तेबे मैं यहोवे ते प्रार्थना कित्ती, ओ यहोवा, मेरी तरफा खे त्यान दे ओर जो लोक मां साथे लड़ाई करोए तिना रिया गल्ला सुण। 20 क्या पलाईया रे बदले बुराई नि ऊणी चाईयो। तूँ एसा गल्ला खे याद कर कि आऊँ तिना री पलाईया रिया तँईं तां सामणे प्रार्थना करने खे खड़ा ऊआ, ताकि तेरा रोष तिना पाँदा ते उतरी जाओ ओर एबे तिने मेरे प्राण लणे रिया तँईं गड्डा खणी राखेया। 21 इजी री खातर तिना रे बाल-बच्चेया खे पूखे मरने दे, सेयो लड़ाईया री तलवारी साथे बाडी की मरो ओर तिना री जवाणसा बिना कुलो ते ओर बिदुआ ऊई जाओ। तिना रे मर्द ओर जवान लड़ाईया दे तलवारी साथे मरी जाओ। 22 जेबे तूँ तिना पाँदे अचाणक अमला करने वाल़ेया रे चूण्डो खे पेजे, तेबे तिना रे कअरो ते चींगणा सुणो! कऊँकि तिने मेरिया तँईं गड्डा खणेया ओर माखे फसाणे खे फन्दे लगाए। 23 ओ यहोवा, तूँ तिना री सारी योजना जाणेया जो सेयो माखे काणे खे करोए। इजी बजा ते तूँ तिना रे पापो खे नि टख, ना तिना रे पाप आपणे सामणे ते मिटा। सेयो तां सामणे ई ठोकर खाई की रूड़ी जाओ, आपणे रोषो दे आई की तिना रे जादा पापा रिया बजा ते तिना साथे एड़ा ई बर्ताओ कर।