यिर्मयाह 24

अच्छे दाऊगल़े ओर बुरे दाऊगल़े

1 जेबे बाबेलो रा राजा नबूकदनेस्सर, यहोयाकीमो रे पाऊ यहूदा रे राजा यकोन्याह, यहूदा रे परदान, ल्वार, ओर बाकी कारीगरा खे बन्दी बणाई की यरूशलेम शईरो ते बाबेलो खे लईगा था, तो तिजी ते बाद यहोवे मां यिर्मयाह खे आपणे मन्दरो रे सामणे राखे दे दाऊगल़े रे दो टोकरे दखाए। 2 एकी कटोरे दे तो पईले ते ई पाक्के रे अच्छे-अच्छे दाऊगल़े थे सेओ तिना दाऊगल़ेया जेड़े थे जो मौसमो रे शुरूओ दे पकोए। ओर दूजे टोकरे दे बिल्कुल बेकार दाऊगल़े थे, बल्कि सेयो इतणे बेकार थे कि खाणे जोगे पनि थे।

3 तेबे यहोवे मांते पूछेया, "ओ यिर्मयाह, ताखे क्या दिशणे लगी रा?" मैं ज्वाब दित्तेया, "दाऊगल़े, जो दाऊगल़े खरे ए, सेयो बऊत ई अच्छे ए, पर जो बेकार ए, सेयो बऊत ई बेकार ए, बल्कि इतणे बेकार ए कि खाणे जोगे पनि ए।" 4 तेबे यहोवे रा ये सन्देश माखे मिलेया, 5 "इस्राएलो रा परमेशर यहोवा ईंयाँ बोलोआ कि जेड़े अच्छे दाऊगल़े अच्छे ऊणे रिया बजा ते खाए जाओए, तेड़ा ई आऊँ यहूदी बन्दिया खे जो मैं एथा ते कसदिया*24:5 कसदिया इजी रा दूजा नाओं बेबीलोनिया ए 21:4 रे देशो दे पेजी ते रे, देखी की खुश ऊणा। 6 मां तिना पाँदे दया-दृष्टि राखणी ओर मां सेयो एते देशो दे वापस ल्याऊणे ओर सेयो नाश नि करने, पर बनाणे, सेयो मां पट्टणे नि, पर लगाए दे राखणे। 7 मां तिना रा मन एड़ा करी देणा कि तिना आऊँ जाणना कि आऊँ यहोवा ए ओर सेयो मेरे लोक ठईरने ओर आऊँ तिना रा परमेशर ठईरना, कऊँकि सेयो बाबुलो रे बन्दी पूरे मनो ते मेरी शरणा दे आऊणे। 8 पर यहूदा रा राजा सिदकिय्याह तिना दाऊगल़ेया जेड़ा ए जो इतणे सड़े गल़े दे ए कि खाऊँदे नि, तेड़े ई मां यहूदा रा राजा सिदकिय्याह, तेसरे नकम्मे परदान ओर यरूशलेम शईरो रे लोक जो यहूदा प्रदेशो दे रईगे दे थे, जो एते देशो दे या मिस्रो दे रयी गे दे, छाडी देणे। 9 इजी बजा ते सेयो तरतिया पाँदे कुमदे फिरदे रणे ओर तिना खे दु:ख ऊँदा रणा ओर जेते जगा ते मां सेयो जबरदस्ती काडी देणे, तिना सबी जगा दे सेयो बेज्जत, मजाको री बजा ओर स्रापो री बजा ऊणे। 10 ओर मां तिना ते तलवार चलवाणी ओर मां अकाल़ ओर बमारी फैलाणी ओर अन्तो दे सेयो इस्राएल देशो ते, जो मैं तिना रे बुजुर्गा खे ओर तिना खे दित्तेया था, मिटी जाणे।"